Tali atu Fiame i se vala’au mo le toe faia loa o le palota a Samoa

Apia - SAMOA

I sana taumafaiga lata mai nei ina ia fa’atula’i ‘ese ia le Palemia o Samoa, le afioga Fiame Naomi Mata’afa, ua faapea ona uia ai e le vaega a le FAST (Faatuatua i le Atua Samoa ua Tasi), a ala o le tulafono ina mafai ona toe faia ai se palota, i se taimi lata mai.

Ae peitai, ua fa’aalia mai e Fiame, i sona talitonuga, e le pasia e le palemene lea fuafuaga.

Ua fa’aalia mai e le taitaifono a le FAST, le afioga La’auli Leuatea Schmidt, lea sa fa’atula’i ‘ese mai i le tofiga o le Minisita o Fa’ato’aga ma Faigafaiva, ia Ianuari, ua liliu nei la latou Vaega i se fa’ai’uga mai i le Faamasinoga Maualuga, pe ua tonu ma sa’o i ala o le Tulafono, ona fa’aauau ona avea Fiame ma ta’ita’i o le malo, ona e toaititi lana vaega.

E pei ona sa fa’asoa atu La’auli i le vaega fa’asalalau a le RNZ Pasefika, e le talafeagai ai ma tulaga o le Tulafono lenei mea ma ia fesiligia ai pe iai seisi lava vaega o le lalolagi e tupu ai lea tulaga.

Na saunoa La’auli, ua tatau ona fa’ata’ape le Palemene i se taimi lata mai ma toe tu’u tu’u mai i luma le palota ina ia mafai ona fofoina to’afilemu le fa’afitauli faapolokiki o le tupu nei.

Ae peitai, ua tali mai Fiame ma ia fesiligia, po o le a le fa’afitauli.  Na saunoa Fiame, o lo’o gaioi le malo ma atonu o lo’o finagalo iai La’auli (i le palota lata mai) ae peitai, e fa’ato’a tupu lea tulaga pe a toe potopoto le Palemene.

Ma na fa’aalia foi e le tamaitai palemia le le fa’ate’ia i lenei taumafaiga fou, ma ia ta’ua e faapea, e na’o le pau lava le auala o le a mafai ai ona faia le palota i se aso lata mai, e pe a ioe iai le Itu Agai.  Ma o le taimi nei, i sana tagataga’i iai, e le tupu lea tulaga.

Sa te’ena e La’auli lea manatu ma ia faapea mai, e le mafai ona fa’atuatuaina ia le taitai o le Itu Agai (HRRP) le afioga Tuilaepa Sailele Malielegaoi.  Ma e le popole ai foi La’auli pe ioe pe leai, ona e le o atoa le latou fuainumera.

NA FAAPEFEA ONA O’O MAI SAMOA I LENEI TULAGA?

Na mafua ona tula’i mai lenei faafitauli i totonu o Samoa, ina ua ta’ape ia le itu a le FAST ia Ianuari, lea na fa’ate’a ai e Fiame ia La’auli ma nisi o minisita a le FAST mai i lana Kapeneta.

Ona liliu mai lea o La’auli ua fa’ate’a ‘ese Fiame mai le vaega a le FAST, lea ua tutoatasi ai Fiame ma se vaega toalaiti o le malo.

O le Palemene e to’a 51 ona totino ma nofoa fa’aleoleo e lua mo tamaitai.

E to’a 20 le sui o le Palemene o lo’o i totonu o le FAST, e to’a 18 ia le HRPP ae to’a 15 ia Fiame, e aofia ai ma ia.

O sui lagolago a le Palemia, e aofia ai ni minisita tuto’atasi e lima, ma nisi o Palemia e to’aiva o lo’o i totonu pea o le FAST, ma i se vaaiga faalemafaufau, e to’a 29 sui o le FAST.

O lo’o fa’aauau pea ona u’una’ia e le itu a le FAST ia le tula’i ese o Fiame mai i le tofi Palemia ae ia tu’uina atu i le latou itu e fa’aauau ona umia nofoa fa’aletaitai, i lalo o se taitaiga fou.

Ae peitai, ua fa’alua ona manumalo Fiame mai taumafaiga e faatula’i ‘ese o ia, i lenei tausaga.

O lo’o fa’aauau pea ona taumafai le RNZ Pasefika e maua se fesootaiga ma Tuilaepa mo sona manatu e tusa ai ma lenei taumafaiga, i se palota lata mai.