TALA I VAIFANUA

Pago Pago - AMERIKA SAMOA

TAUVAGA TAUSALA A LE KOLISI

O le fa’ai’uga o le vaiaso nei, ua fuafua e toe fa’ataunu’uina ai le Tauvaga Tausala a le Kolisi Tu’ufa’atasi a Amerika Samoa (ASCC), lea sa le toe faia talu mai le tausaga e 2019, ona o le Koviti19 ma isi lava fa’afitauli na taofia ai le toe fa’ataunu’uina o lenei tauvaga, se’ia o’o mai i le tausaga nei.

Ua mafai ona toe fa’ataunu’uina lenei tauvaga taua, ona o le galulue malosi a le Vaega o Auaunaga mo Fanau Aoga i totonu o le Kolisi (ASCC Student Services Division) faapea le Asosi o Fa’alemalo a fanau aoga (Student Government Association).

Sa saunoa le tamaitai o Falaileato Suiaunoa, se sui o le SGA ma o ia foi lea o lo’o gafa ma le tapenapenaga o lenei faamoemoe, o le sini autu mo lenei tauvaga fa’asikolasipi, ina ia faapaleina se tamaitai e mafai ona avea ma sui o vaega lelei uma o le kolisi.

Ma sa ia ta’ua foi le avea o le o le a manumalo, ma amepasa mo fanau aoga, faiaoga ma taitai o le aoga, ma se sui aloaia o le SGA.  Ma o le a avea foi o ia ma sui o le ASCC i so’o se polokalama e auai ai.

Na fa’aalia mai foi e Suiaunoa, e le gata i le aulelei o sui tauva, ae faapea foi le atamai ma le talenia.

E toatolu i latou ua saunia e tauva i le po o le aso Toonai, e aofia ai Glorious Tuigamala-Lisala, e 19 tausaga, lea o lo’o lagolagoina e le ‘Impact Club’.  O Glorious e malaga mai i le afioaga o Leone ma o ana mataupu o lo’o tauaveina i le kolisi, o ACNR/Land Grant.

O le sui tauva lona lua, o Anastasia Leutele, e 23 tausaga mai i le afioaga o Fagaitua, ma o lo’o lagolagoina o ia e lona aiga.  O ana mataupu o lo’o tauaveina, o le ‘Liberal Arts’.

Ma le sui tauva lona tolu, o le tamaitai o Lolomaletaiotumua Faoliu, mai afioaga o Nu’uuli ma Leone.  E 20 ona tausaga ma o lo’o lagolagoina o ia e “Le Lagaali Atelier” ma le ‘House of Flying Daggers’.

E lima vaega o le a tauva ai nei tamaitai, e aofia ai Laei Fa’ataupou, Siva Samoa, Taleni, Laei o le afiafi ma ana faatinoga i lea afiafi.

UMUSAINA LE FALE TA’ALO FOU A LE AOGA TULAGA MUAMUA A LE’ATELE I FAGASA

O le aso Lulu o le vaiaso ua tuanai, Mati 12, 2025, sa faapaiaina ma tatala aloaia ai le fale ta’alo a le a’oga tulaga muamua a Le’atele, i le afioaga o Fagasa.

Sa auai atu i lea sauniga taua ia le afioga i le Kovana Pulaali’i Nikolao Pula ma le faletua ia Lois Phillips-Pula, o sui o le kapeneta, taitai o le aoga a Le’atele ma le aiga faiaoga, o le aufaigaluega faapea alo ma fanau aoga, atoa ai tupu ma e’e o le afioaga, faletua ma tausi aemaise le malosi o le nu’u.

O le susuga i le Faifeau Toeaina ia Filipo Tu’igamala sa fofogaina le tatalo mo le fa’apaiaina o le fale ta’alo fou.  Ae o le faletua a le kovana, sa na ia taua’aoina le lipine e tatala aloaia ai le faleta’alo fou.

O le tamaitai puleaoga ia Ramona Mata’u sa fa’afeiloaia le mamalu na aofia potopoto i le ataeao, ae o le susuga i le Faafeagaiga ia Fepuari Logoleo sa laugaina le aso.

Ae o le saunoaga autu o le sauniga, sa fa’aleoina e le afioga i le Kovana ma na ia fa’aalia lona agaga fa’afetai i le tamaitai pule mo le vala’auliaina o i la’ua ma lona faletua i lenei fa’atasiga fiafia.  Aemaise ai o le latou galulue punoua’i ma lo latou tu’uto i le ta’ita’iina o le aoga.  E le gata i lea, o matua mo le agaga alofa ma le lagolagoina o alo ma fanau, o le lumanai, e le gata mo na’o le nu’u, ae faapea foi le atunu’u atoa.