TALA MAI SAMOA

Apia - SAMOA

FA’AMAVAE SE MINISITA MAI LONA TOFIGA

Ua ripotia mai e le Samoa Observer, ia le fa’amavae o le afioga ia Faleomavaega Titimaea Tafua, le sui o le itumalo a Aleipata Itupa i Luga, i totonu o le Palemene, ma le Minisita o Fefa’atauaiga, Galuega ma Leipa, mai lona tofiga ina ua molia o ia i le tulafono i le aso Gafua na se’i mavae atu nei.

O le moliaga a Faleomavaega na mafua ona o se fa’alavelave tau ta’avale na tula’i mai i le fa’ai’uga o le vaiaso ua tuanai.

O le aso Lua sa faapea ona fa’amavae ai Faleomavaega mai ona tofiga fa’alemalo.

I se ripoti mai i le Samoa Global News, ua ta’ua ai le fa’alauiloa mai e le Komesina a Leoleo, le afioga Auapa’au Logoitino Filipo, le leai o se ‘ava malosi na a’afia i lenei fa’alavelave ae e tusa ai ma ulua’i su’esu’ega a leoleo, o lo’o ta’ua ai le saoasaoa o le ta’avale a le alii minisita, na mafua ai le fa’alavelave.

Ua mae’a ona fa’atonuina Faleomavaega ina ia fa’ao’oina atu lana tusi folau i le ofisa a leoleo ma o le aso 29 o lenei masina, o le a tula’i ai i luma o le faamasinoga mo lona ulua’i iloiloga.

TAOFI IA LE SU’ESU’EINA O TAAVALE I LE MALAE VAALELE

Ua taofia nei le toe su’esu’eina o ta’avale e ulufale atu i totonu o le malae vaalele i Faleolo, ina ua taunu’u se tusi mai i le Minisita o Faamasinoga, lea na fesiligia ai le mafuaaga o le su’esu’eina o a latou taavale ma le tulafono o lo’o fa’atagaina ai le faia o lea tulaga.

Sa fa’ao’oina atu foi le kopi o lenei tusi i le Ofisa a le Loia Sili, lea na u’una’ia ai loa le Matagaluega o le Malaevaalele, e taofia le toe su’esu’eina o ta’avale o lo’o ulufale atu i le malaevaalele.

E leai se fa’aaliga sa faia e le Matagaluega o le malaevaalele e tusa ai ma lea suiga fou.

Ae o le aso Gafua na se’i mavae atu nei, sa molimauina ai le taofia e sikulaki o le malae vaalele ia ta’avale i luma o le pa, ma o latou su’esu’eina ia totonu ma fafo o taavale faapea ato a tagata femalagai, ae aunoa ma le iai o ni leoleo.

Na fa’atonuina foi tagata femalagai ina ia tu’ua a latou ta’avale, ae fa’ataunu’uina ia le su’esu’eina o taavale.  Ma ona o le le’i iai o ni leoleo, sa mafua ai ona fesiligia e tagata o le atunu’u po o fa’atulafonoina lenei gaioiga.

Sa fa’aalia e se ave taxi na fa’atu e sikulaki lana taavale, ia lona le fiafia e tusa ai ma le fa’amalamalamaga na tu’uina atu ma sa ia fa’aalia i le Samoa Observer, ia lona le malamalama po o a tulaga na tau saili e sikulaki i la latou su’esu’ega.

Na fa’ailoa foi e le ofisa a leoleo, o lo’o latou taumafai e saili se fa’amalamalamaga i lenei tulaga.

Ae i se ripoti ananafi a le Samoa Observer, sa ta’ua ai le le nofo malamalama o le Minisita o lo’o mataituina ia le malaevaalele, i lenei suiga fou i le malae vaalele.

TOE MOLIA IA PAUGA I LE LAFOINA O NI UPU TAUFA’AMATA’U

O le susuga ia Talalelei Pauga lea sa molia i le taupulepule e fa’ao’o le oti i se taitai sinia o le malo, ua toe molia foi i lona lafoina o ni upu taufa’amata’u.

O le aso Faraile o le vaiaso ua mavae, na aveina ai e leoleo ia Pauga mo le faia o ni a latou su’esu’ega ma na faapea ona   toe fa’aopoopo ai ona moliaga, ae na mafai ona toe tatalaina o ia i tua.

O le moliaga fou ua faasaga ia Pauga, e mafua ina ua tu’uaia e le susuga ia Autagavaia Upa, i lona fa’apa ina o se la’au malosi i Lalovaea i le lua vaiaso talu ai ma lafoina ai e Pauga ia ni faamatalaga tau fa’amata’u. Ma na ta’ua e Autagavaia lona fefe i le gaioiga sa faia e Pauga, ma na alu ese ai ma lona aiga, mo le puipuiga o lona ola.

Sa ta’ua e le Komesina a Leoleo, le afioga Auapa’au Logoitino Filipo e faapea, o tu’uaiga mo le fa’apa ina o le la’au malosi i Lalovaeea, o lo’o fa’aauau ai pea a latou su’esu’ega, i le tau sailiga o le la’au malosi.

Ma na ta’ua e Auapa’au le tete’e e lo latou ofisa, ia le toe tatalaina i tua o Pauga, ae peitai, o le fa’aiuga na faia e le faamasinoga.

O le vaiaso fou lea ua fuafua e tula’i ai Pauga i luma o le fa’amasinoga a’o fa’aauau pea su’esu’ega a leoleo.

Na fa’aalia e Autagavaia lona le fiafia i le toe tatalaina i tua o Pauga, ona ua le mafai ai ona ia toe fo’i i lona aiga.  Ae o le a fa’amautu ai i Savaii se’ia mae’a iloiloga a le faamasinoga.