POU TIUTE A LEOLEO

Pago Pago - AMERIKA SAMOA

VALA’AU SE TINA I LEOLEO E AVE SANA TAMA FAATUPU FAALAVELAVE

E tusa ai ma fa’amaumauga a le faamasinoga, o le aoauli o le aso 21 o Tesema, 2024, sa faapea ona vala’au atu ai se tina i le Ofisa a Leoleo i Fagatogo mo se fesoasoani i le ave’esea o lona alo, o Peter Tiamaniani, mai lona fale.

Sa ta’ua e le tina, le taumafai o Tiamaniani e tui se tamaloa i se naifi ma na iai foi se popolega i le tina, ina ne’i ona faia se tulaga e ono manu’a ai lona tuafafine.

Na faapea ona agai atu leoleo i le nofoaga na tupu ai le faalavelave ma sa ta’ita’ia i latou, e le tina na valaau mai i le ofisa a leoleo, i le fale sa moe ai Tiamaniani.  Sa faapea ona talosagaina e leoleo ina ia ave’esea ia Tiamaniani mai i le fale.

Sa faapea ona fa’atalanoaina e leoleo ia le tina ma sa ta’ua e le tina, e iai sona masalosaloga o lo’o tagofia e lona alo (Peter Tiamaniani) ia vaega o fualaau faasaina.  Ma na ta’ua e le tina le taumafai o lona alo e tui se tamaloa i se naifi, ma sa ia faafefeina foi le fasi ina o sona tuafafine, i se agaese.

Na ta’ua e le tina lona mana’o e ave’ese le ua molia, ona ua atili ona fa’ateteleina lana amio, aemaise lava i taimi e fa’asuaava ai.

Ina ua o latou taunu’u i le ofisa a leoleo, sa faamatalaina e le ua molia i leoleo, le mae’a o se latou inuga ma ana uo i le maketi i le aoauli, ma ia alu atu i le fale e tapena se latou umu mo le aso Sa.  Ma ina ua mae’a, sa ia alu sa’o lava e moe.  E na te le manatua lona faia o se tulaga, e pei ona ta’ua e lona tina.

Ina ua fesiligia o ia i lona taumafai e ta tui ia se alii ma lona tuafafine, sa ta’ua e le ua molia, na mafua ona ia taumafai e fa’afefe ia le tamaloa i le naifi, ona o lona ata atu ia te ia (le ua molia).  Ae mo lona tuafafine, na ta’ua e le ua molia, sa taumafai e fa’afefe lona tuafafine.

Ina ua faatalanoaina e leoleo ia le alii lea na fa’amata’u e le ua molia, i le oti, sa ia ta’ua lona iai i totonu o le fale le ta’ua, ae taumafai ia le ua molia, e tatala le faitoto’a.  Ma na ia vala’au mai i le ua molia, e faatali, ae ina ua ia savali mai i fafo, sa fa’ate’ia o ia ina ua sasau atu e le ua molia, ia se naifi i lona ua ma o le vave ona ia polokaina le lima a le ua molia, sa mafai ona fa’asao ai lona ola.

I le faamatalaga a le tuafafine a le ua molia, sa ia ta’ua lo latou iai i totonu o le fale ma ona uso, ae o latou fa’alogoina se tagata o talatalanoa na’o ia ma ina ua o latou tilotilo mai i fafo o le fale, na o latou va’aia ai le ua molia.  Ma ina ua iloa atu i latou e le ua molia, sa ia u’uina mai se agaese ma taumafai e fa’afefe ai lona tuafafine.

Ua molia nei Peter Tiamaniani i le Fa’ao’olima i lona tulaga e lua, o se vaega ‘D’ i solitulafono mamafa, e mafai ona nofosala ai i le falepuipui, e o’o atu i le lima tausaga, po o se sala tupe e $5,000; po o faasalaga uma e lua.

Atoa ai ma le moliaga o le Faatupu Vevesi i totonu o le aiga, o se vaega ‘C’ o solitulafono mama, e mafai ona nofosala ai i le falepuipui i le ono masina, po o se sala tupe e $500; po o faasalaga uma e lua. 

E $20,000 sa fa’atulagaina e mafai ona tatalaina ai le ua molia, e faatalitali ai lona faamasinoga.

TAOFI E LEOLEO SE MISA A NI ALII SE TO’ALUA

O le taeao o le aso 21 o Tesema, 2024, na vaovao misa ai ni sui malu o le malo, i ni alii se to’alua, i luma o se faleoloa i Faga’alu, e tusa ai ma fa’amaumauga a le faamasinoga.  Na faapea ona agai atu leoleo ma tau vaovao le misa a Mercy Nu’uausala ma Afalupetoa Tafaoga.  Ae o le taimi lea o lo’o tu ai i o la autafa ia se tamaitai (le tuafafine a Tafaoga).

Ina ua taunu’u atu leoleo i le nofoaga o lo’o vevesi mai ai le to’alua lea, ae savali ese ia Nu’uausala.  Peitai na taofi mai o ia e leoleo. Ma sa ia faamatalaina i leoleo le lu’iina o ia e Tafaoga.

Ae ina ua fa’atalanoaina e leoleo ia Tafaoga, sa ia faamatalaina le sauaina e Nu’uausala o lona tuafafine.  Sa ta’ua e Tafaoga lona va’aia o ni manu’a i foliga o lona tuafafine faapea ma lona fatafata ma lona lima.  

Sa faatonuina e leoleo ia le tamaitai e ave’ese lana mata ma sa molimauina ai e leoleo ia le uli o le mata tauagavale a le tamaitai ma na faapea loa ona lokaina e leoleo ia Nu’uausala ma aveina atu o ia i le ofisa a leoleo.

Na aveina atu ai foi e leoleo ia le tamaitai na a’afia i le ofisa a leoleo mo le togafitia e le vaega a le EMS.  Ma na ia faamatalaina e leoleo le sauaina o ia e le ua molia, ina ua ia (tamaitai) polokaina ia le ua molia mai i luga o upega tafailagi faapea lana telefoni.

Sa ta’ua foi e le tamaitai, o taimi uma lava e fa’asuaava ai le ua molia, e na te tu’ua’ia lava le tamaitai i le faia o sana uo fou.  

O moliaga a Nu’uausala na aofia ai le Fa’ao’olima i lona tulaga e tolu faapea ma le Faatupu vevesi i totonu o le aiga.

O le moliaga o le fa’ao’olima, o se vaega ‘A’ o solitulafono mama, e mafai ona nofosala ai i le falepuipui i le o’o atu i le tausaga, po o se sala tupe e $1,000; po o faasalaga uma e lua.

Ae o le moliaga i le faatupu vevesi, e mafai ona nofosala i le vaega ‘C’ o solitulafono mama, e mafai ona nofosala ai i le falepuipui mo le sefululima aso, po o se sala tupe e $300; po o faasalaga uma e lua.

E $5,000 le vaega tupe sa faatulagaina e mafai ai ona tatalaina ai le ua molia, e faatalitali lona faamasinoga.