100 tausaga ae fa’amanuiaina i sona sitiseni Niu Sila

Pago Pago - AMERIKA SAMOA

O se tama matua mai i le afioaga o Auala, i Savaii, ua atoa lona 100 tausaga, ua fa’amanuiaina i lona mauaina o lona sitiseni Niu Sila i le masina o Mati na se’i mavae atu nei.

O se tasi nei o le to’atele o tagata Samoa ua mafai ona agava’a e avea ma sitiseni o Niu Sila, i le mae’a ai ona pasia o le Pili mo le toe fa’atumauina o sitiseni a tagata Samoa na soifua mai i le va o le tausaga 1924 ma le 1949.

Na fa’aalia e le susuga ia Seve lona agaga fa’afetai i  le Atua ona ua ia maua lenei fa’amanuiaga.  Ae le gata i lea, o le ofisa a le Lototau, lea sa fesoasoani ia te ia, mo le apalaiina o lona sitiseni.

O le susuga ia Seve na soifua mai ia Aukuso 8, 1924 ma ua agava’a o ia i aiaiga fou mo sitiseni mo tagata Samoa uma na soifua i le va o le 1924-1949, e avea ma sitiseni o Niu Sila.

I lona fa’asoa mai e tusa ai ma lona ausiaina o le 100 tausaga, sa ta’ua e Seve, e mafai ona ausia ona o le savali.  Sa ia ta’ua, i le avea ai o ia ma se totino o le Ekalesia FKS, a’o talavou o ia, e savali ai lava i le va o le tolu ma le fa maila, e ave le sua a le faifeau o le latou nu’u i Savaii.

Sa ia faamatalaina e faapea, o nisi taimi, e tolu aso e alu ai, ona o le mamao o le va o le latou fale ma le fale a le faifeau.  Ma e masani ona moe i fale a nisi o ana uo, ae e le’i toe fo’i mai i lona aiga.

O le susuga ia Seve, o se tua’a i se fanau e to’asefulu ma fanau a fanau e silia ma le to’a 40, faapea fanau o fanau a fanau, e to’alima.

E ui i lona aulia o lona 100 tausaga, ae peitai, sa ia ta’ua lona nofo saunia e malaga i Niu Sila.

I lona toe tepa i lona tuputupu a’e, sa ta’ua e le susuga ia Seve le tele o faigata na feagai ma ia.  Na auai o ia i le aoga tulaga muamua a Vaisala ma auai i se A’oga Faaletusi Paia i Auala.

Na amata galue mai lava o ia i lona talavou, ae i le 1953 na ia galue ai i le ofisa fua fanua, ona soso’o ai lea ma le Ofisa o Faatoaga ma Faigafaiva ma o le Ofisa o Fa’atoaga i Asau na galue ai ae e le’i ritaea o ia.

O le masina o Aukuso o le tausaga nei, pe a finagalo alofa le Atua, o le a fa’amanatuina ai le 101 tausaga a le susuga ia Seve ma ua fa’atumulia o ia i le agaga fa’afetai i le Atua ona o lenei meaalofa o le ola, e fa’aauau ai ona ia tautua i lona aiga, nu’u, aemaise lana ekalesia.