Tu’ua’ia se tamaitai i le sola ma se ta’avale a seisi tagata

Pago Pago - AMERIKA SAMOA

O le taeao o le aso 21 o Fepuari, na fa’afeso’ota’i ai e se alii leoleo ia le ofisa a leoleo i Tafuna, mo se fesoasoani i le sailiga o se ta’avale ua gaoia, e le tamaitai o Carolaine Purcell (le na molia), mai i Futiga, i le po o Fepuari 20, 2025.

E tusa ai ma le fa’amatalaga a le alii leoleo na fa’afeso’ota’iina le ofisa a leoleo, na vala’au atu le alii e ana le ta’avale, ia te ia, i  le po o Fepuari 20, ma fa’ailoa atu ia te ia (leoleo) le gaoia e Purcell o le ta’avale mai Futiga.  

O lo’o ta’ua i fa’amaumauga a le faamasinoga, o le ta’avale na gaoia, o lo’o lesitalaina i lalo o le Asosi Soka Faavaomalo (Internationale De Football Association-FIFA), lea e galue ai le tua’a o le alii na iai le ta’avale, i le taimi na gaoia ai.  O le alii foi lea, sa fa’afeso’ota’iina le alii leoleo mo se fesoasoani.

Sa faapea ona fa’asalalauina loa e le ofisa a leoleo i leoleo uma ia le taavale gaoia, ae o le taimi lea na asiasi atu ai nisi o sui malu o le malo i Futiga, le nofoaga na gaoia mai ai le taavale, faapea ma le aiga o le na molia, i Mapusaga.

Na fa’ailoa iai e le aiga o le tamaitai na molia, ia eria e masani ona nofo ai o ia.  Ma o se tasi o na eria, e i le afioaga o Nu’uuli, lea na maua atu ai e leoleo ia Purcell.  Ae ina ua fa’ailoa atu iai e leoleo le mafua’aga ua o atu ai, sa fa’ailoa mai e Purcell i leoleo, e na te le malamalama po o le a le ta’avale lea o lo’o tu’ua’ia ai o ia.

Sa faapea ona lokaina mai e leoleo ia Purcell ma aveina atu i le ofisa a leoleo i Tafuna mo le fa’aauauina o a latou su’esu’ega.  Ae ina o agai ese mai leoleo mai i le fale na maua atu ai Purcell (i tua o le pamu kesi o le Coconut Point i Nu’uuli), sa va’aia e leoleo ia le ta’avale o lo’o su’eina, o lo’o paka mai i leisi itu auala, i tua o le falesa a le ekalesia Metotisi.

Na mafai ona fa’amaonia e leoleo, o le ta’avale lea o lo’o sailia, ona o le laisene, lanu, ma le ituaiga taavale.  Na faapea ona fa’afeso’ota’i e leoleo ia le alii leoleo na ripotia atu lenei mataupu i le ofisa a leoleo, ma sa faapea ona fa’afeso’ota’i e lea alii leoleo ia le e ana le ta’avale.

Ina ua fa’atalanoaina e leoleo ia Purcell i le ofisa a leoleo, sa toe ta’ua e Purcell ia lona le malamalama, pe na fa’apefea ona o’o atu le taavale i Nu’uuli.  Ma sa ia ta’ua e faapea, o ia sa i le fale ma lana uo tama, i le po atoa.  Ae peitai, sa le’i maua e leoleo ia le uo tama a Purcell.

I le faamatalaga a le alii e ana le taavale, i leoleo, na alu i fale a sana uo i Futiga i le 4 i le afiafi o Fepuari 20 ma na ia va’aia ai Purcell i luma o le fale a lana uo.  Ma sa ta’ua e le alii e ana le taavale, e masani ia Purcell ae le mafana se la mafutaga.  Sa ia ta’ua, lona oso i fafo mai i le ta’avale, ae o lo’o ola lava le ta’avale, ae o le ki sa i totonu o le taga o lona ofu.

Sa ia ta’ua e faapea, e le’i umi ona o la talatalanoa ma lana uo, ae o la va’aia le aga’i ese atu o le taavale ma sa ia iloa atu, o Purcell lea o lo’o fa’afoeina le taavale.  Sa ia tamo’e atu e taumafai e taofi le taavale, ae peitai, ua tuai.  Ma na ia savali mai i Futiga, i lona aiga i Malaeloa i lea afiafi.  Na fa’ato’a iloa e le latou aiga, ua leai se ta’avale, i le 10:00 o lea po.

O iina na ia vala’au ai loa i le alii leoleo, mo se fesoasoani i le sailiga o lana taavale.  Sa ta’ua foi e le e ana le ta’avale e faapea, e le o se taimi muamua lea ua sola ai le na molia, ma se ta’avale a le latou aiga.

Na molia Purcell i lona aveina o le ta’avale, o se vaega ‘A’ i solitulafono mama, e mafai ona nofosala ai i le falepuipui i le tausaga, po o se sala tupe e le silia ma le $1,000; po o faasalaga uma e lua.

E $4,000 se vaegatupe na fa’atulagaina e mafai ona tatalaina ai o ia mai i le falepuipui, e fa’atalitali ai lona faamasinoga.