Fasi e se tamaloa ia lona to’alua tausima’i i le LBJ

Pago Pago - AMERIKA SAMOA

O le aoauli o le aso 15 o Mati, 2025 na maua ai e le Ofisa Leoleo i Fagatogo, ia se valaau mai i se leoleo po a le falemai i Faga’alu ma se ripoti e uiga i se tausimai o lo’o masalomia na sauaina e lona to’alua a’o faigaluega.

Sa faapea ona agai atu leoleo i le falemai ma talanoa ai ma le leoleo po, lea sa ia faamatalaina auiliili i leoleo le valaau atu o le Medical Ward ina ua alu ‘ese le na molia, i le 6:00 i le afiafi.

Na faapea ona taitai atu e le leoleo po ia leoleo i le mea sa iai le tina na a’afia mo le fa’atalanoaina o ia.

Sa faamatalaina e le tausima’i na a’afia, ua toeititi atoa le vaiaso o la pisa ma lona to’alua ma ua o’o ai lava ina sau i le falema’i (le mea o lo’o faigaluega ai le tina na a’afia) e la te pisa ai.  

Na ta’ua foi e le tina na a’afia le lauina o ia e lona to’alua (le na molia) i ni igoa ma lona aveina o lana (tausimai) telefoni ae musu e toe fa’afo’i atu.

O le na molia po o le to’alua a le tausima’i sa a’afia, o le susuga ia Vili Taufaina.

Sa faamatalaina e le tausimai na a’afia le le lava o lona onosa’i i le lauina atu o ia e lona to’alua ma le musu e alu ‘ese ma le falemai, na ia (tausima’i) taumafai ai e tu’i le na molia, ae misi.

Ae tu’i mai o ia e le na molia ma tau i ona foliga ma o la fufusu ai, ae feosofi mai nisi o lana aufaigaluega i le vaovao le la misa.  Sa faapea ona togi ai e le na molia ia lana telefoni i le pa sima ma palauvale atu ia te ia.

Sa ta’ua e le tausimai lona fa’ato’a lagonaina o le tiga o lona mata tauagavale ma le ma’osia o lona lima, ina ua alu ‘ese le na molia.  Sa faapea ona aveina e leoleo ia le tausima’i na a’afia ma se tasi e la te galulue faatasi, lea na avea ma molimau, i le ofisa a leoleo i Fagatogo, mo le fa’aauauina o a latou su’esu’ega.

Ina ua mae’a, sa faapea ona taofia le tausimai na a’afia, i le falemai mo le togafitiga o ona manu’a.

Ae ua agai atu leoleo mo le sailiga o le na molia, ae peitai, sa le’i mauaina o ia i le taimi lena.  I le 8:12 i le po, sa fa’ailoa atu ai e le tausima’i na a’afia, i leoleo, le toe fo’i atu o le na molia, i lona fale.  Ma sa mafai ona o’o atu leoleo ma lokaina mai ai le na molia.

E le o aofia i totonu o fa’amaumauga a le fa’amasinoga ia se faamatalaga a le na molia.

Ae o ona moliaga, na aofia ai le Faatupu Vevesi i nofoaga faitele faapea ma le Fa’ao’olima i lona tulaga e tolu.

O le moliaga o le fa’atupu vevesi, o se moliaga i le vaega ‘B’ i solitulafono mama, e mafai ona nofosala ai i le falepuipui e o’o atu i le ono masina, po o se sala tupe e $500; po o faasalaga uma e lua.

O le moliaga o le Fa’ao’olima i lona tulaga e tolu, o se vaega ‘A’ i solitulafono mama, e mafai ona nofosala ai i le falepuipui, i le o’o atu i le tausaga, po o se sala tupe e $1,000 po o faasalaga uma e lua.

E $1,000 se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.