Teena e le Samoa Ea tu’ua’iga i le tau’aveina o se pusa oti o iai ni fualaau faasaina

Pago Pago - AMERIKA SAMOA

I se fa’aaliga fa’alauaitele mai i le ofisa vaalele a le Samoa Ea, i le aso Lulu, Fepuari 18, 2025 e tusa ai ma tu’ua’iga i le tau’aveina e se tasi o a latou vaalele, mai i Pago Pago mo Samoa, ia se pusa oti sa iai i totonu na’o ni vaega o fualaau faasaina.

Sa ta’ua i le fa’aaliga a le ofisa vaalele e faapea, o nei tu’ua’iga na faia e se tasi e suafa ia Mau Hunt ma sa fa’amanino mai e le ofisa vaalele, le le moni ma le leai o ni faavae, o nei tala ua salalau.

E le gata i lea, sa ta’ua i le fa’aaliga mai i le ofisa vaalele lo latou mulimulita’i i ni tulafono ma aiaiga ua mae’a ona fa’atulagaina, e faamautuina ai le saogalemu ma le fa’aaloalogia o le feavea’iina o tino maliu, pe a manaomia ona tauaveina se pusa maliu i luga o a latou vaalele.

Na faapea foi ona ta’ua e le ofisa vaalele, le tatau ona faimalaga faatasi ia le pusa maliu ma tagata o le aiga, ma o nei tulaga uma, e faamaumauina ma usitaua tulafono uma.

Sa faapea ona toe fa’amamafaina mai e le ofisa vaalele i la latou fa’aaliga, le leai o se taimi ua faapea ona o latou aveina ai se pusa maliu, e pei ona ta’ua e le susuga ia Hunt, ma e leai foi se fa’amaoni o tu’ua’iga i le feavea’iina o ni vaega o fualaau faasaina, i totonu o uta o lo’o tauaveina e a latou vaalele.

Na ta’ua e le Samoa Ea, e le gata ina  a’afia o la latou auaunaga, i nei ituaiga tu’ua’iga ae faapea foi ona ave’esea ai le fa’atuatuaga a le mamalu lautele i galuega lelei a le aufaigaluega.

Ma o lea ua tu’uina atu ai lenei matuapu i le Ofisa a Leoleo mo sa latou suesuega.  

Ua faapea foi ona fautuaina e le ofisa vaalele ia le alo ‘ese mai i le fa’asalalauina o ripoti e le moni, e ono faaleagaina ai le auaunaga a le latou ofisa vaalele, faapea ai ma galuega a le aufaigaluega o lo’o taumafai e tausi o latou aiga.

I le faaiuga o le fa’aaliga mai i le ofisa vaalele, ua fa’ailoa mai le tu’uto o le ofisa vaalele i le faatinoina o se auaunaga saogalemu ma le fa’atuatuaina mo le mamalu o tagata femalagai. Ma fa’aalia ai le agaga fa’afetai i le mamalu lautele o lo’o fa’aauau pea ona lagolagoina la latou auaunaga.

Ae o le vaiaso ua mavae sa faapea ona ripotia ai foi le taofia o se faigamalaga a le Samoa Ea i le aso Lulu, ina ua fa’amaonia le tagofia e se tasi o le aufaigaluega, o se vaega o fualaau faasaina, lea sa fa’amaonia mai e le Pulesili o le ofisa vaalele, le susuga ia Fauoo Fatu Tielu.

O se taimi mulimuli ane, na toe ripotia mai ai e le Samoa Observer, o se fualaau moe lea na fa’amaonia sa tagofia e se tasi o pailate a le Samoa Ea, ina ua toe su’esu’eina o ia.

E pe a ma le sefulu pasene o le aufaigaluega, lea sa aofia ai ma le pailate, na faapea ona su’esu’eina ma faamaonia i le tagofia i vaega o fualaau faasaina ma ‘ava malolosi.