TALA I VAIFANUA

Pago Pago - AMERIKA SAMOA

TAGI FAASAGA I SE TULAFONO A TRUMP E TATALAINA AI FAIGAFAIVA I OGASAMI FAASAINA O LE PASEFIKA

Ua i luma nei o faamasinoga ia se tagi a i latou o lo’o naunau i le puipuiga o le siosiomaga, e faasaga i se tulafono ua mae’a ona sainia e le Peresetene a Amerika, ia Donald Trump, e ave’esea ai puipuiga fa’atulafonoina, mo ogasami faasaina a le Pasefika (Pacific Islands Heritage Marine National Monument), lea e ono tatalaina ai ogasami a le Pasefika i tulaga pagatia ona o faigafaiva faapisinisi.

O ogasami faasaina sa faavaeina e le alii Peresetene o George W. Bush, i le tausaga e 2009 ma e aofia ai le 500,000 maila (sq miles) o ogasami o le Pasefika.  Sa faapea ona toe faalauteleina e le alii Peresetene o Barack Obama lea fa’asa, i le tausaga e 2014.

Ae peitai, ia Aperila 17, na faapea ona fa’ao’oina atu ai e le Ofisa o Faigafaiva (U.S. National Marine Fisheries Service) a Amerika, ia sa tusi i kamupani o lo’o umia pemita faigafaiva, e fa’ataga ai faigafaiva mo pisinisi tetele i ogasami faasaina, e ui lava o lo’o fa’aauau pea ona fa’amalosia ia le sa i ogasami o le Pasefika.  O se vaega lea o le tagi fa’asaga i le faigamalo a Trump, e pei ona faila i totonu o le faamasinoga feterale i Honolulu, i le aso Tofi o le vaiaso ua mavae.

Tolu aso talu ona tufatufaina le tusi fa’ataga, ae amata ona fagotaina ia ogasami faasaina, e pei ona ripotia mai e le vaega a le ‘Earthjustice’, lea sa mataituina ia fagotaga i totonu o ogasami faasaina.

E leai se faamatalaga na maua mai i le Ofisa o Faamasinoga, i le aso Faraile.

O lo’o aofia i totonu o le tagi, o le a le gata i i’a, ae o le a faapea foi ona pu’eina e va’a fagota tetele ia laumei, o i’a sa faapea ma manu.

Sa ta’ua e le loia a le ‘Earthjustice’, o David Henkin, o le a latou le nofonofo ae tatalaina e le faigamalo a Trump ia va’a fagota o le a faaleagaina ai ogasami fa’asaoina a le lalolagi.  

FEILOAIGA A AMATA MA TAMA MA TINA MATUTUA O LE ATUNU’U (TAOA)

Sa fa’aalia e le sui Faipule a Amerika Samoa i Uasigitone, ia Uifaatali Aumua Amata, ia lona agaga fa’afetai i tama ma tina matutua na mafai ona auai atu i sa latou fonotele na faia i le nofoaga autu a le TAOA, i Tafuna.

Sa ta’ua e Uifaatali lona agaga faafetai i tama ma tina matutua.  Ma ia ta’ua le taua o o latou manatu e tusa ai ma mataupu, e mafai ona fa’ao’oina atu i le laumua i Uasigitone.  

Na fa’aleoina foi e Uifaatali ia lona agaga fa’afetai i le Faatonusili o le TAOA, ia Paopao Kuresa Paopao, ona o le avanoa sa mafai ona ia feiloai atu ai i tama ma tina matutua, mo le soalaupuleina o le tele o mataupu. 

Ma na ia ta’ua foi le iai o se fuafuaga, mo le fa’aauauina o nei ituaiga fonotaga.

Na saunoa Uifaatali e tusa ai ma sana tusi i taitai e fa’atatau i le polokalama mo taumafa ma auala e mafai ona fa’aleleia atili.  E le gata i lea, o le tele o nisi mataupu, na aofia ai penefiti o le Saogalemu, Medicare, pepa taumafa, o le si’itia o vaegatupe mo polokalama mo le tausiga o tama ma tina matutua, o vaegatupe mo polokalama faigaluega mo tama ma tina matutua faapea ma ni isi lava polokalama.