Molia se alii i lona sauaina o se tamaloa i se koluse u’amea

Pago Pago - AMERIKA SAMOA

O le taeao o le aso 28 o Fepuari, 2025 na alu atu ai le susuga ia Gaupule Fulu, i le Ofisa o Leoleo i Fagatogo, o lo’o lavetoto ona lima ona o ni manu’a ma sa ia ripotia e faapea, na tatui o ia e se alii e suafa ia Paea Fifita.

Na faapea ona vala’auina le fesoasoani a le vaega o le EMS ma togifitia ai le na manu’a, i luma o le ofisa a leoleo.  Sa taumafai leoleo e sailiili le mafua’aga o lenei fa’alavelave, ae sa fa’afaigata ona e le gata i le faatinoina o tiute a le EMS ae o le fa’afaigata i le na manu’a ona tautala ona o le tiga o ona manu’a.

Sa faapea ona aveina le na manu’a i le LBJ mo le fa’aauauina o ona togafitiga, ae ua liliu sui malu o le malo mo le faia o a latou su’esu’ega, i aiga i tua o le paka o le fale meli, lea sa ta’ua e le alii ta’ita’i, na fa’asino aga’i iai le na manu’a.  Ma sa ta’ua e le ta’ita’i leoleo, o le alii na masalomia i le fa’atupuina o le fa’alavelave, o se tasi na lokaina muamua foi.

Ae peitai, na fiu leoleo e tau saili le na molia, ae e le’i mauaina o ia i lea aso.

Na agai atu loa leoleo i le LBJ e toe taumafai e fa’atalanoa ia Fulu ae peitai, sa le’i fia talanoa o ia i lea taimi.  Ae ta’uina e Fulu i leoleo le suafa o se molimau, o se alii e latou te nonofo faatasi, ma le na molia. 

I su’esu’ega a leoleo sa fa’amaonia ai le tele o vaega o le tino a Fulu na ma’osia faapea ai le tele o vaega o ona lima aemaise lona lima taumatau, na tatui.

O le afiafi o Mati 1, 2025 sa mafai ai loa ona fa’atalanoaina e leoleo ia le molimau e tusa ai ma le fa’alavelave na tupu.

Ma na fa’amatala e le molimau e faapea, o Fulu (le na manu’a) ma Fifita (le na molia), e latou te nonofo faatasi uma, i le fale e tasi.  Ma e le o se tulaga fou le tupu o fe’ese’esea’iga i lo la va.

Sa ta’ua e le molimau le tele o isi taimi e fasi ai foi o ia e Fifita ae e na te toe faamagalo iai.

Ae o le aso lea na tupu ai le misa i le va o Fulu ma Fifita, sa taumafai le molimau e fa’ato’ato’a le la pisa.  Ma sa faapea ona malie iai Fulu ae peitai, sa le’i malie ia Fifita.

Na ta’ua e le molimau le fa’aauau ona leotele ma palauvale ia le na molia.  Ae sa fa’aauau ona fa’ato’ese ma fa’amaulalo atu iai ia le na manu’a.  Ma i’u ai lava ina tu i luga ia le na molia ma u’u mai se koluse u’amea ma amata ona tatui ai le na manu’a, i lona tau’au ma ona lima.

O le afiafi lava lea na avefaapagotaina ai e leoleo ia Fifita.

Sa mafai foi ona maua mai e leoleo se faamatalaga mai ia Fulu, lea sa tutusa lana fa’amatalaga ma le fa’amatalaga a le molimau.  Na ta’ua ai foi e Fulu lona fiu e taumafai e sola ‘ese mai ia Fifita ma taumafai e lafi i tua o le molimau, ae tuliloa lava o ia e Fifita.

Ina ua te’a i tua ia Fulu mai i le falemai, sa ia malaga atu ma momoli atu le koluse siliva lea na fa’aaoga e Fifita, e osofa’i ai o ia.

O moliaga a Fifita, na aofia ai le Fa’ao’olima i lona tulaga e lua ma le Faatupu vevesi i totonu o le aiga.

O le moliaga o le fa’ao’olima, o se vaega ‘D’ i solitulafono mamafa, e mafai ona nofosala ai i le falepuipui, i le le silia ma le lima tausaga, po o se sala tupe e i le va o le $150 ma le $5,000; po o faasalaga uma e lua.

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le falepuipui, i le le sili atu ma aso e sefululima, po o se sala tupe i le va o le $150 ma le $300; po o faasalaga uma e lua.

E $10,000 se vaegatupe na fa’atulagaina e mafai ona tatalaina ai le na molia, e faatalitali ai lona faamasinoga.