Maua e leoleo ia le gaoi ae ua mae’a ona fa’atau uma meatotino na ia gaoia

Pago Pago - AMERIKA SAMOA

O le aso 5 o Ianuari, o le tausaga nei, na lokaina ai e leoleo ia le susuga ia Paulo Maugaotega ma molia o ia i le gaoi ma le faomea, atoa ma le fa’aleagaina o le fale a le aiga na ia osofaia.

E ui ina sa sola lenei alii 22 tausaga, ae peitai, sa mafai ona pu’eina o ia e leoleo ma molia i le tulafono.

E tusa ai ma fa’amaumauga a le faamasinoga, sa osofaia e Maugaotega ia le fale o se aiga ma gaoia ia se ato tupe a se alii e nofo ai (o ia foi lea na logoina le ofisa a leoleo e tusa ai ma lenei faalavelave).  Sa i totonu o le ato tupe ia se tinoitupe na i le va o le $650 ma le $750.00.  Ma sa ta’ua e le alii na a’afia, o le tau aofa’i o mea uma na gaoia, e $3,000.00.  Sa ave foi e le ua molia ia se ato a le tua’a o le alii na a’afia, na iai i totonu se telefoni.

Ina ua taunu’u leoleo i le nofoaga na tupu ai le faalavelave, sa fa’aali iai e le alii na a’afia ia le ata vitio o le osofa’iga ma na molimauina e leoleo ia le fa’aaogaina e le ua molia, ia se naifi e tipi ai le uaea (screen wire) a le faamalama.

Na fesiligia e leoleo ia le alii na a’afia pe faapefea ona ia iloa o Maugaotega lea e i totonu o le vitio, sa ia tali, e na te iloa gofie i lana savali.  Sa faapea foi ona fa’aalia lenei vitio i le tuafafine ma le tua’a o le na a’afia, faapea ma ona tuaoi ma sa o latou fa’amaonia uma, o Maugaotega le tagata lea sa i totonu o le ata vitio.

Sa faasino e le na a’afia i leoleo ia vaega uma o lona fale na o’o iai le osofaiga a le ua molia, faapea ma le faitoto’a lea na ulufale ma ulufafo mai ai.  Sa ta’ua foi e le alii na a’afia, e le lokaina faitoto’a o le latou fale, i le po.

Na taumafai leoleo e saili Maugaotega i lea aso, ae peitai, sa le’i mauaina o ia ma sa o latou fa’atonuina ai le na a’afia ina ia logoina atu le ofisa a leoleo, pe a toe va’aia Maugaotega i le latou eria.

O le aoauli o lea lava aso, na toe maua ai e le ofisa a leoleo se valaau mai i le na a’afia, ma ia fa’ailoa mai ai le iai o Maugaotega i le latou fale i Asili.  O iina na lokaina mai ai e leoleo ia Maugaotega ma aveina atu i le ofisa a leoleo.

I le fa’atalanoaga ma leoleo, sa fa’amaonia e Maugaotega ia tu’ua’iga faasaga ia te ia, ae ua mae’a ona ia fa’atauina atu meatotino uma sa ia gaoia, i nisi i Vaitogi, ae na musu e ta’u igoa o i latou sa ia fa’atauina atu iai.

O le aso 6 o Ianuari, 2025 na o’o atu ai le alii na a’afia i lenei faalavelave mo le faia o sana faamatalaga tusitusia ma sa ia ta’ua i lana faamatalaga le molimauina o le faatauga o ana meatotino, e le uso matua a Maugaotega.

E le gata i lea, sa alu atu foi le uso a Maugaotega i lo latou fale i le aoauli, ma na ia valaauina leoleo ma ave’eseina atu ai o ia.

O moliaga o Maugaotega, e aofia ai;

Faitauga 1:  Faomea i le tulaga muamua, o se vaega ‘B’ i solitulafono mamafa, e mafai ona nofosala ai i le falepuipui i le lima tausaga, po o se sala tupe; po o faasalaga uma e lua.

Faitauga 2:  Gaoi, o se vaega ‘C’ i solitulafono mamafa, e mafai ona nofosala ai i le le sila ma le fitu tausaga, po o se sala tupe e $5,000; po o faasalaga uma e lua.

Faitauga 3:  Faaleagaina o mea totino; o se vaega ‘B’  i solitulafono mama, e mafai ona nofosala i le falepuipui mo le ono masina, po o se sala tupe e $500; po o faasalaga uma e lua.

E $30,000 le vaegatupe na fa’atulagaina e mafai ona tatalaina ai le ua molia, e faatali ai lona faamasinoga.