POU TIUTE A LEOLEO

Pago Pago - AMERIKA SAMOA

MOLIA SE ALII I LE GAOI

O le aoauli o le aso 20 o Tesema, 2024, na ripotia atu ai e se alii ia le susuga ia Maleifua Leao, i le Ofisa a Leoleo i Tafuna, ma tu’ua’ia ai o ia i lona osofaia o se fale ma gaoia se ato na iai ni apa meaai, o se pea se’evae, o ni ‘ie toga faapea ma se masini feula laula’au.

Na agai atu leoleo i le nofoaga na tupu ai le faalavelave ma sa faasino iai e le alii e ana le fale na osofa, ia totonu o le fale ma meatotino na taumafai Leao e gaoi ma le vaega o le fale, na oso atu ai Leao ma toe sola ese ai.  Sa fa’aali foi i leoleo ia le fale e nofo ai Leao, i leisi itu auala, i tua o se faleoloa.

Sa taumafai leoleo e saili Leao i lo latou fale, ae peitai, e le’i maua ai o ia.

Na faamatalaina e le alii e ana le fale na gaoia, ina ua ia alu atu e Siaki lona fale, na ia vaaia le matala o fa’amalama ma ‘screen wires’ o le fale, faapea ma le faitoto’a pito i luma.  Ma sa i luga o le laulau se fagu ‘juice’ malulu. 

Sa alu lenei alii e momoli lona toalua ma le la fanau i le latou fale, ae toe fo’i mai e kamuta le faamalama, ae ona vaaia ai se tagata i totonu o le fale.  Ma ina ua ia savali atu i le fale, sa ia va’aia le tamo’e o le tagata agai i le faitoto’a pito i tua o le fale, ma lana ato.

Na ia taumafai e pu’e le ata o Leao, ae peitai, sa na o le tasi le ata na mafai ona ia pu’eina ae e le’i nimo ese atu ia le ua molia.

I le aso 21 o Tesema, na fa’afeso’ota’i atu ai e seisi alii ia le Ofisa a Leoleo i Tafuna, ina ua va’aia ia Leao i totonu o se fale o lo’o totoina ai la’au, i Faleniu.  Na agai atu ai loa leoleo ma lokaina mai ai leoleo.

Sa faamatalaina e Leao i leoleo, ina ua su’esu’eina o ia, o le mafuaaga na iai i totonu o le fale, ona sa fa’atalitali i lana uo, ae na musu e ta’u i leoleo ia le igoa o lana uo.  Ma na fesiligia foi o ia e leoleo pe aisea na tamo’e ese ai, ae tali Leao, sa fefe ona e le masani i le alii e ana le fale.

O moliaga o  Leao e aofia ai le Gaoi ma le Solivale o fanua a isi.  O le moliaga o le Gaoi o se vaega ‘A’ o solitulafono mama, e mafai ona nofosala ai i le falepuipui i le tausaga atoa, ma se sala tupe e $1,000; po o faasalaga uma e lua.

Ae o le moliaga o le Solivale o fanua a isi, o se vaega ‘B’ o solitulafono mama, e mafai ona nofosala ai i le falepuipui i le ono masina, po o se sala tupe e $500; po o faasalaga uma e lua.

E $2,000 se vaegatupe na faatulagaina e mafai ona tatalaina ai i tua le ua molia, e faatalitali ai lona faamasinoga.

MOLIA SE TAMALOA I LE SAUAINA O LONA TO’ALUA

E tusa ai ma fa’amaumauga a le faamasinoga, o le taeao o le aso 19 o Tesema, 2024, na valaau atu ai se tina i le Ofisa a Leoleo i Tafuna mo se fesoasoani, ina ua sauaina o ia e lona toalua i luma o le faleoloa a le Pacific Mini Mart.

Ina ua taunu’u leoleo i le nofoaga na tupu ai le faalavelave, sa va’aia le susuga ia Stephen Titi, pasi atu i luma o le faleoloa a GIAs ae e leai sona mitiafu, ma na fa’amaonia e leoleo, o le to’alua lea a le tina na valaau atu i le ofisa a leoleo.

Sa faapea loa ona agai atu iai leoleo ma lokaina mai o ia, ae na sogia e leoleo ia le manogi ‘ava malosi o lenei alii.

Na agai atu loa leoleo e su’e le tina na valaau atu i leoleo, ma na faasino ifo iai e le ua molia, le taavale a lona to’alua i luma o le Cost-U-Less.  Ma sa faatonuina o ia e leoleo ina ia agai atu i le ofisa a leoleo mo le fa’atalanoaina o ia.

Sa faamatalaina e le tina na a’afia, na amata mai le la fe’ese’esea’iga ma lona to’alua i le po, ae na fa’aauau mai i le taeao lena.  Ae na mafua ona amata le la misa, ona o le fa’asuaava o le ua molia.  Ma na toe fa’aauau le la misa i le taeao, ina ua nanaina e le tina ia le ki o le taavale, ona o lona musu e alu le ua molia, e faigaluega e o lo’ fa’asuaava.

Na ta’ua foi e le tina na a’afia ia le momoliina o ia i lana fale faigaluega, e lona tina, ae na te le o iloa o lo’o mulimuli atu lona to’alua, i totonu o se taavale a se tagata e la te galulue faatasi.

Ma sa fa’aauau ai le la misa ma i’u ai ina kolaina mai e le ua molia ia le ua o le ofu a lona to’alua a’o taumafai lona to’alua e ta ‘ese ona lima, i lana ato.  Sa ia valaau loa leoleo ae o le taimi lea ua amata ona savali le ua molia, agai i luma o le aualatele, ae ‘e’e mai i le fafine ma palauvale mai iai.

Ina ua faatalanoaina e leoleo ia Titi (le na molia) sa ia ta’ua ia lona ita i lona to’alua ona sa alu i se pati i le aso Gafua ae fa’ato’a toe fo’i atu i le aso Faraile, ma o lea na ia faatonuina ai lona to’alua e nofo i le fale.  

Ae peitai, na alu le ua molia i le inu pia i lena afiafi, ma o le mafua’aga lea na mulimuli ai i lona to’alua i le taeao na soso’o ai, ina ia aumai le ki o le taavale mai lona to’alua.

O moliaga ua faia faasaga ia Titi, e aofia ai le Faatupu Vevesi i nofoaga faitele, o se vaega ‘B’ o solitulafono mama, e mafai ona nofosala ai i le falepuipui i le ono masina, po o se sala tupe e $500; po o faasalaga uma e lua.

Faapea ma le moliaga o le Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le falepuipui i aso e 15, po o se sala tupe e $300; po o faasalaga uma e lua.

E $1,000 le vaegatupe na fa’atulagaina mo le tatalaina o le ua molia mai i le falepuipui, e faatalitali ai lona faamasinoga.

MOLIA SE ALII UA FIU SE AIGA E FA’ASA MAI O LATOU FANUA

I le aso 15 o Tesema, 2024, na valaau atu ai se alii i le Ofisa a Leoleo i le Tafuna, e faila sana ripoti e faasaga i se alii na feoa’i muamua ma lona tuafafine, i le  fa’atupu vevesi ma solivale so’o o latou fanua.

E ui ina fiu leoleo e saili le susuga ia Ualolo Fatulau (po o Paris), ae peitai, sa faila pea moliaga e fa’asaga ia te ia, na aofia le Faatupu vevesi i nofoaga faitele, o le Fa’ao’olima ma le Solivale o fanua a isi, e aunoa ma se faatagana.

O lo’o ta’ua i fa’amaumauga a le faamasinoga, ia le ta’ua e le alii na valaau atu i le ofisa a leoleo, ia se la fusuaga ma Fatulau (lea ua molia), on aua ia fiu e tuli ‘ese mai lo latou fanua, ae musu le ua molia ma ia mana’o lava e talanoa i le tuafafine o le alii na valaau i leoleo.

O le aoauli o lea aso na fa’atalanoaina ai e leoleo ia le alii na valaau atu i le ofisa a leoleo, ma sa ia ta’ua e faapea, na fafagu o ia mai sana malologa, i le ou a ana ta’ifau.  Ma ina alu atu i luma o le latou fale, na ia va’aia ai Faatupu (lea ua molia) o tu mai fafo o le fale.  

Sa taumafai le alii na valaau i leoleo, e tuli ‘ese ia le ua molia mai lo latou fanua ae peitai, na musu le ua molia ma ia valaau mai e fia talanoa i le tuafafine a le alii na valaau leoleo.  Ae na fiu le alii na valaau i leoleo e ta’u mai i le ua molia, e le o iai lona tuafafine i le fale, ae peitai, sa le’i faamalieina ai le finagalo o le ua molia, ma ia fa’aauau pea ona tauvala’au le tuafafine a le alii na valaau i leoleo.

Na musu le tamaitai po o le tuafafine a le alii na valaau i leoleo, e talanoa i leoleo.

Ae sa faamatalaina e le alii na valaau i leoleo le tau’aia o ia e le ua molia, i ni ma’a.  E tusa ai ma le faamatalaga a le alii na valaau i leoleo, na amata atu lava ia amioga ia a le ua molia, Tesema 12.  E alu atu lava ia le ua molia, i lo latou fale, ma mana’o e fia talanoa i le tuafafine a le alii na valaau i leoleo, ae peitai, ua fa’amae’aina le la faigauo.

Ma o taimi uma lava e alu atu ai, e tuli ‘ese lava o ia ae peitai, e mana’o lava le ua molia, e talanoa i le tuafafine a le alii na valaau i leoleo.

Na ta’ua e le alii na valaau i leoleo, na fa’atolu ona o’o atu le ua molia, i le latou fale, i le aso 13 o Tesema, ma o le aso na soso’o ai (Tesema 14) na le gata ina alu atu le ua molia i le latou fale, ae na faapea ona telefoni atu i taimi uma.

Ma na fa’ailoa atu e le ua molia, o le a ia alu atu  va’ai le tuafafine a le alii na valaau i leoleo ma o lea, na ia (alii na valaau i leoleo) savali ai i luma o le auala e tau i le latou fale, e faatalitali ai le ua molia.  Sa ta’ua e le alii na valaau i leoleo, le le mamao o le va o le latou fale ma le fale a le ua molia.

O le aso 15 o Tesema, sa faapea foi ona toe valaau atu le ua molia i le fale o le aiga a le alii na valaau i leoleo.  Na faapea foi ona toe savali mai i luma le alii na valaau i leoleo ma sa faate’ia o ia ina ua ia toe va’ai mai, ua toe alu atu foi le ua molia.

O moliaga a Ualolo Fatulau, e aofia ai le Faatupu Vevesi i totonu o le aiga, o se vaega ‘C’ o solitulafono mama, e mafai ona nofosala ai i le falepuipui, e o’o atu i aso e 15, ma se sala tupe e $300; po o faasalaga uma e lua.

O le Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le tausaga atoa, po o se sala tupe e $1,000; po o faasalaga uma e lua.

Ma le moliaga o le Solivale o laufanua a isi, e aunoa ma se fa’atagana; o se vaega ‘B’ o solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

E $10,000 le vaegatupe na fa’atulagaina e tatalaina ai le ua molia, e faatalitali ai lona faamasinoga.

MOLIA SE ALII I LE TAU’AIGA O SE FALE A’O IAI LONA TUAFAFINE MA LANA PEPE I TOTONU

O le aoauli o le aso 18 o Tesema, 2024, na valaau atu ai se tamaitai i le Ofisa a Leoleo i Tafuna, mo se fesoasoani, ona o se faalavelave na tupu i se tasi o ona tuaoi, ina ua tau’ai e le susuga ia Semu Aiava (lea ua molia), ia le fale o lona tuafafine, ae o lo’o iai totonu i le fale ia lona tuafafine ma sana pepe e ono masina.

Sa aga’i atu loa leoleo i le nofoaga na tupu ai le faalavelave ma na faasino iai e le tamaitai i leoleo le fale na tupu ai le faalavelave.  Ma na va’aia le tina o tu tu mai i luma o le fale.

Ae ina ua agai atu leoleo e lokaina mai Aiava, sa ta’u mai iai e lona to’alua, e leai seisi o i totonu o le fale.  Ae o le taimi tonu foi lea na taunu’u atu ai le to’alua a le tina na a’afia, ma savali sa’o i totonu o le fale.  Ona ia toe fo’i mai lea i fafo ma ta’u i leoleo, o la e lafi i totonu o le potu ia Aiava.

 Na faapea loa ona avefaapagotaina Aiava e leoleo ma aveina atu ai loa o ia i le ofisa leoleo i Tafuna mo le faatalatalanoaina o ia.

E tusa ai ma le faamatalaga a le tamaitai na valaau i leoleo, na ia lagonaina le palauvale ma le ‘e’e o le ua molia, i lona tuafafine.  Ona alu lea o le ua molia, i fafo o le fale ma tau’ai mai le fale, a’o iai lona tuafafine ma le pepe i totonu o le fale.  Ina ua ia faalogoina le tagi a le pepe, sa faapea loa ona ia valaauina leoleo mo se fesoasoani.

I le faamatalaga a le tina na a’afia, sa fa’ate’ia o ia i lea aoauli, ina ua alu atu lona tuagane ma amata ona palauvale atu ia te ia, ma amata ona tatu’i o ia.  Ona alu lea i fafo ma tau’ai mai le fale i ma’a.  Na ia fusi mai lana pepe ma ia valaau i lona toalua e sau loa i le fale.  Sa ta’ua foi e le tina, e le o se taimi muamua lea ua faia ai e lona tuagane ia lea tulaga.

Sa faapea foi ona faatalanoaina e leoleo ia le to’alua a le tina ma le pepe, ma sa ia fa’amaonia le valaau atu o lona to’alua ma augani atu e sau loa i le fale, a’o tagi i luga o le telefoni.  Ma na o latou na o latou taunu’u faatasi ma leoleo.

Na ia fa’amaonia foi le faamatalaga a lona to’alua, i le faia so’o e le ua molia, o lenei tulaga, i lona to’alua.

O moliaga a Aiava (lea ua molia), e aofia ai le Faatupu Faalavelave i totonu o le aiga (sauaga i totonu o le aiga), o se vaega ‘C’ o solitulafono mama, e mafai ona nofosala ai i le falepuipui mo aso e 15, po o se sala tupe e $300; po o faasalaga uma e lua.

O le Fa’ao’olima i lona tulaga e tolu ma le Faia o se Gaioiga e Afaina ai le Saogalemu o se tamaititi/teineititi – o se vaega ‘A’ o solitulafono mama; e mafai ona nofosala ai i le tausaga, po o se sala tupe e $1,000; po o faasalaga uma e lua.

Faapea ai ma le moliaga i le Faaleagaina o Meatotino i lona tulaga e tolu, o se vaega ‘B’ o solitulafono mama, e mafai ona nofosala ai i le o’o atu i le ono masina, po o se sala tupe e $500; po o faasalaga uma e lua.

E $5,000 le vaegatupe na mafai ona fa’atulagaina e tatalaina ai le ua molia, e faatalitali ai lona faamasinoga.