Finagalo Amata ia faafaigaluegaina e le teritori ia tagata faigaluega feterale ua faate’aina

Pago Pago - AMERIKA SAMOA

I se tali mai a le sui Faipule a Amerika Samoa i Uasigitone, le afioga Uifa’atali Amata Radewagen, ina ua fesiligia e le Samoa news e tusa ai ma fuafuaga fa’ata’atia, pe afai ae o’o ina a’afia Amerika Samoa i le taofia o vaegatupe mai i le Malo Tele, sa ia fa’aalia mai ai lona taumafai ina ia fesoasoani i tagata o lo’o galulue i galuega feterale, o le a faapea ona a’afia a latou galuega.

I le aso Gafua na se’i mavae atu, sa faapea ona lomia ai e le Samoa News ia se ripoti e tusa ai ma ni popolega ua feagai ma tagata o le atunu’u, ona o tulaga o lo’o tutupu mai i Amerika, e le gata i le taofia o fesoasoani tau tupe i le tele o polokalama feterale, ae faapea foi, le fa’ate’aina o le toatele o tagata faigaluega feterale, e le faigamalo a Trump.

Sa ta’ua ai foi i lea lomiga le laititi po o le leai o se faamatalaga ua maua mai i le Faigamalo fou, po o le Fono Faitulafono, i ni fuafuaga faata’atia pe afai ae o’o mai nei suiga i totonu o le teritori.

Ae ua fa’alauiloa mai e Amata, tauala mai i sana fa’aaliga fa’alauaitele, o le a ia fa’afeso’ota’ia ia fa’auluuluga o ofisa feterale, pe afai ae fa’ate’aina nisi o tagata o le atunu’u mai a latou galuega feterale, ma u’una’ia i latou ina ia toe fa’afaigaluega i latou.

Ma ua u’una’ia ai foi e Amata ia tagata faigaluega feterale, e ono tupu ai ia tulaga, ina ia fa’afeso’ota’i vave atu lona ofisa, ina ia mafai ona vave faia se feso’ota’iga ma fa’auluuluga o a latou ofisa po o galuega, ma finauina le toe fa’afaigaluegaina o i latou.

O le a manaomia foi e le ofisa a Amata ia galuega ma o latou tiute sa faatinoina, ina ia mafai ai ona ia fa’amanino lelei i pule o nei ofisa le faigata ona sailia o ni tagata faigaluega lelei ma le agava’a mo ia avanoa i totonu o Amerika Samoa, mai i atunu’u i fafo.

Ua fa’aalia foi e Amata e faapea, o le tele o taimi e feagai ai pisinisi ma le to’alaiti o ana tagata faigaluega ona o le tulaga i le va o Amerika Samoa ma le Malo Tele, ae o le a ia fa’amanino atu i fa’auluuluga o ofisa feterale o iai ni a latou tagata faigaluega i ofisa i totonu o le teritori, le avea o lea tulaga ma se itu lelei. 

Sa ia ta’ua foi le iai o nisi sa fa’ate’aina mai galuega, ae ua mafai ona toe maua a latou galuega.  Ma o se tulaga o le a ia finau malosi ai, ina ia mafai ona toe fa’afaigaluegaina tagata faigaluega a Amerika Samoa, o lo’o galulue i totonu o galuega feterale.

Na fa’aalia e Amata lona agaga alofa i tagata o Amerika Samoa ma o latou aiga, ma le fa’ate’ia o tagata uma, e le gata i atunu’u i fafo ae faapea foi i totonu o le teritori, e tusa ai ma nei suiga.

Ma sa ia fa’aalia foi lona agaga malamalama i popolega o lo’o feagai ma tagata o le atunu’u, aemaise lava pe afai o ni fa’afitauli e ono a’afia ai galuega.

Ae ua ia folafola mai, lona nofo sauni e finau mo tagata faigaluega uma o le atunu’u, o le a a’afia i suiga fou ua o’o mai.

Ua ta’ua e Amata e faapea, o le taimi nei i totonu o le malo (a Amerika), o se taimi muamua lenei ua fa’aitiitia ai tagata faigaluega o le malo, e pei ona masani ai kamupani ma ofisa faigaluega tua, ae o le a ia u’una’ia ia ofisa feterale ma fa’ailoa atu ia i latou le tulaga taua o iai tagata faigaluega feterale a le teritori, e ono a’afia a latou galuega.

Sa ia ta’ua lona malamalama i suiga ia o lo’o feagai ma le malo i le taimi nei, o se taumafaiga ina ia mafai ona fa’aleleia atili ai le faagaioiga o le malo, e ala i le ave’esea o le fa’amaimau o tupe ma taimi – ae peitai, ua ia talitonuga, o so’o se suiga lava e tatau ona iai sona mafua’aga tatau, ae le na’o na faia lava o nei suiga.

Na fa’alauiloa mai foi e le sui Faipule e faapea, atonu o le afiafi ananafi, e ono mafai ona maua mai ai seisi fa’amalamalamaga atili mai i le saunoaga a le Peresetene (Trump), ae i sona talitonuga, atonu e le tapunia le malo (o Amerika), ae e foliga mai o le a faia se I’ugafono e mafai ai ona fa’aauau galuega a le malo, seia o’o atu ia Setema 30, e pei ona saunoa ai taitai o le Senate a Amerika.

Ua ta’ua foi e Amata le tele o nisi suiga o le a faia, ona e le mafai ona fa’aauau pea ona fa’agaioi le malo ma le tele o aitalafu o faapea ona a’afia ai auaunaga a le malo, mo le to’atele.

Ae i sona manatu fa’aalia, e tatau ona taga’i toto’a i auaunaga ma vaegatupe taua mo polokalama, aemaise lava le Medicaid, Medicare ma Saogalemu, ina ia mafai ona fa’aauau ona lagolagoina e le malo feterale ia tagata o Amerika Samoa.

TALAAGA

I se tala mai i le Faatonu a le Samoa News, o lo’o fia fa’ailoa mai ai le fa’asaga atu o le vaega a le DOGE i le polokalama o le Saogalemu ma ana tagata faigaluega e 7,000 lea ua tele ina fa’ate’a mai a latou galuega, ma le tapunia o le tele o a latou ofisa.

Ua fa’aigoaina e Elon Musk (o ia lea o lo’o fa’auluulu i le DOGE) ia le polokalama o le Saogalemu, o se ‘ponzi scheme’, ma ua ia sailia ni auala e mafai ona ave’ese ai nisi o ana penefiti, e aofia ai ma le Medicare.

O nisi o fautuaga mai i tagata o lo’o malamalama tele tusa ai ma nei suiga fou, ua fautuaina ai i latou o lo’o tali a latou Saogalemu, ina ia amata ona sefe faalelei a latou tupe, ina ne’i o’o mai se taimi e taofia ai lenei polokalama.