O TEINE E TO’ATOLU MA LE TAMA NA LEILOA

Vaega e 8

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 8.

**********************************************

Ua o’o nei i le aso lona tolu, ma ua mana’o le teine laititi, po o le ui’i a le ulugalii gaosi falaoa mata, e alu foi o ia e saili mai sona manuia mai i le fale o le alii mau’oa.  Aua e le’i mate’ia lava le tupua, i le potu lea ua fa’amaonia nei, o lo’o iai se alii o nofo ai.

Sa fa’afaigata i le tina o le teineititi lona tolu, ona tu’u atu si ana tama teine, aua o le ui’i lea o le aiga ma e musu ina ne’i o’o iai se tulaga pagatia.  Ae peitai, sa augani atu pea le teineititi lona tolu, e tu’u atu o ia e alu, e saili mai sana ia fesoasoani mo si o latou aiga.

Na lototele lava le teineititi lona tolu, o le a fa’amanuiaina ana taumafaiga, aua o lea ua fo’i manuia mai ona uso matutua e to’alua.

Sa i’u ina ioe atu le tina o le aiga, ma lona loto popole, e tu’u atu si ana tama teine mulimuli, e alu e taumafai e saili le tali o le tupua i le fale o le alii mau’oa.

Ma ua tapena nei le teineititi lona tolu e alu i le fale o le alii mau’oa.  Sa ia fa’alogologo lelei lava i faatonuga mai ona uso matutua ia ua toe fo’i mai.

Sa leai lava foi se ‘ese’esega o mea na talosagaina e le teine lona tolu lea, mai i mea na talosagaina e ona uso matutua e to’alua, ina ua fesiligia o ia e le alii mau’oa po o le a le mea o ia finagalo e alu ma ia i le potu.

Ina ua taunu’u le teine lona tolu i totonu o le potu, sa faapea loa ona ia tafuina le afi, tu’u iai i luga ia le falai ma ulo, teu luga o le laulau faapea ma le moega, ona nofo faatalitali loa lea, po o le a leisi mea o le a tupu.

I le ta tonu lava o le 12 i le tulua o po ma ao, sa fa’alogoina e le teineititi lona tolu ia le savalivali solo o se tagata i totonu o le potu, ae o le taimi lea, ua fa’atumulia totonu o le potu i le tagi a se tagata, e pei o iai se mea o mafatia ai.

Ua fetilofa’i solo le teineititi ae na te le iloa atu se tagata po o se mea e tasi.  

Ae sa fa’ate’ia o ia ina ua tu se alii i ona luma ma faasino agai i le laulau ma fesili atu, “O ai ua e saunia ai lea taumafataga?”

[E FAIA PEA]