O TEINE E TO’ATOLU MA LE TAMA NA LEILOA

Vaega e 13

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le soso’oga o le tatou Fagogo, “O TEINE E TO’ATOLU MA LE TAMA NA LEILOA” i lona vaega e 13.

****************************************************************

Sa gata mai le tatou Fagogo i le vaiaso ua mavae ina ua fiu le alii mau’oa e fa’atalitali le sau o le afafine laititi a le tamaloa gaosi falaoamata, i le taeao na soso’o ai, e fai sana ripoti i le mea na tupu i le po, i totonu o le potu lea e fefefe tagata o le nuu faapea ma ana auauna, e nonofo ai i le po ona o le pa u o le potu.

Ia manatua, o le afafine lona tolu lea ma le ui’i, a le tamaloa gaosi falaoa mata, ua alu atu e taumafai e saili le tali o le tupua i le mea o tupu i totonu o lea potu i po uma.

Ina ua lelava loa le alii mau’oa e fa’atalitali le teine, sa tu loa i luga ma savali atu i le potu.

Sa fa’ate’ia o ia ina ua ia ulu atu i totonu o le potu, o lo’o saofa’i mai le teine i tafatafa o le fa’amala, ae o luga o le moega o lo’o moe ai se alii talavou.

Ina ua latalata atu le alii mau’oa i le moega, sa matua’i te’i lava lona loto, ina ua ia va’ai atu, o lona atalii lea na leiloa fa’afuase’i i le 12 o ona tausaga, lea o lo’o taoto mai i luga o le moega.

Ae o le taimi lea na ala a’e ai i luga le alii talavou ma ia saofa’i mai i luga, ae ua oso atu le alii mau’oa ma opo mai o ia ma tagi lotulotu ai i lona tau’au.

Ua logo e le alii mau’oa lona to’alua e a’u iai le tala fiafia ma fa’atonuina loa ana auauna ina ia tapena se aiga tele e sami ai le tala fiafia, i le toe fo’i mai o lona atalii.

Ua salalau le tala fiafia i le atunu’u atoa, i le toe fo’i mai o le atalii a le alii mau’oa ma le afafine a le ulugalii mau’oa sa fesoasoani i le toe fo’i mai o le alii talavou.

Ua lolofi uma mai tagata o le atunu’u i le maota o le alii mau’oa e latou te molimauina lenei vavega ofoofogia.

Sa faapea foi ona o mai ai ma matua o le teine, ma ona uso.  Ae ua mae’a ona fa’atonuina e le alii mau’oa ia ana auauna ina ia taliaina so’o se tasi e fia ‘auai mai i le aiga fiafia ua faia.

[E FAIA PEA]