Finagalo taitai Pasefika i Niu Sila ina ia tatalaina avanoa mo femalagaiga e aunoa ma VISA

NIU SILA

Ua ta’ua e se tagata atamai i tulaga o femalagaiga mai i Niu Sila, le le tatau ona tatalaina o le polokalama o le ‘visa-free travel’ po o femalagaiga e aunoa ma le manaomia o se visa, i tagata asiasi mai i motu o le Pasefika, e ui ina sa fa’alauiloa mai e le Palemia o Niu Sila, ia Christopher Luxon, le le fa’atauaina o lea tulaga.

O lo’o ua taumafai nei le Itu Meamata (Green Party) a Niu Sila, e talosagaina le malo ina ia tatalaina ia femalagaiga e le manaomia ai ni VISA (visa-free travel) ina ia aofia ai tagata asiasi mai, mai motu o le Pasefika.

Ma ua faapea foi ona lagolagoina lea tulaga o le femalagai o tagata e aunoa ma ni VISA, e taitai o le Pasefika, i tausaga lata mai, e aofia ai Fiti, Samoa ma Tonga.

E lata i le 60 atunu’u ua mafai nei ona ulufale atu i totonu o Niu Sila e aunoa ma le manaomia o se VISA, ae e le o aofia ai se motu o le Pasefika i lea faamanuiaga.

Sa fa’aalia e se alii loia mai Fiti, le susuga ia Lavi Rokoika, ia lona maofa i le le o iai o le latou atunu’u i lea lisi.  Ma sa ia ta’ua e faapea, o se tulaga ua leva ona nofo faatalitali ai tagata o le Pasefika, aemaise lava ia mafutaga a motu iti o le Pasefika ma Ausetalia ma Niu Sila.

Ae peitai, sa ta’ua e June Ranson, o se faufautua i laisene tau femalagaiga, e le o se fuafuaga lelei lea manatu.  Na ta’ua e Ranson e faapea, o tagata o le Pasefika, o ni tagata e fiafia tele e nonofo i Niu Sila, i se taimi e sili atu nai lo aso faatagaina.

Ua talitonu Ranson i le leai o se mafuaaga mautu e toe fia fo’i ai tagata Pasefika i o latou motu ma aiga.  Ma sa ia ta’ua e faapea, i sona talitonuga, e manaomia ona toe tu’u atu e Niu Sila se lagolago malosi i motu o le Pasefika, ina ia mafai ona faamautuina avanoa faigaluega i totonu o motu ‘ese’ese.

Sa lagolagoina e Rokoika ia le popolega i tagata o le Pasefika ia e malaga atu i Niu Sila ma le toe fo’i i o latou motu, o se tulaga e tupu foi i isi atunu’u, ae i sona talitonuga, o le te’ena o lea manatu ina ia tatalaina le avanoa mo tagata Pasefika, e le na’o le pau lea o se auala e mafai ona fofoina ai lea faafitauli.

Ua ta’ua e Luxon e faapea, o lenei polokalama (visa-free travel), ua na o se polokalama o lo’o fa’aauau pea ona o latou iloiloina ae e le o ave iai le latou faamuamua i le taimi nei, ona o lo’o iai nisi tulaga e ao ona ave iai le latou faamuamua.

Sa fesiligia e le vaega fa’asalalau a le RNZ (Radio New Zealand) ia le Minisita o Femalagaiga, ia Erica Stanford pe sili atu a’afiaga mai motu o le Pasefika, nai lo isi atunu’u e 60 o lo’o maua lenei faamanuiaga, sa ia saunoa mai e faapea, e silia ma le 120 atunu’u e le o maua e i latou lea faamanuiaga.

Na ta’ua e le so’oupu a le Itu Meamata (Green Party) o Teanau Tuiono e faapea, o le taimi nei e le o faigofie e aiga ma tuaoi ona asiasi mai ma o se tulaga e tiga ai le  loto mo le toatele o iai sootaga i le Pasefika, ma o lo’o fia malaga mai aiga ma uo e asiasi mai i Niu Sila.

Ma ua talitonu Tuiono, i le tele o faafitauli faavaomalo o lo’o tutupu mai, e taua tele ona tatalaina lenei tulaga (visa-free access) mo le Pasefika.  Ma sa ia ta’ua ai foi le iai o se fa’ailoga lanu i totonu o faigamalo, lea e ave ai le fa’amuamua i tagata Europa.