Pasia e le Senate ia Unasa Ledoux e avea ma Faatonu o le Ofisa o Faatauga a le malo

Pago Pago - AMERIKA SAMOA

I le aso Faraile o le vaiaso ua mavae, i a latou taualumaga masani, na pasia ai e afioga i Senatoa e to’a 17 ia le tofiga o le susuga ia Frederick Unasa Ledoux, e avea ma fa’auluuluga o le Ofisa o Faatauga a le malo.

O le pasiaina o Ledoux sa faia, ina ua mae’a o sona iloiloga i luma o le Komiti o le Faagaioiga o le Malo a le Senate, lea sa fa’afoeina e le susuga i le Taitaifono, le afioga i le Senatoa ia Togiola T.A. Tulafono.  

I lona iloiloga sa faapea ona mauaina ai e Ledoux ia ni timaiga ma lapataiga ,faapea faamanuiaga mai i tama matutua o le atunu’u.

Na aloaia e le Peresetene o le Senate, le afioga i le Senatoa ia Tuaolo Manaia Fruean ia Ledoux, o se tasi o alo o le afioaga o Pago Pago, faapea ai ma lana tautua i totonu o vaega’au a le malo tele, ae le’i toe taliu mai ina ua litaea.  Talu ona toe fo’i mai Ledoux i le teritori, sa faapea ona ia galue malosi o ia i totonu o le Aumaga a le nu’u ma ua lauiloa ma fa’aaloalogia ai o ia, e le gata i totonu o lona nu’u ae faapea foi nisi o le atunu’u.

Sa ta’ua e Tuaolo ia le avea o Ledoux ma Taustupe a le latou Aumaga, i le taimi nei, ma o se tagata ua fai ma fa’ata’ita’iga lelei mo le autalavou ma fanau iti o le laotu nu’u.  Na saunoa Tuaolo, i le avea o Ledoux ma ona lima taumatau, i le tele o fuafuaga a le latou nu’u.

Na fa’amamafaina e le afioga ia Tuaolo ia le tele o se aitalafu o lo’o nonofo ma tagata o le teritori, i alo ma fanau o lo’o fa’apea ona ulufale atu i totonu o vaega’au, ma ia ta’ua ai le iai o nisi ua maliliu i la latou tautua faalemiliteri.

Ae o nisi, e pei ona sa saunoa Tuaolo, ua pei o Ledoux, ua o latou toe fo’i mai e fa’aauau la latou auaunaga i totonu o le malo ma tagata o Amerika Samoa.

Sa faapea ona fa’aluaina e le afioga i le Senatoa ia Gaoteote Palaie Tofau – o se tasi o vetereni o le Ami, ia le saunoaga a Tuaolo.  I lona toe tomanatunatu i lona foi vaitaimi i totonu o vaega’au, sa saunoa ai Gaoteote i le ta’ua o i latou o atalii ma ia faaleoina lona agaga fa’afetai ona o i latou, e pei o Ledoux, ua filifili e toe fo’i mai e atina’e le atunu’u.

Na fa’amamafa mai e Gaoteote e faapea, o lo’o matua’i mana’omia lava ni taitai lelei i nei vaitaimi.  Sa faapea ona u’una’iina e Gaoteote ina ia tula’i ma ia avea ma ta’ita’i.

Sa fa’aleoina e le afioga i le Senatoa ia Tuana’itau Malaki Togiola le o’otia o lona agaga i lona molimauina o le saunoaga a Gaoteote ma ia fa’atuina ai loa se mau ina ia tu’umuli atu loa Ledoux.

I le saunoaga fa’ai’u o le iloiloga, a le Taitaifono o le Komiti, le afioga i le Senatoa ia Togiola T.A. Tulafono, sa ia fa’apupulaina ai le fa’atuatuaina o Ledoux e tama matutua o le atunu’u, ona o l emolimau a le Peresetene o le Senate, le afioga Gaoteote aemaise o le tala’aga o lona soifuaga tautua.

Sa fautuaina e Togiola ia le sui Faatonu ina ia taitai ma le alofa ma le faamaoni, ma ia saili se taitaiga mai i le Atua aua lana tautua.

Na faapea ona fa’aleoina e Ledoux le agaga fa’afetai i fautuaga ma tima’iga mai i afioga i Senatoa ma ia folafola mai lona usita’ia o a latou fautuaga, pe afai ae pasia o ia e avea ma Faatonu.