Loka se alii ua leva na iai se tusi saisai, ae maua ai Aisa i totonu o lana taavale

Pago Pago - AMERIKA SAMOA

O le po o Tesema 21, 2024 na agai atu ai leoleo i se faalavelave na tupu i le Falelima i Sasa’e ma lokaina mai ai se alii ua leva ona iai se tusi saisai.

E taunu’u atu leoleo i le nofoaga na tupu ai le faalavelave, ae ua liliu le taavale a le susuga ia Peni Ulugalu Jr., e sola ‘ese.  Sa faapea ona taofia lana taavale e leoleo ma avefaapagotaina ai o ia e leoleo.

Sa momoli atu Ulugalu i le ofisa a leoleo i Fagatogo mo le faia o ona su’esu’ega, ma na taofia ai foi ma lana taavale.

Ae e le’i aveina ia Ulugalu i le to’ese i Tafuna, sa faapea ona su’eina totonu o lana taavale mo le fa’amaumauina o ana meatotino sa iai i totou o le taavale.

O iina na maua ai e leoleo ia se ufi lanu uliuli i le nofoa pito i tua, i lalo o le nofoa aveta’avale, o iai totonu se paipa mata’eta’e (e fa’aaogaina mo le ulaina o vaega o fualaau faasaina, o le Aisa).

I totonu o le paipa na maua ai se vaega tele o le Aisa.  Ae ina ua fesiligia e leoleo ia Ulugalu e tusa ai ma le paipa, sa ia tete’e, e le o sana meatotino, e ui e na’o ia sa i totonu o le taavale.

Na faapea loa ona aveina Ulugalu i le to’ese i Tafuna e faatalitali ai le aso e tula’i ai i luma o le faamasinoga.

Ae ina ua su’esu’eina e le vaega a leoleo ia le paipa, na maua i totonu o le taavale a Ulugalu, sa mafai ona fa’amaonia o le Aisa sa i totonu.

(O Ulugalu foi lea sa lokaina ia Tesema 15, 2024 ina ua taofia lana taavale e leoleo, ona o le le tumau o le taavale i se itu e tasi ole alatele, e pei ona ta’ua i fa’amaumauga a le faamasinoga.  Ina ua taofia Ulugalu ma tapa e leoleo lana laisene aveta’avale, e le’i iai sana laisen aveta’avale.  Sa aveina o ia i le ofisa a leoleo ma su’esu’eina e leoleo lana taavale, lea sa ta’ua, na maua ai foi se vaega o fualaau faasaina – Aisa – ma lokaina ai o ia i le to’ese I Tafuna, e faatalitali ai lona tula’i i luma o le faamasinoga).

Ae i le faalavelave na taofia ai Ulugalu ia Tesema 21, sa molia ai o ia i le moliaga o lona umia fa’asolitulafono o se vaega o fualaau faasaina – Aisa); o se vaega o solitulafono mamafa, e mafai ona nofosala ai i le falepuipui i le va o le lima ma le 10 tausaga, po o se sala tupe i le va o le $5,000 ma le $20,000; po o fa’asalaga uma e lua.

E $5,000 se vaegatupe na fa’atulagaina e mafai ona tatalaina ai i tua ia Ulugalu, e faatalitali ai lona faamasinoga.