Fa’atula’i ese se tasi o totino o le Komiti Faafoe a le Teugatupe o le Ritaea (ASGERF)

Pago Pago - AMERIKA SAMOA

O lo’o ua taulimaina nei e le Samoa News ia se tusi na tusia i le aso 24 o Aperila, 2025 ma sainia e le sui Faatonusili o le Komiti Faafoe o le Teugatupe o le Ritaea a Tagata Faigaluega a Amerika Samoa (ASGERF), o Caroline Wendt, mo le susuga ia Fuiavailiili Keniseli Lafaele, e fa’alauiloa atu ai ia te ia, le ave’esea o ia mai i totonu o le Komiti Faafoe.

O lo’o ta’ua ai i totonu o le tusi le faia e le komiti faafoe o lea faaiuga, i lea lava aso (na tusia ai le tusi) ma ua fa’atula’i’ese ai foi ma Fuiavailiili, i lea lava foi aso.

Ua ta’ua ai foi i totonu o le tusi, le faia o lenei fa’ai’uga ona o ni atugaluga a le komiti fa’afoe, i le fa’asalalauina e Fuiavailiili, o ni fa’amatalaga taufa’asese, la’asia o lona tofi fa’aleta’ita’I ma lona le amanaia o tulafono o lo’o lima ta’ita’iina ai tiute a le komiti faafoe.

Ma ua taofi le komiti faafoe, o nei tulaga ua faia e Fuiavailiili, ua faapea ona ave’esea ai le fa’atuatuaga a le komiti mai ia Fuiavailiili ma avea ma tulaga ua a’afia ai le agava’a e faatino lelei ai tiute a le komiti faafoe.

I le faai’uga o le tusi ua faapea ona fautuaina ai Fuiavailiili, ina fa’afeso’ota’i le afioga i le Taitaifono o le ASGERF, le tofa ia Tuaolo Fruean, pe afai o iai ni ana fesili.

Ua fa’ao’oina atu kopi o lenei tusi ia Tuaolo M.E. Fruean, le Taitaifono o le Komiti Faafoe, o le sui Taitaifono o le Komiti Faafoe, ia Loa Tauapai Laupola ma totino o le komiti, ia Tony Togia’i ma Toloa’i Ho Ching.

O le tali atu a Fuiavailiili i lenei tusi, sa faapea ona lomia i totonu o le Samoa News i le aso ananafi, ma o le lona fa, ma le lasi ai lea, o tusi a Fuiavailiili, i le Faatonu, sa faapea ona lolomia i totonu o le Samoa News, o lo’o fa’alauiloa mai ai ona popolega, e tusa ai ma le le alualu i luma, po o le tulaga lelei, o le teugatupe mo tagata ritaea a le malo.

Ma o tusi uma a Fuiavailiili, sa fa’atuatusi uma aga’i i so’o se totino o le ASGERF.

E tele ni vaega o atugaluga na faapea ona aofia i totonu o tusi a Fuiavailiili, na aofia ai ma le lagolagoina e le komiti faafoe, o se faaopoopoga po o se suiga, ina ia toe si’i le pasene e mafai ai ona nono e le malo ia se tupe mai i le ASGERF – mai i le 17% e o’o atu lea i le leai o se maualuga fa’atulagaina. 

I le mae’a ai o le iloiloga a le Senate, sa faapea ona fa’amautu ai i le 60% v. leai se maualuga faatulagaina.

Na ta’ua e Fuiava’iliili lona tete’e i lenei suiga ma e pei ona sa ia tusia i se tasi o ana tusi na lomia, o le ave’esea o se taualuga i inivesi lotoifale, e a’afia ai le puipuiga ua mae’a ona fa’ata’atia, e ‘aua ai nei fa’alavelave i penefiti.