Talosagaina e Lolo le fesoasoani a Amata e tusa ai ma a’afiaga o ogasami a Amerika Samoa

Pago Pago - AMERIKA SAMOA

Sa fa’ao’oina atu e le susuga ia Lolo Matalasi Moliga, lea sa avea ma kovana, ia sana tusi talosaga i le Afioga i le sui Faipule o Amerika Samoa i le Konekeresi, ia Uifa’atali Aumua Amata, e tusa ai ma le a’afiaga o ogasami a Amerika Samoa, i fuafuaga mo le maina ina o ogasami o lo’o lata mai i sami a le teritori, ma ua talosagaina ai e Amata ia lona ta’imua i taumafaiga e tali atu ai i kamupani mataitupe, e ono a’afia ai tagata o le atunu’u.

I le tusi a Lolo sa tusia ia Me 26, 2025, ua faapea ona ia fa’aalia ai lona matua’i fa’atu’i’ese i fuafua mo le maina ina o ogasami, ona e fa’atama’ia ai ‘amu, i’a ma figota o le sami ae le gata i lea, o alagamanuia o lo’o tatou fa’alagolago iai, aua lo tatou tamaoaiga faapea ma le tausiga o le soifuaga o tagata.

Ma sa ia ta’ua ai lona fa’ao’oina atu o se tusi i le Afioga i le Kovana Pulaali’i N. Pula, na tusia ia Me 1, 2025, e fa’ailoa atu ai lona fa’atu’i’ese i lenei mataupu.

O lo’o silafia e Lolo le feagai ai o le teritori ma se finauga uma ma le faigata, aua le puipuiga ma le faasaoina o le kamupani tu’u ‘apa, se tasi o aseti mo le atina’eina o le tamaoaiga, i totonu o le teritori. 

Na ta’ua e Lolo, i lana tusi sa auina atu i le kovana, sa ia fa’amamafaina ai le a’afiaga o lenei gaioiga o le maina po o le eliina, o ogasami loloto, o lo’o faapea ona fa’alagolago iai Amerika Samoa, e le gata i nei vaitaimi ae faapea le lumana’i.

AMATA:  O LE FINAGALO LAVA O TAGATA, OU TE TU AI!

I sana fa’aaliga i le aso Lua, Iuni 3, 2025, sa fa’aalia mai ai e le Afioga i le sui Faipule ia Amata, ia lona tu fa’atasi ma tagata o Amerika Samoa.

Sa ta’ua ai e Amata e pei ona sa lomia i le Samoa News, i le aso ananafi, e faapea, “O le finagalo lava o tagata, ou te fa’amuamua, ma ou te tu fa’atasi ma i latou. E sili ona taua ia te i tatou o tatou sami ma eleele, e afua mai i le iliti tai e o’o atu i le tuasivi, o lo tatou tofi lea mai le Atua.”

“E leai so tatou loto ina ia o’o mai ni Faiga e leaga ai o tatou fanua,” o a Amata lea.  “Faapei ona ou faalauiloa faalauaitele atu, ina ua mae’a le fa’asalalauga mai i le Matagaluega o le Initeria, out e le lagolagoina le fa’aaogaina o tekenolosi faa-on po nei, e valusia pe ave’ese pe ‘eli ai le iliti tai o lo’o tau lata i o tatou motu e sili ona matagofie.”

Sa fa’aalia e Amata le “fou i le toatele o nai o tatou tagata ma ua a’afia ai o latou finagalo, i lenei mataupu e uiga i minarale aoga mai le sami.”

Ma o lea, e pei ona sa ia fa’aalia mai, “E ao lava ona tatou faia ni faaiuga faautauta e faavae i luga o mau ua maua mai ae faia lava e tusa ai ma finagalo o tagata o Amerika Samoa!”

Ua fa’alauiloa mai e Amata, lona fesiligia o le DOI e tusa ai ma “laasaga o le a uia ma le itu aso latou te feiloa’i ai ma ta’ita’i o Amerika Samoa.”

“E atugalu fo’i so’u taofi i a’afiaga o nai o tatou tagata ma lo ta siosiomaga i le ‘eliga o nei minerale aoga,” o a Amata lea.

O lo’o loma nei se feiloaiga a Amata ma le Failautusi o le Initeria, ia Doug Burgum, ina ia “faamanino mai lo latou faamoemoe.”