Iva masina na malaga ai i fafo ae toe fo’i mai ua gaoia ma fa’aleagaina lona fale

Pago Pago - AMERIKA SAMOA

E tusa ai ma fa’amaumauga ale fa’amasinoga, o le aso 20 o Ianuari, 2025, na ripotia atu ai e se tamaloa i le ofisa a leoleo, lona toe fo’i mai i le teritori, ua gaoia ma fa’aleagaina e le susuga ia Andrew Tautua lona fale, ae fa’atauina nisi o ana meatotino.

Sa ta’ua e le tamaloa na a’afia, e iva masina sa iai o ia i atunu’u mamao ma sa ia nanaina leisi ki o lana ta’avale, i lalo o lona moega i totonu o lona potu, ae o leisi ki o lona potu, sa ia tu’uina i sana uo. 

 Ae o le masina o Setema 2024, na ia maua ai se valaau ma se ripoti e faapea, o lo’o fealua’i Tautua i lana ta’avale.

O le aso 20 o Ianuari, 2025 na toe taliu mai ai le alii na a’afia, ma ia molimauina ai le gaoia o le tele o ana meatotino, na aofia ai sana uati auro (Rolex), o ona lavalava, o ana mea faigaluega ae ua fa’aleagaina e le tagata lona potu.

Sa o’o foi i lana ta’avale, ua tele ma’osia ua iai, o nisi o meafaigaluega sa i totonu o le taavale, ua gaoia, o le nofoa a le itu aveta’avale, ua masae, ua ave’ese le leitio a le taavale ma ua le toe lelei foi le ABS a le taavale.

Na faamatalaina e le alii na a’afia, lona fesiligia o ona tuaoi  e tusa ai ma le fa’alavelave ua tupu ma sa faamatala atu e ona tuaoi, lo latou va’aia o le ua molia, i totonu o lona fale, i le tele o taimi ae le gata i lea, na latou va’aia foi le fealua’i o le ua molia, i lana taavale.

Sa toe asia e leoleo ia tuaoi a le alii na a’afia ma na o latou malilie e tusia a latou molimau, e fa’amaonia ai o le susuga ia Tautua sa iai i le fale o le na a’afia, ma fealua’i i lana taavale.

O le molimau a se tasi o tuaoi, sa ia va’ai o fealua’i Tautua i le ta’avale a le na a’afia, i autafa o le fale a le molimau, ae na te le manatua aso ma taimi.

O le molimau lona lua (o le uso a le na a’afia), sa ia ta’ua ai lo la iai ma Tautua i Fagasa, ma sa ia fesiligia Tautua po o ia ia le ki a le ta’avale a le na a’afia, sa faapea ona tu’uina atu e Tautua le ki ia te ia.

Sa ta’ua foi e le uso a le na a’afia, le fa’ailoa atu e tuaoi a le na a’afia ia te ia, lo latou va’aia o Tautua o ona fealua’i mai i le taavale a le na a’afia.

I le molimau a se tasi o uo a le na a’afia (molimau lona tolu), sa ia faamatalaina le valaau mai o lana uo (le na a’afia) ia te ia, ia Setema 2024 ona o lona popole i lana taavale.  Ma o le mafuaaga lea na alu ai e siaki le taavale a lana uo (le na a’afia) ma ia molimauina ai, le faaleagaina o le taavale a lana uo (le na a’afia) ma ua le toe ola.

Ona tago lea o le molimau lona tolu i le pu’e ata o le taavale, i le fale a le na a’afia, i Fagasa, ae ua mae’a lea ona ia toe sui le ma’a ma fa’amama le taavale, e pei ona talosaga mai ai si ana uo (le na a’afia).  Ae na ta’ua e le molimau le tulaga faaletonu o le taavale, na aofia ai le lusi o le foeuli o le taavale faapea ma le le toe ola o le ‘speaker’ a le taavale.

O lo’o ta’ua i fa’amaumauga a le faamasinoga, a’o iai le na a’afia i Hawaii mo le iva masina, o se tasi lenei o ana uo (molimau lona tolu) sa ia tu’uina iai le ki o lona potu, lea sa iai ma se ki o le taavale.

I le molimau a se tasi foi o uo a le na a’afia (molimau lona fa), sa ia ta’ua le tu’uina atu e le na a’afia ia te ia, seisi ki o lona potu ma fa’ailoa atu ia te ia, o lo’o nana i lalo o lona moega, leisi ki o le taavale pe a ona manaomia e fa’aaoga.

O le afiafi o Fepuari 5, 2025 sa toe feiloai ai leoleo ma le na a’afia ma fa’asino iai e le na a’afia ia lona potu ma se potu e foliga mai o lo’o teuina ai ni meatotino (storage).  O iina na fa’ailoa atu ai e le na a’afia i sui malu o le malo, o ia o se fitafita tuai ma e a’afia o ia i le gasegase o le PTSD.

O se taimi mulimuli ane, na o’o atu ai leoleo i le fale a Tautua (le na molia) ma aveina o ia i le ofisa a leoleo mo le fa’aauauina o a latou suesuega.  Ae peitai, sa musu Tautua e tali ni fesili a leoleo.

O le aso 6 o Fepuari na toe fa’ailoa atu ai e le na a’afia, i leoleo, nisi molimau sa va’aia ma o la’ua fesoasoani i le fa’atauina o nisi o ana meatotino, ua leiloloa.

Sa faapea ona fa’atalanoaina e leoleo ia le molimau numera lima, ma na ia faamatalaina lona iai faatasi ma Tautua, ina ua alu e fa’atau ia ni meafaigaluega a le na a’afia, i le fale ta’avale a le Aute i Futiga, ma sa o la fa’aaogaina le ta’avale a le na a’afia.  Ae peitai, e na te le manatua le aso ma le taimi na la o ai.

O le molimau lona lona, na fa’asinoina i leoleo le fale o seisi foi molimau, lea sa faamatalaina i leoleo, lona va’aia o Tautua o fealuai atu i le ta’avale a le na a’afia, i autafa o lona fale.

E le o ta’ua i totonu o faamaumauga a le faamasinoga, pe sa ave faapagotaina Tautua pe na lokaina foi o ia, ina ua mae’a ona su’esu’eina o ia e leoleo, pe sa loka i se taimi mulimuli ane.

Ae na molia o ia i le moliaga o le fa’aleagaina o meatotino i lona tulaga lua ma le moliaga o le suia/nanaina po o le faia o se molimau pepelo, i lona tulaga e lua.

O nei moliaga, o ni vaega ‘A’ i solitulafono mama, e mafai ona nofosala ai i le falepuipui, e o’o atu i le ta’i tausaga po o se sala tupe e $1,000 (i le moliaga e tasi); po o fa’asalaga uma e lua.

E $5,000 le vaegatupe na fa’atulagaina e mafai ona tatalaina ai le na molia, mai i le falepuipui, e faatalitali ai lona faamasinoga.