TALA I VAIFANUA

Pago Pago - AMERIKA SAMOA

FA’AMANIINO MAI E SATIA IA LE TAUALUGA O LE PAKETI 

Na toe suia e le susuga ia Satia Aokuso Satia, lea sa avea ma sui Faatonusili o le Ofisa o Paketi a le malo, ia se fuafuaga a le Ofisa o le Paketi, mo le fa’aitiitia o le paketi a le vaega o Faamasinoga, talu  ona taunu’u le tusi a le afioga i le Faamasino Sili ia Lealaialoa Michael Kruse, lea sa toe fa’amanatu mai ai i le Ofisa o Paketi le tu’u’ese’esea o malosiaga e tolu a le Malo.

I se ‘call memo’ sa tusia ia Me 15, 2025, sa faapea ona fa’alauiloa ai e le Malo o Amerika Samoa, le pa’u o lana taumatega o tupe aoina, mo le tausaga tupe e 2026, i le 23% - ma fa’amautu ai se taualuga e $135 miliona, pe a faatusatusa atu i le paketi e $165.9 miliona, i le tausaga 2025.  Ma faapea ona fa’atulagaina ai e le malo, ia le fa’aitiitia o paketi uma a ofisa taitasi.

O le taualuga o le tausaga tupe a le vaega o le Faamasinoga, e tusa ai ma le fa’aaliga mai i le ofisa o le paketi, e $3.29 miliona.

Ae peitai, i le talifuaitau mai a le afioga i le Faamasino Sili, i le ofisa o le Paketi, sa ia toe  ifaamanatuina mai ai i le ofisa o le paketi, e pei ona masani ai i tausaga ua tuanai, e pule lava le vaega ale Faamasinoga i le maualuga o le latou paketi, ona e fuafua i a latou tiute faatinoina.  

Ona tu’uina atu lea i le Maota Fono, e latou te Iloilo ia le fa’aagaga o tupe a le Faamasinoga, ae le o le Ofisa o le Paketi.

Sa ta’ua foi e Lealaialoa e faapea, o le Faamasinoga Maualuga, e pei lava o le Fono, e le o se lala po o se ofisa/matagaluega a le Faigamalo, e fa’atonutonu mai ai.  Ma e faapena foi, ona le mafai ona fa’atonutonu atu e le vaega o Faamasinoga ia le Faigamalo.

I sana tusi na tusia ia Me 27, 2025 sa faapea ona toe faamanino mai ai e le sui Faatonusili na iai, i le Faamasino Sili, le leai o se manatu a le latou ofisa e solivale le tutoatasi faavae o le vaega o Faamasinoga, po o le malosiaga a le Maota Fono.

Ae o na faamanino e Satia, o le fa’aaliga sa o’o atu i le ofisa a le faamasino sili, ua na’o na fa’apupula ai ni vaega e mana’omia ona soalaupuleina e le Faigamalo, a’o feagai ai ma le sailiga o ni fofo i tulaga faaletonu o iai tala o le tupe i le taimi nei.

Ma na ta’ua e Satia ia le fa’aaloalogia e lo latou ofisa o le tutoatasi o le vaega o faamasinoga ma le taua o lana vaega i totonu o le Faigamalo.  Ma o a ni suiga sa ta’ua e le Ofisa o le Paketi i lea fa’aaliga, na ta’ua e Satia, e le o faasino i le vaega o Faamasinoga, ma o le a fa’asa’oina lea tulaga.

Sa faapea ona fa’ao’oina atu foi kopi o le tusi a Satia, ile afioga i le Kovana Pulaali’i N. Pula, o le Peresetene o le Senate, le tofa ia Tuaolo M. Fruean, le Fofoga Fetalai o le Maota o Sui, le afioga Savali T. Ale faapea ma le Faatonu o le Faamasinoga Maualuga, le susuga ia Enele Seumanutafa.

LEAI SE FA’AALIGA MAI I LE FAIGAMALO A PULU-PULA E FAATATAU I LE SUI FAATONUSILI O LE TAOA

E leai se fa’aaliga ua maua mai i l e Faigamalo a Pulu ma Pula e tusa ai ma le filifiliga o le susuga ia Tafua Faau Seumanutafa, e avea ma sui Faatonusili o le Ofisa o Tagata Matutua (TAOA).

E pei ona lausilafia e le toatele o le atunu’u, o le susuga ia Seumanutafa, sa tuli sona fa’asalaga i le falepuipui feterale, ina faamaonia ona moliaga i taupulepulega e olegia ma gaoia tupe a le malo o Amerika, a’o avea o ia ma pule o le Ofisa o Faatauga a le Malo, i le vaitaimi o le Faigamalo a Tauese ma Togiola.

Na molia Seumanutafa, ina ua totogia sana kamupani mo meafale ma poloketi faufale, ae e le’i kilivaina pe na taunu’u nei poloketi.  Ma e ui ina sa molia o ia i moliaga feterale, ae peitai, sa faasalaina o ia i le faamasinoga lotoifale, mo le lua tausaga.

Sa le’i manuia se taumafaiga a le Samoa News, ina ia maua mai se faamatalaga mai i le Faatonusili a le TAOA, le susuga ia Paopao Kuresa po o le susuga ia Leonard Seumanutafa (le alo o Seumanutafa Tafua), lea o lo’o fa’auluulu iai le aufaigaluega a le faigamalo a Pula ma Pulu.  O le tali mai ia Paopao, ia tu’u sa’o fesili a lenei ofisa faasalalau, i tagata sa faia le faaiuga, e fa’afaigaluegaina ia Seumanutafa.

O le tausaga e 2013 sa faapea ona fa’amagalo ai e le afioga Togiola Tulafono, ia Seumanutafa mai i le falepuipui, a’o faamae’aina lana nofoaiga faalekovana.  Ona o lea tulaga, ua faapea ona toe fa’aleaogaina uma ai moliaga ma faasalaga a Seumanutafa Tafua, ma ua toe fa’atulagaina uma ai ona aia tatau, e aofia ai le toe agava’a e palota po o le faigaluega mo le malo.