POU TIUTE A LEOLEO

Pago Pago - AMERIKA SAMOA

MOLIA SE ALII I LE O’O O LONA LIMA I LONA TUAFAFINE

O le aso 18 o Ianuari, 2025, na fa’afeso’ota’i ai e se tina ia le ofisa a leoleo i Tafuna ma ripotia ai sona ‘nephew’ ua ia sauaina sona tuafafine, i se ulo fai mea’ai, a’o tu le tama teine e 9 tausaga a lona tuafafine, i tafatafa o lona tina.

Sa faamatalaina e le ‘aunt’ lea sa ovalaau i le ofisa a leoleo, ina ua fa’atalanoaina e leoleo, sa le gata ina fa’aaogaina e Johnny Talia (lea ua molia) ia lona tuafafine i le ulo fai mea’ai, ae sa ia taumafai foi e togi i se alu lima, ae na misi.  Faapea ai ma lona faalalaina le oti i lona tuafafine.

Na ta’ua foi e le ‘aunt’ lona otegiaina o Talia e tusa ai ma le tulaga ua ia faia i lona tuafafine, ae palauvale mai Talia ia te ia ma faatonu o ia e alu ese ma le latou fanua.  O iina na vala’au ai loa e le ‘aunt’ ia le ofisa a leoleo.

Ina ua taunu’u leoleo i le nofoaga na tupu ai le faalavelave sa o latou molimau le fefefe o le teineititi 9 tausaga ma lona ‘aunt’ lea sa faatalitali atu i fafo o le taavale mo lo latou taunuu atu.

Sa fa’amatala foi e le ‘aunt’ i leoleo, na ia alu atu e momoli atu le tamaitai na a’afia ma si ana tama teine i lea aso, ae oso mai fafo le tuagane o le tamaitai ma amata ona ‘e’e i le tamaitai ma tu’uaia o ia i lona ‘aia o lana (Talia) mea’ai i le taeao.  Ma e le’i o’o le tamaitai na a’afia ma lona alo, i totonu o le fale, ae togi e Talia i le ulo fai mea’ai ma tau i le ulu o le tamaitai (lona tuafafine).

O le mea lea sa oso ai i fafo ma le ta’avale i le ‘aunt’ lea na valaau i le ofisa a leoleo, ma otegia le na molia ma ia faatonuina le tamaitai na a’afia, e o ma lana tama i totonu o lana taavale, e faatalitali ai le taunu’u atu o leoleo.

Sa ta’ua foi e le Aunt, e le o se taimi muamua lea ua tupu ai lea tulaga.

Ma na fa’amaonia uma faamatalaga a le ‘aunt’ e le tamaitai na a’afia ma sa ia fa’ailoa atu foi i leoleo le togiina e le na molia, ia lana tama teine i se salu lima.  Ma na fa’aalia e le tamaitai na a’afia lona fefe ina ne’i fasioti o ia e le na molia.

Ae ina aveina e leoleo ia le ua molia ma su’esu’eina i le ofisa a leoleo, sa te’ena e Talia ia fa’amatalaga uma a lona ‘aunt’.

Na molia ia Talia i moliaga o le Faatupu Vevesi i totonu o le aiga, o se vaega ‘C’ i solitulafono mama, e mafai ona nofosala ai i le falepuipui mo aso e 15, po o sala tupe e $300; po o moliaga uma e lua.

Faapea ai ma le moliaga o le Fa’ao’olima i lona tulaga e tolu, o se vaega ‘A’ i solitulafono mama, e mafai ona nofosala ai i le falepuipui mo le tausaga atoa, po o se sala tupe e $1,000; po o faasalaga uma e lua.

FA’ASAOINA E LE ‘MARINE PATROL’ IA NI FANAU TALAVOU I GATAI O LAULII

O le aso Toonai o le vaiaso ua mavae, sa fa’asaoina mai ai e le au faigaluega o lo’o mataituina le gataifale (Marine Patrol) ia ni tamaitai talavou se to’atolu ma se alii talavou e to’atasi mai i gataifale o Laulii.

E tusa ai ma ripoti o lenei faalavelave, sa tafefea atu nei fanau talavou ona o le malosi o ave o le sami, i le afiafi o le aso Toonai ma o le 5 i le afiafi lea na maua ai e le Marine Patrol ia se valaau mo se fesoasoani.

MOLIA SE ALII I LE MUSU E TOTOGI IA VAEGA O LE TAAVALE ‘RENTAL’ SA LEAGA IA TE IA

O le aoauli o le aso 8 o Tesema, 2024, na o’o atu ai le susuga ia Demetry Fuiava ma lona to’alua i le ofisa a leoleo i Fagatogo, faatasi ma le pule o se fale taavale ‘rental’, e tusa ai ma se taavale ua faaleagaina.  Sa ta’ua e le to’alua a Fuiava, na leaga le taavale ona o se la misa ma lona to’alua.

Ina o taitai atu e leoleo ia Fuiava i totonu o se potu mo le fa’atalanoaina o ia, na faapea mai Fuiava i leoleo ma le pule o le fale taavale, o le a ia totogia ia vaega o le taavale ua faaleagaina.

Ina ua fa’atalanoaina e leoleo ia le to’alua a Fuiava sa ia ta’ua e faapea, na valaau atu lona to’alua (Fuiava) ia te ia, e alu atu e piki le tupe e fai ai se latou faatau ma le la fanau e to’alua, aua e nofo Fuiava i Aunu’u.

Na ta’ua foi e le tina le tulaga faaletonu o le la ulugalii.

Ma sa ia ta’ua foi e faapea, ina ua ia taunu’u i Auasi sa tula’i mai se fe’ese’esea’iga i le la va ma tu’i ai e Fuiava ia luma o le taavale ma faaleagaina ai.  Ae ina ua oso foi Fuiava i fafo ma le taavale, sa ia tago i le togi le faitotoa ma fa’aleagaina ai foi le faitoto’a.

Ma sa ta’ua foi e le tina, ia le taumafai o Fuiava e fa’ata’avale ia le taavale.  Ma ina ua toe oso atu Fuiava i totonu o le taavale, sa faapea loa o la o sa’o atu loa i le ofisa a leoleo i Fagatogo, ma na ia valaau foi i le pule o le fale ‘rental’ e alu atu i le ofisa a leoleo.

O iina i le ofisa a leoleo, na fa’ailoa atu ai e le tina ia vaega uma o le taavale sa faaleagaina e le ua molia ma sa faapea foi ona su’esu’eina e leoleo ia vaega o le taavale na fa’aleagaina.

Sa fa’atonuina e leoleo ia le pule o le fale ‘rental’ ina ia saili se ‘mechanic’ e faia se taumatega o le tupe o vaega ua fa’aleagaina ma le toe fa’aleleia.  Sa faapena ona fa’afeso’ota’i e le pule o le fale ‘rental’ ia le kamupani a le ASCO i Pago Pago.

O le aso na soso’o ai, Ianuari 9, 2025, sa fa’ao’oina atu ai e le pule o le fale ‘rental’ i le ofisa a leoleo ia fa’amaumauga, e aofia ai ma le ata o vaega o le taavale ua faaleagaina faapea ma se taumatega o le aofai o le tupe e toe fa’aleleia ai.

Sa fa’ailoa atu e le ASCO i le pule o le fale ‘rental’, o le tau aofa’i o vaega e toe fa’afou ai le taavale, e pe a ma le $1,787 ae e le mafai e le latou kamupani ona suia vaega o le taavale ua faaleagaina.

O le mafuaaga lea na toe saili ai e le pule o le fale ‘rental’ ia seisi kamupani mo le faataunu’uina o lea galuega, ma o le tau aofai atoa o ‘parts’ ma le faia o le galuega, e pe a ma le $3,478.00

Ae na toe fiu leoleo e saili Fuiava mo le totogia o le galuega mo le toe fa’aleleia o le taavale, ae peitai, na o latou fiu e saili le alii, ona ua le toe nofo i Aunu’u ae o le tala mai i nisi o ana uo, o lo’o fuafua lona tuafafine e ave i atunu’u i fafo le na molia.

O moliaga sa faia e faasaga ia Fuiava, na aofia ai le Faaleagaina o ni mea totino i lona tulaga muamua, o se vaega ‘D’ i solitulafono mamafa, e mafai ona nofosala ai i le va o aso e 90 ma le lima tausaga, po o se sala tupe e $5,000; po o faasalaga uma e lua.

Faapea mam le Faatupu Vevesi i totonu o le aiga, o se vaega ‘C’ i solitulafono mama, e mafai ona nofosala ai i le falepuipui e o’o atu i aso e 15, po o se sala tupe i le va o le $150 ma le $300; po o faasalaga uma e lua.

E $5,000 se vaegatupe na fa’atulagaina mo le tatalaina o le na molia, e faatalitali a llona faamasinoga.

MOLIA SE ALII 55 TAUSAGA I LE FA’AMALOSIA O SE TEINEITITI E 11 TAUSAGA

O le po o Ianuari 11, 2025, na o’o atu ai se tina loto mafatia i le Ofisa a Leoleo i Fagatogo mo le failaina o se ripoti e faasaga i se alii e 55 tausaga, i lona faamalosia o le tama teine a lenei tina, e 11 tausaga le matua.

(O le a le ta’ua le suafa o le ua molia ona o le talavou o le tamaitai na a’afia i lenei faalavelave.)

E tusa ai ma fa’amaumauga a le faamasinoga, sa fa’atalanoaina e leoleo ia le tamaitai na a’afia, i luma o lona tina ma o le po lava lea na lokaina mai ai e leoleo ia le ua molia, ma logoina foi le ofisa e gafa ma le puipuiga o fanau (Child Protective Services).

I le faamatalaga ale tina, o le ua molia, o se uo a lona to’alua ma sa avatu e lona to’alua e nofo i le latou fale se’i maua sona fale e nofo ai.

Ae peitai, o le po lea, na alu atu ai le tuagane a le teineititi ma ona va’aia le ua molia, o taoto mai i luga o le teineititi.  Ma na alu ai le tamaititi ua fai i lona tina e tuli ‘ese le ua molia mai i le fale, ae na te le’i faamatalaina i lona tina le mea na tupu.  Ae o se taimi mulimuli ane ai, sa faamatalaina ai e le teineititi i lona tina le tago atu o le ua molia, i ona itutino sa.

Ina ua fa’alogo le tina i le faamatalaga a lana tama teine, sa alu sa’o loa i le ofisa a leoleo ma ave lana tama teine i le falemai mo le su’esu’eina.  

I le molimau a le teineititi na a’afia, sa ia ta’ua ai le iai o lona tina ma le ua molia i totonu ole potu malolo o le latou fale i le po na tupu ai le faalavelave.  Ma sa faatonu o ia e lona tina e alu e ta’ele, a mae’a ona alu lea i luma o le fale i le mea o iai tu’ugamau a le aiga.

Ae peitai, ina ua mae’a ona faia e le teineititi faatonuga a lona tina, na alu atu le ua molia ma fesiligia o ia po o fai sona ofuvae, ae na tali le teineititi e leai, e na’o lona ie lavalava ma lona ofu laititi.

Ma na fa’atonuina e le ua molia ia le teineititi e aua ne’i faia le faatonuga a lona tina ma o le mea lea na alu ai le teineititi ma taoto i luga o le nofoa sa i totonu o le potu malolo ma kava lona tino i se palanikeke ma matamata ana ata vitio i luga o lana telefoni.

Sa ta’ua e le teineititi le alu atu o le ua molia ua nofo i ona autafa ma amata ona tago tau i ona itutino sa ma amata ona fa’amalosia o ia.  Na ta’ua e le teineititi lona taumafai e ‘e’e ae peitai, sat ago le ua molia i le ‘o’omi lona gutu.  

Ma o le taimi lea na savali atu ai lona ‘uncle’ ma ia va’aia le mea o tupu ma ia tosoina ‘ese mai le ua molia, ma tamo’e ai loa i fafo le ua molia.

Sa ta’ua foi e le tamaitai le iai o se tulaga na tupu muamua, lea na fesili atu ai le ua molia ia te ia, pe mana’o e la te faiaiga.  Na ta’ua e le teineititi lona fefe e ta’u i lona tama ia le mea sa tupu ina ne’i fasi e lona tama ia le na molia, ona loka ai lea o lona tama.

Ina ua fesiligia e leoleo ia le teineititi po o ona manatua ia le aso na tupu ai le faalavelave muamua, sa tali le teineititi, o lo’o ia manatua o le masina o Tesema ae ele’i o’o i le kerisimasi.

Ae ina ua fa’atalanoaina e leoleo ia le ua molia, sa ia ta’ua e faapea, o le teineititi na alu atu ia te ia ma tu’u ona lima i luga o lona fatafata ma sa ia fa’atonuina le teineititi e ‘aua, ae peitai, sa le’i usitai le teineititi.

O le po lava lea sa lokaina ai le ua molia.  Ma fa’ataunu’uina ai suesuega a le CPS.  

Ina ua fa’atalanoaina e leoleo ia le molimau (le tuagane) sa ia ta’ua lona fo’i atu i le latou fale i lea po ae ona va’aia le taoto mai le ua molia i luga o le teineititi ma sa ia tuli’eseina le ua molia mai le fale ma faatonu e aua ne’i toe fo’i atu i le latou fale.

O moliaga ua molia ai nei le alii 55 tausaga, e aofia ai le Faamalosi tagata, o se faia o uiga mataga i se teineititi ma le faia o ni tulaga e a’afia ai le saogalemu a fanau.

E $50,000 le vaegatupe na fa’atulagaina e mafai ona tatalaina ai le ua molia, e faatalitali ai lona faamasinoga.