TALA O LE PASEFIKA

PASEFIKA

SAMOA - TOLOPO LE FAAMASINOGA A SIA FIGIEL

Ua toe tolopoina nei le faamasinoga a le tamaitai o Sia Figiel, lea o lo’o molia i le maliu o se tamaitai polofesa, o Caroline Sinavaiana Gabbard, i le masina o Aukuso, ina ia maua ai e loia a le malo, se avanoa e iloiloina ai ana ripoti mai foma’i i le Iunaite Setete.

O le aso Gafua na se’i mavae atu, i Samoa, na toe tula’i ai Figiel ma lana loia, o Unasa Iuni Sapolu, i luma o le Faamasinoga Maualuga, mo le toe fa’atulagaina o se aso fou, mo lona iloiloga.

Ma o lea ua toe tolopoina ai le faamasinoga a Figiel i le aso 18 o Aukuso, 2025.

E tusa ai ma se ripoti mai i leoleo, na maliu fasia ia Gabbard ia Me o le tausaga ua mavae atu.  Ma sa fa’alauiloa mai e le Komesina a Leoleo, ia Auapaau Logoitino Filipo, e foliga ma isa fa’aaogaina ia se samala ma se tamai naifi, e fa’ao’o ai le maliu ia Gabbard.

Ma sa faapea ona tu’ua e le ua molia ia Gabbard i lona fale, ae malaga atu i Lotofaga ma tafafao ai ma sana uo.  Ae o le taeao sa soso’o ai, a’o faia le la inuga ti ma lana uo, sa faato’a faamatalaina ai e Figiel i lana uo, le mea sa tupu, ma o la malaga ai loa i le Ofisa a Leoleo e ripoti le mea na tupu.

Ina ua malaga atu leoleo i lona fale, sa mauaina ai le tino maliu o Gabbard.  

Ma o lo’o iai se talitonuga, na fa’aaogaina e Figiel ia le ta’avale a Gabbard, e malaga ai i Lotofaga.

O lo’o lokaina pea Figiel se’ia o’o i le aso o lona faamasinoga.

FITI - ASO FOU MO LE FAAMASINOGA O LE SA AVEA MA PALEMIA O FITI

Ua toe tu’u atu ia Iulai ma Aukuso, ia aso fou mo le fa’amasinoga a le susuga ia Frank Bainimarama, lea sa avea ma Palemia o Fiti, faapea ai ma Aiyaz Sayed-Khaiyum lea na avea ma Loia Sili, atoa ai ma Dr. Neil Sharma, lea na avea ma Minisita o le Ofisa o le Soifua Maloloina.

O lo’o molia uma i latou nei i le le mulimulita’i i tulafono ma aiaiga i se tauofoga.

NIU SILA - FA’ATO’ESE SE FALEOLOA I NIU SILA I SE TAMAITAI FAATAU

Sa tu’u’aia e le tamaitai o Taysha Williams ia se faleoloa i Whanganui, Niu Sila, ina ua tapaina e le faleoloa ia faamaumauga o lona soifuaga, ina ua silia ma le $1,000 sana faatau na faia.

Na fa’ailoa atu e le faleoloa i Whanganui, Niu Sila, o le Pak’n Save, ia Williams, e le mafai ona ia alu ‘ese mai i le faleoloa, pe afai e na te le tu’uina atu ia ana fa’amaumauga.

O lenei faalavelave sa tula’i mai i le aso To’ona’i, na se’i mavae atu, Mati 1, ina ua malaga atu Williams ma lana fanau, e fai se latou fa’atau, ma silia ai ma le $1,000 le tau o la latou fa’atauga.

Sa ta’ua e Williams, le leai o se fa’amalamalamaga na tu’uina atu e le faleoloa, i le mafua’aga sa tapaina ai ana faamaumauga e le faleoloa.   Ma i le 30 minute na taofia ai i latou, sa faapea ona fesaga’i ia Williams ma ni supasavaisa e to’atolu, ina ua tapa e Williams se fa’amaumauga o tulafono a le faleoloa, e tatau ai ona ia tu’uina atu ana fa’amaumauga.

Ae peitai, e leai se ma seisi o le pulega a le faleoloa na mafai ona tu’uina atu ia Williams se faamaumauga o a latou tulafono.  Ma ina ua o’o i le supavaisa lona ono le mataupu a Williams, sa ia fa’ailoa atu i lea supavaisa, e fa’ato’a tu’uina atu ana fa’amaumauga, pe afai ae mafai e le pulega a le faleoloa ona fa’aali mai ni fa’amaumauga o a latou tulafono, e fa’amalosia ai lea tulaga.

Ma ina ua le mafai foi e le supavaisa lona ono ona fa’amaonia lea tulaga, sa faapea loa ona tu’ua e Williams ma nai ona alo le faleoloa.

Ua mae’a nei ona fa’ato’ese le pulega a le Pak’n Save ia Williams e tusa ai ma lenei fa’afitauli sa o latou feagai ai.

FA’AAUAU ONA SAVAVALI HAWAII INA UA AMATA ONA TIPI VAEGATUPE A LE NOAA

O le aso Toonai na se’i mavae atu, sa faapea ona ta’ita’ia ai e se faalapotopotoga fou, ua fa’aigoaina i latou “Allies in Resistance”, e lagolagoina ia polokalama mo DEI (diversity, equity and inclusion), ia se savaliga e fa’aalia ai lo latou tete’e i le fa’aauau ona taofia e le vaega a le DOGE ia vaegatupe mo le ofisa a le NOAA, i Hawaii.

Na amata savavali atu lenei faalapotopotoga i le 11 i le taeao mai i le ‘Iolani Palace’, ma agai atu i ‘King Street, ona uia lea o le ‘Punchbowl Street’ ma fa’ai’uina i le ‘Beretania Street’.

Sa tu’uina atu ai se fa’asoa i le fa’atagata a Patsy Mink lea o lo’o tu i luma o le Faletusi a le Setete o Hawaii, ma toe fa’aauauina atu ai i luma o le fale o le malo, lea na fa’aleoina ai le lagolago malosi a lenei faalapotopotoga i le DEI.

Ua mafua lenei fuafuaga a lenei faalapotopotoga, ona ua o’o mai i Hawaii ia suiga a le faigamalo a Trump, lea ua fa’ate’aina ai le toatele o tagata faigaluega feterale, atoa ai ma le taofia o vaegatupe mo le tele o polokalama DEI.

I se ripoti lata mai ua faapea ona o’o mai i le vaega fa’asalalau a le Hawaii News Now, ua fa’amaonia ai le fa’ate’aina o le tamaitai o Kayla Besong mai i lana galuega i le Ofisa e mataituina galulolo i le Pasefika.

Sa ta’ua e Besong le fa’ate’aina o ia i le aso Tofi o le vaiaso ua mavae.  Ae o le latou ofisa e kavaina uma teritori a le Iunaite Setete i le Pasefika, ma e na’o le to’a 12 tagata faigaluega o le latou ofisa, ae o lea ua na’o le to’alua tagata faigaluega ua totoe, e mataituina lea ofisa i le ao ma le po.

Ma ua avea le a’afia o galuega a lenei ofisa i Honolulu, ma tulaga ua faapea ona faapopoleina ai taitai o le malo, e le gata i ofisa feterale ae faapea foi totonu lava o Hawaii.

Sa saunoa le lutena kovana a Hawaii, o Sylvia Luke, e tusa lava po o mu tele i Maui, po o mafui’e, po o a lava ituaiga afa, o le ofisa lenei e muamua lava ona maua mai ai ripoti.