POU TIUTE A LEOLEO

Pago Pago - AMERIKA SAMOA

FA’ALEAGAINA E LE AUFAIGALUEGA IA LE OFISA INA UA LE TOTOGIA

E tusa ai ma fa’amaumauga a le faamasinoga, o lo’o ta’ua ai le molia o le susuga ia Anaconda Luteru, ina ua o’o atu se tamaloa i le Ofisa a Leoleo i Fagatogo ma ripotia le gaoia o lona ofisa.

Ae i su’esu’ega a leoleo, sa fa’amaonia ai le mafua’aga o le gaoia o le ofisa, ona o se fe’ese’esea’iga i le va o le pule o le ofisa ma nisi o lana aufaigaluega ona o tulaga i totogi a le aufaigaluega.

E pei ona ta’ua i totonu o fa’amaumauga a le faamasinoga, i le aso 17 o Fepuari, sa osofa’ia ai e Luteru ia le ofisa i le Tedi i Fagatogo ma gaoia ai se meafaigaluega (wrench).

Ae o le aoauli o le aso 20 o Fepuari, na o’o atu ai le pule o le ofisa i le Ofisa a Leoleo i Fagatogo e ripotia le osofa’ia o lona ofisa,

Sa faamatalaina e le e ana le ofisa, ina ua mae’a sana galuega i fafo o le Tedi, sa ia toe fo’i atu i lona ofisa ma ona va’aia ai ua malepe le faitoto’a o lona ofisa.

O seisi taimi mulimuli ane na toe osofaia ai foi lona ofisa.

Ma sa faapea ona alu atu ia Luteru ma fa’afefe o ia i le oti pe a le avatu se tupe.  Sa ta’ua e le e ana le ofisa na osofa’ia, lona va’aia o u’uina i le lima a Luteru ia le mea faigaluega (wrench) lea sa teu i totonu o lona ofisa.

Sa tuli’eseina e le e ana le ofisa ia Luteru, mai lona ofisa.

O le taeao o le aso 21 o Fepuari, sa toe feiloa’i ai leoleo ma le na a’afia mo le toe fa’aauauina o a latou su’esu’ega ma talosagaina ai e leoleo le fia o’o atu i lona ofisa.  Ae peitai, sa mana’o le na a’afia e tolopo le o’o atu o leoleo ona o lea na fa’ato’a mae’a ona toe fa’aleleia lona ofisa.

O se taimi mulimuli ane, na agai atu ai leoleo i le Faamasinoga Fa’aleitumalo ma talosagaina ia ata vitio o lo’o iai le na molia ma le mea faigaluega sa gaoia.  

O le aso 22 o Fepuari na mafai ona o’o atu ai leoleo i le ofisa a le na a’afia ma mafai ona fa’aauauina le latou su’esu’ega.

Ae I le aso 24 sa mafai ona o’o atu ai Luteru i le ofisa a leoleo mo sana faamatalaga e tusa ai ma le faalavelave na tupu.

Ma e tusa ai ma lana faamatalaga, o le mafuaaga na ia osofa’ia ai le ofisa a le na a’afia, ona o le aso Toonai sa o latou fa’amamaina ai ma nisi o ona tausoga ia le ofisa a le na a’afia.  Ae na fai atu le na a’afia, e fa’ato’a maua le latou totogi i le aso Gafua.

Ae peitai, ina ua o latou o atu e aumai le latou totogi i le aso Gafua, o lo’o fai se inuga a le na a’afia ma nisi o lana aufaigaluega.  Ina ua fai atu le na molia i le latou totogi, ae na tago le na a’afia i le tutuli ‘ese latou ma fa’asa i latou ona toe o’o atu i le ofisa.  

Ma na ta’ua e Luteru le fa’ailoa atu e le na a’afia, e le maua se latou totogi.  O le mafua’aga lea na o latou talepeina ai le faitoto’a o le ofisa a le na a’afia ma fai atu i le na a’afia e sau i fafo, ae na valaau e le na a’afia ia leoleo.

O moliaga na fa’asaga ia Luteru na aofia ai le Solivale o fanua e aunoa ma se fa’atagana, o le Faaleagaina o meatotino i lona tulaga e lua, o le Faomea i lona tulaga e lua ma le Fa’ao’olima i lona tulaga e tolu.

O le moliaga o le solivale o le fanua, o se vaega ‘B’ i solitulafono mama, e mafai ona nofosala ai i le falepuipui, e le silia ma le ono masina, po o se sala tupe e le silia ma le $500; po o faasalaga uma e lua.

O le moliaga o le fa’aleagaina o meatotino, o se vaega ‘A’ i solitulafono mama, e mafai ona nofosala ai i le falepuipui, i le ono masina, po o se sala tupe e le silia ma le $500; po o faasalaga uma e lua.

Ae o moliaga o le Faomea o se vaega ‘C’ i solitulafono mamafa, e mafai ona nofosala i le le silu atu ma le fitu tausaga, po o se sala tupe e le silia ma le $5,000; po o faasalaga uma e lua. 

O le Fa’ao’olima o se vaega ‘C’ i solitulafono mama, e mafai ona nofosala i aso e sefululima, po o se sala tupe e le silia ma le $300; po o faasalaga uma e lua.

E $10,000 na fa’atulagaina e mafai ona tatalaina ai le na molia mai i le falepuipui, e faatalitali ai lona faamasinoga.

FAAMAONIA I SE ATA VITIO IA LE OSO O SE TAMAITAI I LONA TINA

O le po o Mati 8, 2025 na agai atu ai leoleo i le fale o se aiga na valaau mai ona o se misa i le va o se tina ma sona alo tamaitai.

Ina ua taunu’u leoleo i le fale o le aiga na tupu ai le faalavelave, sa mafai ona talatalanoa ma le tina na a’afia.  Sa fa’aleoina e le tina a’afia i lona alo tamaitai, o Aomalu Niue (le na molia) ia sona popolega ona o le tele o tama i totonu o le latou fale, aemaise o lo’o iai fanau teine a lana fanau.

Ae peitai, sa fa’aalia uiga le fiafia a Aomalu ma le ano mai i le fa’atonuga a lona tina.  Ma sa fai atu foi i lona tina, e leai sana feau.

O le afiafi lava lea, ina ua mae’a le lotu a le aiga, sa alu atu ai le na molia i le fale, ae o lo’o talanoa lona ‘niece’ ma sona ‘aunt’ i luga o le telefoni.  O lona ‘aunt’ e nofo i atunu’u i fafo.  Ae alu atu le na molia ma faatonuina lona uso sa i luga o le telefoni, e faamatala i lo la tina ma le aiga ia le la faigauo ma le to’alua a le na molia.

Sa faapea ona oso atu le tina ma faatonu le na molia, e soia ae savali ai le na molia i le faitoto’a pito i tua o le fale, a’o faia pea le la finauga ma lona tina.

Ina ua taunu’u le na molia i fafo, sa faapea ona ia palauvale mai i lona tina ma u’una’i mai le faitoto’a i lona tina.  Ona ia tago lea i le u’u le ofu a lona tina ma feanu mai i ona foliga.

Sa faapea foi ona tu’iina e le na molia ia lona tina i le gutu ma taumafai e titina lona tina.  Ma na faapea ona a’apa atu le tina na a’afia ma u’u mai se la’au ma tai ai le na molia, ma tau i lona muaulu.  O iina na tu’ua ai loa e le na molia ia le fale, ma le toe fo’i atu.

Sa molimauina e le ‘niece’ na iai i le taimi na tupu ai le faalavelave ia mea uma sa tutupu ma ia fa’amaonia le molimau a le tina na a’afia.

Na ta’ua e le ‘niece’ lona talatalanoa ma lona ‘aunt’, lea o lo’o i atunu’u i fafo, i luga o le telefoni, ae alu atu le na molia ma fa atu ni faamatalaga le talafeagai.  Ma sa taumafai le tina na a’afia e fa’ato’ato’a le mataupu, ae peitai na oso mai iai le na molia ma faamapuni le gutu o lona tina.

Ina ua tu’ua e le na molia ia lo latou fale, sa ia fa’ailoa mai i lona aiga, o le a ia faamatalaina i le lalolagi atoa le mea sa tupul

O le po lava lea e tasi, na vala’au mai ai se tausima’i mai i le falemai a le LBJ, i le ofisa a leoleo, e ripotia mai iai se gasegase e foliga mai, sa sauaina e se tagata.

Na faapea ona agai atu iai leoleo mo le fa’ataunu’uina o a latou su’esu’ega ma iloa ai, o le tamaitai lea na a’afia i le faalavelave o lo’o ta’ua i luga.

I le faamatalaga a le na molia, i leoleo, e masani ona tu’ua’ia o ia e lona tina i mea e na te le’i faia.  Sa ia fa’amaonia le tupu o se vevesi i lo la va ma lona tina, lea na ia u’una’ia ai le faitoto’a ma tau i lona tina.  Ma le ta ina o lona ulu e lona tina, ae na te le’i tu’ua le latou fale ma alu atu i le falemai e togafitia lona manu’a.

Sa taulimaina e leoleo ia se ata vitio o le faalavelave na tupu i le fale o le aiga ma fa’amaonia ai fa’amatalaga uma a le tina na a’afia.

E le’i ta’ua i totonu o fa’amaumauga a le faamasinoga pe sa ave faapagotaina ia le na molia.

Ae o ona moliaga, na aofia ai le Faatupu vevesi i totonu o lona aiga, Fa’ao’olima i lona tulaga e tolu (faitauga 2 & 3).

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui, i le o’o atu i aso e 15, po o se sala tupe e $300; po o faasalaga uma e lua.

O moliaga o le fa’ao’olima, sa aofia ai le moliaga i le vaega ‘A’ i solitulafono mama ma le vaega ‘C’ i solitulafono mama.

O le moliaga i le vaega ‘A’, e mafai ona nofosala ai i le falepuipui mo le tausaga atoa, po o se sala tupe e $1,000 po o faasalaga uma e lua.

Ae o le moliaga i le vaega ‘C’ o solitulafono mama, e mafai ona nofosala ai i le falepuipui i le o’o atu i aso e 15, po o se sala tupe e $300; po o faasalaga uma e lua.

E $500 se vaegatupe ua mae’a ona fa’atulagaina, e mafai ona tatalaina ai le na molia, e faatalitali ai lona faamasinoga.

MOLIA SE AVE TA’AVALE I SE FA’ALAVELAVE NA TUPU I SATALA

O le taeao o le aso 7 o Ianuari, 2025 na o’o atu ai se tamaloa i le Ofisa a Leoleo i Fagatogo, e ripotia se fa’alavelave tau ta’avale na tupu i Satala i autafa o le uafu va’a a le malo, i le aso 6 o Ianuari.

E tusa ai ma fa’amaumauga a le faamasinoga, e to’atolu ni tagata sa a’afia i lea fa’alavelave.

Na amata su’esu’ega a leoleo e ala i le fa’atalanoaina o se tasi na a’afia i le fa’alavelave ma sa molimauina ai e leoleo ia ona manu’a i ona foliga, lima, pui manava ma lona tulivae.

Sa faamatalaina e le na a’afia, e iai ma nisi alii se to’alua na manunu’a i le fa’alavelave i luma o le lotoa a le uafu va’a a le malo i Satala.

Na ta’ua e le na a’afia e faapea, ina ua mae’a se fono a le latou aufaigaluega, na amata loa ona tapena a latou mea faigaluega ma o latou agai atu loa i Fagatogo .

O le latou supavaisa, le susuga ia Iakopo Sione (lea na molia), sa fa’afoeina se ‘flatbed’ agai atu i fafo o le pa, a’o lo’o nofo seisi alii (lea foin a a’afia i le faalavelave), i luga o se pakeke lanumoana, e aunoa ma se pa puipui.

Ina ua i luga o le auala ia le ta’avale, sa amata ona fa’asaoasaoa e le na molia ia le ta’avale ma sa pa’u’u uma ai i latou e to’atolu, mai luga o le taavale.

Sa fa’aauau ona faamatala e le na a’afia, sa iai foi nisi o mea faigaluega i luga o le ta’avale, na aofia ai ia se masini uela ma se siaki (pallet jack) na pa’u’u uma mai i luga o le taavale, ona e le’i fa’amaumauina i luga o le taavale.

Na aveina atu uma ia alii e to’atolu na a’afia, i le falema’i mo togafitiga.

O le alii muamua na manu’a lona muaulu, o ma’osia i lona tualima taumatau ma puimanava tauagavale faapea ma lona tulivae tauagavale.  O leisi alii sa a’afia lona tua ma lona tualima tauagavale, ma lona ua.

Sa le’i maua se fesootaiga a leoleo ma le alii lona tolu na a’afia.

O moliaga na faia fa’asaga ia Sione, sa aofia ai le Aveta’avale le fa’aeteete na manu’a ai se tagata, o le Aveta’avale le fa’aeteete faapea ma moliaga o le ‘Vehicle Load’.

O le moliaga o le aveta’avale le fa’autauta na manu’a ai se tagata, o se vaega ‘A’ i solitulafono mama, e mafai ona nofosala i le falepuipui i le tausaga atoa, po o se sala tupe e le sili atu ma le $1,000; po o fa’asalaga uma e lua.

O le moliaga o le aveta’avale le fa’autauta, o se vaega ‘B’ i solitulafono mama, e mafai ona nofosala ai i le falepuipui, e le silia ma le ono masina, po o se sala tupe e le silia ma le $500; po o fa’asalaga uma e lua.

Ma le moliaga o le ‘Vehicle Loads’, o se vaega ‘B’ i solitulafono mama, e mafai ona nofosala ai i le falepuipui, i le le silia ma le ono masina, po o se sala tupe e le silia ma le $500; po o faasalaga uma e lua.

E leai se vaegatupe na fa’atulaga sa ta’ua i totonu o le faamaumauga a le faamasinoga.