TALA MAI SAMOA

SAMOA

IOE SE ALII I MOLIAGA O LONA UMIA O VAEGA O FUALAAU FAASAINA

O le aso Lulu na se’i mavae atu, sa ripotia mai ai e le Samoa Observer, ia le suia o le tali a le susuga ia David Taulagi, e 48 tausaga, i ona moliaga o le umi fa’asolitulafono o se vaega o fualaau faasaina (mariuana) faapea ma pulu fana.

Na muamua ona tete’e e Tualagi ona moliaga, ae peitai, i le aso Lulu sa ia fa’ailoa atu ai i le faamasinoga ua saunia e fa’agasolo lona iloiloga e tusa ai ma ona moliaga.

Sa na ia fa’ailoa atu i le faamasinoga, lona tete’e i ona moliaga, ona o le fua sa maua ia te ia, e le o sana fua ae o se fua a se ulugalii, ae peitai ina ua tapaina e le faamasinoga ni ana molimau, sa leai ni ana molimau.

O lea na fesiligia ai o ia e le faamaisnoga pe tatau i leoleo ona saili mai le ulugalii e fai ma molimau, ae tali Tualagi e leai.

Sa faapea ona toe fesiligia Tualagi e le faamasinoga pe le’i lava ona aso e nofo ai i le falepuipui.  O lea na talosagaina ai loa e Tualagi le suiga o lana tali i ona moliaga.

Ae na fautuaina e le Afioga i le Faamasino ia Tuatagaloa ia Tualagi, e aua le suia lana tali ona o le otegia o ia, aua o lo’o faia lona tiute fa’alefaamasino.  

Sa toe fa’amautu mai e Tualagi le sui o lana tali, i lona taliaina o ona moliaga e fa.

O le aso 20 o Mati lea ua fuafua e lauina ai le faasalaga a Tualagi.

FA’ASE’E I TUA MATAUPU A LE HRPP FAASAGA IA FIAME

Ua taliaina e le Afioga i le Faamasino Sili ia Satiu Simativa Perese, ia le talosaga a le Itu Agai (HRPP) ina ia toe fa’ase’e i tua sa latou tagi na faila i luma o le Faamasino Sili i le aso Tofi, ina ia fa’atula’i ‘ese ia le Afioga i le Palemia Fiame Naomi Mata’afa, mai lona tofiga, ona ua le toe lagolagoina e le itu tele a le palemene.

Sa fa’ailoa atu e le loia a le HRPP, le susuga ia Fuimaono Sefo Ainu’u, ia le faamasinoga, ua mae’a ona soalaupuleina e le Palemene ia le mataupu i le aso Lua, ina ua palotaina e sui o le Palemene ma toe faamautuina ai le fa’aauauina pea o le avea o Fiame ma Palemia.

O le sui Loia Sili ia Letoafaiga DJ Fong, sa tula’i mo le Palemia ae o o le loia ia Muriel Lui sa tula’i mo le itu a le FAST (Faatutua i le Atua Samoa Ua Tasi).  Faatasi ai ma le tamaitai loia ia Taulapapa Brenda Heather Latu, sa auai atu e avea ma sui o le Fofoga Fetalai.

E ui ina e le’i tete’e ia loia i le talosaga a le HRPP e fa’ase’e i tua le latou talosaga, ae peitai, na o latou finau le tatau ona faasala o le Itu Agai ona o le taimi ma tupe sa fa’aaluina i tapenapenaga mo le faamasinoga o lenei mataupu.

Sa ta’ua foi e nisi o loia ia le le aoga o le taumafaiga a le HRPP ma o nei mataupu sa tatau ona fofoina i totonu o le palemene ae le mo le faamasinoga.

Ae peitai, sa finau Fuimaono na iai ni tulaga le mautinoa ma fesili tau i le Faavae e tusa ai ma le toatele o lagolagoina ia le Palemia.  Ma sa ia ta’ua se fa’aaliga a le Fofoga Fetalai i se vaitaimi ua te’a, i totonu o le palemene, e le taliaina e le palemene ia se mau e faia ai se palota mo le fa’atula’i o le palemia, lea ua mafua ai ona sulufa’i atu le HRPP i le faamasinoga.

Na faapea foi ona finau Fuimaono i le fa’asalalauina e totino o le Itu a le FAST, ia lo latou le toe lagolagoina o le Palemia, lea na tula’i ai se le mautonu po o tumau pea le lagolago  a le toatele o Fiame, e pei ona ma’oti mai i le Faavae.

Ma na ia fa’ailoa atu foi i le faamasinoga le talosagaina e le Itu Agai, ia le Fofoga Fetalai, mo le palotaina o lenei mataupu i totonu o le Palemene, lea na talia ae ua mae’a ona o’o mai le latou tagi i luma o le faamasinoga.  Ona sa leai se manatu e taliaina e le Fofoga Fetalai ia le latou talosaga.

Na ioe Letoafaiga, o lenei mataupu o se mataupu e a’afia ai le Faavae, ae peitai, sa ia le ‘auai i le taofi a Fuimaono, e na o le pau le mafuaaga sa faia ai le palota mo le faatula’i ‘ese o Fiame, ona o le talosaga po o le mau sa fa’atula’i e le HRPP.

Sa ta’ua Letoafaiga, o lenei mataupu sa taoto lava i totonu o le Palemene e fofoina ma ua mae’a ona faia iai le faaiuga a le palemene, ina ua faia le palota i le aso Lua.

Na faapea foi ona lagolagoina le finauga a Letoafaiga, e Lui ma sa faamamafaina e Lui e faapea, o le tagi lea na fa’aulu e le HRPP, ua fosi ai loia e fa’aalu o latou taimi taua, e sauniuni e tali atu ma faia su’esu’ega, ae o lea ua toe mana’o le Itu Agai e toe fa’ase’e i tua le latou tagi.

Sa faapea ona taliaina e le Faamasino Sili ia le talosaga a le HRPP mo le aveina i tua o la latou tagi, ae o lo’o iloiloina pea ia finauga a loia, e faasaga i le HRPP.