Toe feagai Palemia Samoa ma seisi lu’itau i lona tofiga

SAMOA

O le aso Gafua i Samoa na tolopoina ai e le Fofoga Fetalai o le Palemene a Samoa, le Afioga Papali’i Li’o Oloipola Taeu Masipau ia se mau mo se palota (no-confidence) e faasaga i le Palemia o Samoa, le Afioga Fiame Naomi Mata’afa, se’ia o’o i le taeao nei.

Ae peitai ane, sa finagalo ia Fiame ina ia fa’aauau pea le mau ina ia mafai ona fa’aauau pisinisi a le Maota Fono.

O se manatu sa lagolagoina e le ta’ita’i o le Itu Agai, le susuga ia Tuilaepa Sailele Malielegaoi.

O le vaiaso ua tuanai na fa’ato’ilalo ai e Fiame ia seisi foi palota e lu’itau ai lona tofi Palemia (34-15), lea na fa’atula’i e Tuilaepa ma le HRPP.

Ua fa’amaonia e le ofisa a le palemene a Samoa, i le vaega fa’asalalau a le RNZ Pasefika, le fa’auluina e le taitai o le Itu Faiupufai a le FAST ma le latou taitaifono ia La’auli Leauatea Schmidt, ia se mau, mo le toe faia o seisi palota (no-confidence) e faasaga i le tofi Palemia.

Faatasi ai ma nisi o minisita a le FAST, ua avea le fa’atula’i esea e Fiame o La’auli mail ana kapeneta, ua tula’i mai ai se fe’e’ese’eseaiga i totonu o le vaega a le FAST ma faapea ona ave’esea ai e le FAST ia Fiame mai totonu o le pati.

I le vaiaso ua mavae, sa faapea ona ‘aufa’atasi ai le itu a le FAST ma Fiame, e tete’e atu i le mau a Tuilaepa. Ae o lea ua mana’o nei La’auli, ina ia fa’atula’i ese Fiame mai i le tofi Palemia, ona ua taofi La’auli, o lo’o iai seisi sili atu ona agava’a mo le tofi Palemia, o se tasi ua filifilia e le Atua.

Sa saunoa foi La’auli, e le solomuli ona o Fiame o se tamaitai.  

Na ta’ua e La’auli i se nusipepa le mafuaaga na tu fa’atasi ai minisita e to’a 29 a le FAST, ma Fiame, i le palta i le vaiaso ua mavae, ona o lo’o iai ni faaopoopoga taua i le Faavae faapea ma le Tulafono tau Palo, sa manaomia ona pasia.