Tofu se taavale i totonu o le sami – taumafaiga a le avetaavale e pule i lona ola

Pago Pago - AMERIKA SAMOA

O le 10:34 i le po o Aperila 19, 2025 sa molimauina ai e se tamaitai ia se ta’avale na pa’u i totonu o le sami, i le afioaga o Avaio ma ia vala’auina ai loa le Ofisa a Leoleo i Fagatogo.

E tusa ai ma le fa’amatalaga a le tamaitai sa vala’au i leoleo, e to’alua ni tagata sa ia va’aia o feosofi mai totonu o le ta’avale, a’o iai le taavale i totonu o le sami, ma sa faapea ona sosola ‘ese ia alii e to’alua.

Sa faapea ona fa’atopetope atu loa leoleo i le nofoaga na ripotia mai ai lea fa’alavelave ma e pei ona sa ta’ua e le tamaitai na valaau atu i le ofisa a leoleo, e maua atu e leoleo, ua na’o le ta’avale o lo’o i totonu o le sami.

Na molimauina e leoleo ia le i luga uma o fa’amalama a le ta’avale, ae ua matala mai i fafo ia taga papa’e o le ta’avale lea e i le foeuli o le ta’avale ma luma o le itu a le pasese, lea e masani ona fiti mai i fafo pe a taia le ta’avale.

 Sa va’aia foi le sua mia o le tai ma ua fa’atumulia le taavale i le sami.  Na molimauina ai foi le matua’i malepe o luma o le ta’avale, ma le opea o le suau’u mai i le ta’avale i luga o le sami.  O le fa’amalama pito i luma, na ta’e ma sa taofia le tafea atu o le ta’avale i tai, ona o se ma’a sa i lalo o le pa’u pito i luma, i le itu a le pasese.

Na fa’afeso’ota’i mai e leoleo sa i le nofoaga na tupu ai le fa’alavelave, ia le latou ofisa, ma tu’uina mai iai fa’amaumauga o le ta’avale ma ia fa’afeso’ota’i le pule o le ta’avale e tusa ai ma le tulaga ua tupu i lana ta’avale.

E tusa ai ma le ofisa a leoleo, na fa’ailoa atu e le e ana le ta’avale, o lona atalii, o Toriano Silva, sa fa’aaogaina le ta’avale, ae o lo’o moe lona atalii i luma o le latou fale ma e na te le iloa pe na faapefea ona o’o atu lona atalii i le fale, ae o lo’o tau i le ua.

Na fa’apea ona agai atu leoleo i le fale o le e ana le ta’avale ma maua atu ai le alii 22 tausaga, o Toriano, lea na molia i lenei fa’alavelave.  Ina ua maua e leoleo ia Toriano, sa le mafai ona savali ona o se manu’a i lona vae taumatau.  Ma na lagonaina foi e leoleo ia le malosi o le manogi pia o le alii.

Na fesiligia e leoleo ia Toriano pe manaomia se tasi mai i le EMS e togafitia lona manu’a, sa tali le alii, e leai.

Sa faapea foi ona fesiligia le alii o Toriano po o ia sa faafoeina le ta’avale lea sa tia’i i Avaio, na tali le alii, ioe.  Sa toe fesiligia foi o ia pe sa ia taumafaina ni ‘ava malosi, ae na te le’i fa’afoea le ta’avale.  Sa tali le alii, na inu ana pia, ae na te le’i fa’afoea le ta’avale, ae e le’i toe tago i se pia, ina ua tupu le fa’alavelave.

Na fa’amaonia e Tariano lona inu ina o ni apa pia se iva.

Sa fesiligia foi o ia, e tusa ai ma lana pasese sa o la faimalaga i le ta’avale, na tali Tariano, ua sola, ma o le suafa o lana pasese, o Alex.

Na faapea loa ona ave faapagotaina e leoleo ia Tariano ma momoli atu o ia i le Ofisa a Leoleo i Fagaitua, mo le fa’atinoina o a latou tiute masani.

O lea foi afiafi sa faapea ona su’esu’eina ai le tulaga fa’asua’ava o Tariano, ma sa le pasia lana su’ega e tasi, ae na le mafai ona fa’atino lana su’ega lea e savali ai i le laina, ona o le manu’a i lona vae. 

Na fa’ailoa atu e leoleo ia Tariano le moliaina o ia, ona o le fa’afoeina o se ta’avale ae o lo’o fa’asua’ava.

Ae ina ua toe fesiligia e leoleo ia Tariano, i le mafua’aga na ia tago ai i le ta’avale ae o la u ana iloa, ua fa’asua’ava o ia.  Sa tali le alii, na mana’o e pule i lona ola, ma o le mafua’aga lea sa ia aveina ai le ta’avale, ina ia fa’atu sa’o lava le ta’avale i le sami, ma sona faamoemoega, o le a oti ai.

Sa ta’ua e Tariano, na ia faia tulaga uma ma lona iloa, o le a uma ai lona ola, faapea le ola o lana pasese. 

Ma sa fa’aalia e Tariano i leoleo e faapea, e le o se taimi muamua lea ua tupu ai se fa’alavelave tau taavale ia te ia, ona o ona mafaufauga faapea, o le fia mana’o e pule i lona ola, ona ua fai o ia ma avega mamafa i ona matua.

Sa faamatalaina e Tariano lona gaoia muamua o le ta’avale ma taumafai ai foi e pule i lona ola.  Ma o le fa’alua ai lea ona ia gaoia le taavale ina ia mafai ona ia toe taumafai ai, e pule i lona ola.

Na taumafai leoleo e saili ia le alii o Alex, le pasese a Tariano, ae peitai, sa le’i mauaina o ia.  Ma na ta’ua mai foi e tagata o le nu’u, e le o toe nofo i Avaio.

O moliaga na faia faasaga ia Tariano, na aofia le Aveta’avale fa’asua’ava, faapea ma le Aveta’avale le fa’autauta na manu’a ai se tagata.  O nei moliaga, o ni vaega ‘A’ i solitulafono mama, e mafai ona nofosala ai i le falepuipui, e o’o atu i le ta’i tausaga, po o ni sala tupe e ta’i $1,000; po o faasalaga uma e lua.

E $1,000 sa fa’atulagaina e mafai ona tatalaina ai le na molia mai i le falepuipui, e faatalitali ai lona faamasinoga.