Avea le auai atu o nisi i le faamasinoga o tagatanu’u a Amerika Samoa ma fa’amalosi’au

Anchorage - ALASKA

O le aso Faraile o le vaiaso ua mavae atu sa potopoto ai ni tagata i fafo o le fale faamasino i Anchorage, i le setete o Alaska, e fa’alia lo latou fa’amalosi’au i nisi o tagatanu’u o Amerika Samoa, o lo’o nonofo i le a’ai o Whittier, lea ua molia i le palota faasolitulafono, i se mataupu e ono a’afia ai se taumafaiga fa’avaomalo e maua ai e tagatanu’u o teritori a le Iunaite Setete ia sitiseni.

O lo’o ua molia e le setete o Alaska ia tagatanu’u o Amerika Samoa o lo’o nonofo i Whittier, i lo latou auai i palotaga i totonu o Amerika, e ui ina fa’asaina, ona o lo’o taofi le setete o Alaska, e le o ni sitiseni tagatanu’u o Amerika Samoa, ua na’o ni Nesionale, e leai ai so latou aia tatau e palota ai.

O tagata na fananau i motu teritori a le Iunaite Setete, e aofia ai Puerto Rico, Guam, Virgin Islands ma le atu Mariana, e avea i latou ma sitiseni.  Ae o tagatanu’u o Amerika Samoa, o lo’o ta’ua i latou o Nesionale a le Iunaite Setete.

O lea o lo’o finau ai le itu a le malo, sa ta’useseina e tagatanu’u o Amerika Samoa i Whittier ia o latou tagata.  O i latou ua molia, e amata mai i le ta’i 20 tausaga se’ia o’o atu i le 60 tausaga le matutua.  Ma o lo’o molia i latou i moliaga mamafa, e mafai ona nofosala ai i le falepuipui i le 10 tausaga.

O le aso Lulu, na pasia ai e le komiti o le a’ai a Whittier ia se I’ugafono e toe suia ai le faavae a le Setete, e fa’ataga ai ia tagatanu’u o teritori a le malo tele, ona palota i totonu o palota fa’ale setete ma le lotoifale.

Ose ulua’i taimi lenei ua faapea ona molia ai ni tagatanu’u o Amerika Samoa ona o le atunu’u sa o latou fananau mai ai, o se faamatalaga lea a Neil Weare, se tasi na fa’avaeina le ‘Right to Democracy’, lea o lo’o fesoasoani malosi i tagata o lo’o nonofo i teritori a le Iunaite Setete, e aofia ai Amerika Samoa.

O lo’o fesoasoani loia a lenei faalapotopotoga i le susuga ia Tupe Smith, o le tagatanu’u muamua a Amerika Samoa sa molia i le palota faasolitulafono.

Ma i le aso Faraile sa faapea ona potopoto atu ai le toatele o tagata Samoa, e fa’aali lo latou lagolagoina ma le fa’amalosi’au ia i latou ua molia i le tulafono.  Sa o latou faia se sauniga lotu, ma lagiina le vi’iga “Lo Ta Nu’u” ma o latou savavali fa’atasi i totonu o le fale faamasino.

Ae o le taimi lea, i totonu o se tasi o potu faamasinoga, sa tutula’i ai tagata e to’aiva o le aiga a le susuga ia Tupe Smith, ma fa’aleoina lo latou te’ena o moliaga ua faia faasaga ia i latou.

E to’atasi le na molia, sa le’i mafai ona auai atu i le aso Faraile ma o le vaiaso nei lea sa tula’i ai i luma o le faamasinoga e tali i ona moliaga.  E toatele nisi o i latou, o lo’o fa’aaogaina loia mo le mamalu lautele, ina ua le mafai ona totogia ni loia tua.

Sa toe tatalaina uma i tua latou ua molia.