Toe tolopo i le fa’ai’uga o Aperila ia le iloiloga a Sia Figiel

Apia - SAMOA

E tusa ai ma se ripoti mai i le vaega fa’asalalau a le Talamua Online, ua fa’alauiloa mai a le fa’amautuina e le Faamasino Sili, le afioga Fepuleai Ameperosa Roma, ia le fa’ataunu’uina o le iloiloga a Papali’i Sia Figiel.

Na fa’ailoa atu e Fepulea’i i loia a Figiel, lona le mana’o e toe tolopoina lenei mataupu ma ua tele ni avanoa sa tu’uina atu ia i latou e fa’aulu mai ai ia ripoti o iloiloga fa’afoma’i lea o lo’o mana’omia mai Hawaii, mo Figiel, lea sa mafua ai ona fa’aauau pea ona tolopoina lenei mataupu.

Ae peitai, na toe talosaga ia le loia a Figiel, le susuga ia Unasa Iuni Sapolu ina ia toe tolopoina le mataupu ma le faamoemoega o le a o’o atu iai, ua maua mai ia ripoti nei o lo’o faatalitali ai.

Sa fa’amoania e le loia a le malo, le susuga ia Taimalelagi Leinafo Strickland, e na’o le tasi le ripoti ua maua mai i le Minisita o le Soifua Maloloina, ae o lo’o latou fa’atalitali mo le ripoti mai i Hawaii, mai i le itu tete’e.

Na fa’aalia e Taimalelagi le le tete’e o le latou itu mo le toe tolopoina o lenei mataupu.

Sa fa’amanatuina atu e le afioga i le faamasino sili, i le itu tete’e le fa’amautuina o le aso o le iloiloga o lenei mataupu, ia Aukuso ma e mana’omia ona tali mai le itu a le malo i ni ripoti fou, ae e le’i o’o i lea iloiloga.

O lea na ia toe tolopoina ai lenei mataupu ia Aperila 22, i totonu o lona ofisa, ina ia mafai ona talitalia ia ripoti, ona faia lea o se faaiuga i se aso ma’oti e mafai ai ona fa’ao’oina atu e le itu tete’e ia lea ripoti.

A’o fa’agasolo felafolafoa’iga a le faamasino sili ma itu e lua, sa talosagaina e Figiel se avanoa e saunoa ai ma ina ua taliaina lana talosaga, na fa’aleoina e Figiel ia lona agaga faafetai i le faamasinoga ma i latou uma.

Na fa’asoa mai foi Figiel i le tausiga lelei o ia e tina ma tamaitai pagota o lo’o latou iai faatasi i totonu o le falepuipui.

A’o agai atu Figiel i totonu o le potu faamasino, na taumafai se leoleo e ave’ese se ato sa tatau i lona tau’au, na gaosia mai i se taga alaisa.  Na i’u ina tu’uina atu e Figiel ia le ato i le leoleo lea na taumafai e toso ‘ese mai lona tau’au.

Ma na ia fa’ailoa atu e faapea, ua atoa le 11 masina o loka o ia i le falepuipui, ma o lea ato, o se fa’ailoga o le alofa o pagota tamaitai ma tina, lea na o latou gaosia lea ato.

Sa faapea ona aloaia e le afioga i le faamasino sili ia le saunoaga a Figiel ma ia tolopoina loa le mataupu ia Aperila 22, 2025.

Ua mae’a ona te’ena e Figiel ia ona moliaga e ono, e aofia ai le fasioti tagata, fasioti tagata le fuafuaina faapea ma nisi moliaga i lona umia o se aupega.

O lo’o molia ia Figiel i le maliu o le tamaitai Polofesa ia Dr. Caroline Sinavaiana Gabbard, i le afioaga o Vaivase ia Iuni 2024.