Tuaolo: Le fa’amaoni faamatalaga, tupu femasalosaloa’i i le ASGERF ona o tusi lomia

Pago Pago - AMERIKA SAMOA

E fa’ao’oina atu le tusi fa’ate’a a le susuga ia Fuiavailiili Keniseli Lafaele mai i le Komiti Faafoe o Teugatupe Ritaea a tagata faigaluega o le malo o Amerika Samoa (ASGERF) i le aso Faraile o le vaiaso ua mavae, ae ua mae’a ona taulimaina e Fuiavailiili, ia se tusi mai i le Taitaifono o le Komiti Faafoe, le tofa ia Tuaolo M. E. Fruean, e te’ena ai se talosaga a Fuiavailiili, mo le auai atu i se fonotaga fa’avaomalo (NCPERS) mo le Teugatupe.

O nei fonotaga ua ta’ua fa’apu’upu’u o le NCPERS, e tatalaina i se tagata po o se faalapotopotoga e latou te mataituina ia tupe ritaea mo tagata faigaluega a le malo,  o so’o se ta’ita’i falemalo po o i latou e galulue i galuega mo le tautuaina o le mamalu lautele, mo le fa’alauteleina o le malamalama, po o feso’ota’iga.

O nei fonotaga, e faia ai ni fa’aaliga ma iai foi nisi e lauga faapitoa i totonu o nei faapotopotoga, ae e patino lava i mataupu tau penisone.

Ua taulimaina e le Samoa News, ia se kopi o le tusi a Tuaolo, lea sa tusia ia Aperila 15, 2025 ma o lo’o manino mai ai lava le le fiafia o le afioga i le Taitaifono a le ASGERF, ia Fuiavailiili, e tusa ai ma lona fa’alauteleina o ni mataupu, ua talitonu Tuaolo, o lo’o ua afaina ai le manuia ma le fa’atuatuaina o le teugatupe.

Sa ta’ua e Tuaolo, o ia foi o le Peresetene o le Senate, o gaioiga ua faia e Fuiavailiili, e aofia ai ni faamatalaga le faamaonia, o tusi i faatonu ua faapea ona tupu ai lagona masalosalo ma tulaga faaletonu i feso’otaiga, ae le gata i lea, o le le amanaia o ona tiute fa’aleta’ita’I, ua mafua ai ona te’ena lana talosaga.

E le gata i lea, ua fa’aalia e Tuaolo lona maofa i le mafai ona talosaga Fuiavailiili, e auai atu i lea fonotaga, ona ua talitonu le Taitaifono, ua avea tulaga ua faatino e Fuiavailiili ma mafua’aga ua masalomia ai le komiti faafoe.

Ma na ta’ua foi e le afioga i le taitaifono, le fa’amuamua e Fuiavailiili o ona lagona, ae le amanaia ia ona tiute faaletaitai i totonu o le komiti faafoe, ma o se tulaga ua leva tele ona faia e Fuiavailiili.

Ma na fa’amanino atu e Tuaolo ia Fuiavailiili, po o le a le umi e avea ai o ia ma Taitaifono, e na te le fa’atagaina [Fuiavailiili] ona fa’aauau pea ona fa’aleagaina le komiti faafoe faapea.

E le o fa’ailoa mai i totonu o le tusi le tu’uina atu o se kopi i seisi i totonu o le komiti faafoe po o le pulega o le ofisa a le ASGERF, ma le aufaigaluega.

O le tusi mai ia Tuaolo na tusia na fa’ao’oina atu ia Aperila 15, ae o le tusi e fa’ate’a ai Fuiavailiili sa tusia ia Aperila 24, 2025, lea na sainia e le sui Faatonusili o le AGERF, o Caroline Wendt.

O lo’o iai nei se fonotaga faaletausaga a le komiti faafoe a le ASGERF mo le masina nei, i atunu’u i fafo ma o lo’o iai se talitonuga, o le a faia ai se palota, e pasia ai le toe faafouina o konakarate – aofia ai ni tofiga ma’oti i totonu o le ASGERF.