Loka se alii 19 tausaga i le gaoia o se tupe a se ulugalii

Pago Pago - AMERIKA SAMOA

O le aoauli o le aso 18 o Fepuari, 2025, na fa’afeso’ota’i ai e se tamaloa ia le Ofisa a Leoleo i Tafuna, e ripotia le fa’aaogaina e se tasi o lana ‘bank card’ e fai ai sana faatauga i Pavaiai.

Ina ua taunu’u leoleo i le fale o le ulugalii na a’afia, sa faamatalaina iai e le tamaloa na a’afia, le osofa’ia o le la fale e se gaoi i le aoauli o le aso Sa, Fepuari 16, 2025, a’o faia se la malologa ma si ona toalua.

Na ta’ua e le tamaloa na a’afia, le gaoia o lana ‘bank card’ ma se tinoitupe e $37.00, mai totonu o lana ato tupe lea sa i totonu o sana ato fa’afafa.  Ma sa faapea foi ona ave’esea se tinoitupe e $80.00 mai totonu o le ato tupe a lona to’alua.

Ae na faamalamalama e le tamaloa na a’afia, o le mafuaaga na ia le fa’afeso’ota’iina ai le ofisa a leoleo i lea aso, e tusa ai ma le fa’alavelave, ona o tuatuagia fa’alegaluega.  

Sa faamatala e le tamaloa le fa’afeso’ota’i ina atu o ia e se faleoloa i Pavaiai ma fa’ailoa atu iai ia te ia, le fa’aaogaina o lana ‘bank card’ e fai ai se fa’atau, e $27.00 le faitau aofa’i.

Ma na ia alu foi i le faletupe (TBAS) e aumai se ripoti o lana tusi tupe ma na ia va’aia ai le fa’aaogaina o lana ‘bank card’ i le aso 17 o Fepuari, e fai ai seisi faatauga, e $73.00 le tau aofai.

Sa faapea ona agai atu leoleo i le faleoloa lea na fa’aaogaina ai le ‘bank card’ a le tamaloa na a’afia, ma mafai ona matamata i le ata vitio sa pu’eina i le masini pu’eata a le faleoloa.  Ma o iina na fa’amaonia ai le fa’aaogaina e Tulati Alaiva’a (le na molia) o le ‘bank card’ a le tamaloa na a’afia, e fai ai sana fa’atau.

Na soso’o ai loa ma le agai atu o leoleo e saili ia Alaiva’a i lona aiga, ae peitai, sa fa’ailoa iai e se tausoga a Alaiva’a, e le o toe nofo o ia i lo latou aiga.  Sa faamatala e le tausoga le tuli’eseina o Alaiva’a mai lo latou aiga, ona o le le usiusita’i i lona tina.  Sa fautuaina e le tausoga ia sui malu o le malo, ina ia siaki le fale a se uo a Alaiva’a.

Sa faapea loa ona toe agai atu leoleo i le fale a le uo a Alaiva’a ma maua atu ai o ia, o nofonofo mai fafo o le fale.  Ina ua fa’atalanoaina e leoleo ia Alaiva’a, sa ia ta’ua e faapea, na ia mauaina le ‘bank card’ i autafa o le auala e agai atu i le fale o le ulugalii na a’afia.

Na ave faapagotaina e leoleo ia Alaiva’a mo le fa’aauauina o a latou su’esu’ega ae peitai, sa musu le alii e fai sana faamatalaga.  O lea na lokaina ai loa o ia i le to’ese.

I le fa’aauauina o su’esu’ega a leoleo, sa maua ai le sainia e Alaiva’a o nisi fa’atauga e lua.  Ae le gata i lea, e tuaoi ia Alaiva’a ma le ulugalii na a’afia ma sa ta’ua e le tamaloa na a’afia, na ia masalomia Alaiva’a i le gaoia o le la tupe ma lana ‘bank card’, ona e masani lava ona fealua’i atu Alaiva’a i autafa o le la fale, i le tele o taimi.

O moliaga na faila e faasaga ia Alaiva’a, na aofia ai, le Faomea i lona tulaga muamua ma le Gaoi, o ni vaega ‘C’ i solitulafono mamafa, e mafai ona nofosala ai i le ta’i fitu tausaga i le falepuipui, po o se sala tupe e $5,000; po o faasalaga uma e lua, i le moliaga e tasi.

Faapea ai ma moliaga o le solivale o fanua ma fale, e aunoa e ma se fa’atagana, o se vaega ‘B’ i solitulafono mama; e mafai ona nofosala ai i le falepuipui i le o’o atu i masina e ono, po o se sala tupe e $500; po o faasalaga uma e lua.

Atoa ai ma le moliaga, o le fa’aaoga fa’asolitulafono o se ‘credit device’, o se vaega ‘D’ i solitulafono mamafa, e mafai ona nofosala ai i le falepuipui, i le le sili atu ma le lima tausaga, po o se sala tupe e $5,000; po o faasalaga uma e lua.

E $10,000 se vaegatupe na fa’atulagaina e mafai ona tatalaina ai i tua le na molia, e faatalitali ai lona faamasinoga.