Ono tapunia ia le Polokalama o le ‘Job Corps’ e le Ofisa o Leipa (USDOL)

Pago Pago - AMERIKA SAMOA

Na ta’ua e Vaituutuu Areta, lea e galue i le ofisa o le polomalama a le Job Corps’ i Maui, le aofia o la latou polokalama i se lisi o ofisa o le a tapunia e le Ofisa o Leipa (USDOL).

O le Job Corps, o se polokalama o lo’o faapea ona auai atu ai fanau aoga a Amerika Samoa, i Waimanalo ma Maui, i lalo o se maliliega le tumau (MOU-Memorandum of Understanding).

O le ulua’i sui mai Amerika Samoa na faapea ona auai atu i lea polokalama, ona o le maliliega i le fa’ai’uga o le 2023, a’o avea le afioga Lemanu P.S. Mauga ma kovana.  Lea na ia ta’ua ai le avea o lenei avanoa ma se auala taua mo fanau aoga e saili ai a latou ala i ni galuega mo le lumanai.

O lenei polokalama sa mua’i fa’alauiloa i Amerika Samoa i le 1997, i lalo o le taitaiga a le Fofoga Fetalai i lena vaitaimi, le afioga Nua Saoluaga, lea sa filifilia e le susuga ia Afimutasi Gus Hannemann (lea ua fa’ilagi le folauga), e na te mataituina ia mataupu tau i le malo feterale, ma le fa’avaeina o le polokalama (Job Corps) i totonu o le teritori.

Ma talu mai lena tausaga, ua toatele fanau aoga a Amerika Samoa ua fa’amae’aina mai a latou tapenapenaga i le polokalama a le ‘Job Corps’ i Hawaii, ae o nisi sa auai atu i lea lava polokalama i isi setete.

Na ta’ua e Areta, lea o lo’o galue i le ofisa tutotonu a le polokalama i Maui, o le masina o Mati sa fa’aleaogaina ai e le Ofisa o Leipa (DOL) ia le konakarate ma le kamupani o lo’o gafa ma le su’esu’eina o tala’aga o soifuaga o fanau aoga ua faamoemoe e auai atu i lenei polokalama.

Ma ua avea lea ma tulaga ua taofia ai le toe taliaina o nisi i totonu o lenei polokalama.  E 12,000 fanau aoga o lo’o fa’atalitali mo le taliaina i totonu o le polokalama.

Ma e leai se fa’ai’uga ua faia e tusa ai ma le lumana’i o lenei polokalama (Job Corps),

Sa ta’ua e Areta, ia lo latou fa’aauau pea ona faia mea uma e mafai ai ona fa’aauau lenei polokalama, e aofia ai ma lo latou galulue faatasi ma le Asosi o ‘Job Corps’ Faavaomalo ma isi ofisa.

E leai se fa’aaliga aloa’ia ua maua mai mai i le ofisa a le kovana, e tusa ai ma le tulaga o lenei polokalama i totonu o Amerika Samoa ma e le o mailoa i le taimi nei, po o ai o lo’o mataituina le fa’aulufaleina o fanau aoga i totonu o lenei polokalama i totonu o le teritori.