O TEINE E TO’ATOLU MA LE TAMA NA LEILOA

 VAEGA 7

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le tatou Fagogo fou - O TEINE E TO’ATOLU MA LE TAMA NA LEILOA.

***************************************************

Na gata mai le tatou Fagogo i le vaiaso ua tuanai, ina ua alu le afafine lona lua, a le ulugalii gaosi falaoamata, e tau saili sona manuia mai i le fale a le alii mau’oa, e ala i le nofo i totonu o le potu pa u o le fale lea na va’ai ai lona uso matua, i se alii talavou, i le tu lua o po ma ao.

Ina ua taunu’u le teine lona lua, sa ia manatua mea uma sa fa’atonutonuina ai o ia e lona uso matua, lea ua fo’i atu ma lana $300.

Ina ua fesiligia le teine lona lua, e le alii mau’oa po o le a se mea e finagalo iai, e fesoasoani i lana nofo i totonu o le potu i lea po, sa pau lava mea na mana’o iai le teine lona lua, o se mea’ai.  Lea na fa’atonuina ai e le alii mau’oa ia ana auauna, ia tapena se aiga tele mo le teine lona lua, faatasi ai ma ni la’au e tafu ai le afi o le potu.

Ua le toe fa’atali le teine lona lua ma fa’asasa’o loa i lona potu ma fa’amumu le afi, ae tu’u ai i luga le falai.  Ona liliu lea ua teu luga o le laulau i le ‘ie laulau lanu pa’epa’e ma tapena lona moega.

Ona ia nofo ane loa lea i lalo ma fa’atalitali le ta o le 12 i lea po.

Ina ua o’o foi ina tatagi mai logo e fa’ailo mai ai le ta o le 12 i lea po, sa faapea foi ona va’aia e le teine lona lua ia le alii sa va’aia e lona uso matua.

Ma na fesiligia foi e le alii ia le teine lona lua, i fesili foi ia na ona fesiligia ai le teine matua.  “O ai e ana le mea’ai lea o lo’o e kukaina?  O ai lea e tapena ai le laulau?  O ai lea e tafu ai le afi?”

Ma sa tali foi le teine lona lua, e pei ona sa faatonuina ai o ia e lona uso matua.

“O a’u.”

Ma e pei foi lava o le po na iai le teine matua, sa faapea foi ona va’aia e le teine lona lua ia le maligi o loimata o le alii ma toe mou ese atu.

O le taeao na soso’o ai, ina ua alu atu le teine lona lua i luma o le alii mau’oa, sa ia faamatalaina uma foi mea sa tutupu i le po ae na te le’i fa’amatalaina ia foliga fa’anoanoa a le alii, i tali sa tu’uina atu e le teine, i ana fesili.

Sa faapea foi ona totogi e le alii mau’oa ia le teine lona lua, i le $300 ma toe fo’i fiafia atu le teine lona lua, i lo latou aiga.

[E FAIA PEA]