O TEINE E TO’ATOLU MA LE TAMA NA LEILOA

Vaega e 14

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aiuga o le tatou Fagogo, “O TEINE E TO’ATOLU MA LE TAMA NA LEILOA” i lona vaega e 14.

***********************************************

O se pati tele sa tu’ufa’atasia e le ulugalii mau’oa e sami ai le toe fo’i manuia atu o le la tama, lea na to’esea talu ona 12 ona tausaga.

Sa faatumulia le maota o le ulugalii mau’oa i tagata o le nu’u sa lolofi atu e molimauina le toe taliu manuia mai o le alii talavou ae le gata i lea, o le fia va’ai i le tamaitai lototele sa mafai ona toe aumaia le atalii a le ulugalii mau’oa.

Na fa’afaigata ona iloa pe sili atu le fiafia o le ulugalii mau’oa i le toe fo’i mai o le la tama, po o le fiafia a le ulugalii gaosi falaoamata i le leai o se mea na tupu i si o la alo tamaitai na mafua ona toe fo’i mai ai le alii talavou.

Sa leai se mea na taofia e le ulugalii mau’oa mai i le afafine a le alii gaosi falaoamata, ae ua fafa leisi fa’afetai i luga o leisi foa’i.

I le ogatotonu o le fiafia tele, sa liliu atu ai loa le tamaloa mau’oa ma fesiligia le teine pe na faapefea ona ia mauaina lona atalii.

O le taimi lea na se’i ifo ai loa e le teine ia lau la’au e lua ia sa sau ma ia mai i le togavao lanu auro ma le togavao lanu siliva, lea na ia mulimuli atu ai i le alii talavou.

Ina ua va’aia e le alii talavou ia nei lau la’au e lua, sa ia ata leotele ma ia faapea atu i le teine, “Oi, na e taumulimuli atu ia te a’u?”

Sa faapea atu le atalii o le alii mau’oa i le teine, “O e iloa o nei laula’au e mafai ona gaosia ai se fale tele ma le matagofie mo ta’ua?”

Na a’apa atu le atalii o le alii mau’oa ma ia u’u mai laula’au nei e lua ma togi i fafo o le fa’amalama ma sa faate’ia tagata uma, ina ua tu mai se fale e pei o se maota o se tupu, le tele ma le matagofie.

Na liliu atu loa le atalii o le alii mau’oa i le ulugalii gaosi falaoamata ma fai loa lana fa’amalamalamaga ina ia mafai ona o la nonofo ma le la tama teine laititi.

[SAUNI MAI I LE VAIASO FOU MO LE TATOU FAGOGO FOU]