Lokaina se alii i le sauaina o lana uo teine ona o le loto masalosalo

Pago Pago - AMERIKA SAMOA

O le taeao o le aso 2 o Tesema, 2024, na valaau ai se tina i le Ofisa a Leoleo i Tafuna, e lipotia se misa a se ulugaii ma i’u ai ina sauaina e le alii ia lana uo teine.

Na agai atu leoleo i le nofoaga na valaau mai ai le tina ma sa faamatalaina e le tina i leoleo le alu o le taeao atoa o tau upu le alii o Fa’amanu Povi ma lana uo teine.  Sa faasino iai e le tamaitai ia le potu a lenei ulugalii.

Ina ua o’o atu leoleo i totonu o le potu a Povi ma lana teine, sa molimauina le taoto mai o le tamaitai na a’afia i luga o le moega ma le manu’a o ona foliga, a’o tu i ona autafa ia le ua molia.

Ina ua fa’atalanoaina e leoleo ia le tamaitai na a’afia, sa ia ta’ua e faapea, e le o se taimi muamua lea ua tupu ai lea tulaga i lo la va.  Ma sa faamatalaina e le tamaitai na a’afia, na amata mai le la taugaupu i le po o Tesema 1, 2024.

Na mafua ona le fiafia le ua molia, ona o lona loto masalosalo i le va o ia (tamaitai na a’afia) ma seisi alii.  Ma na ta’ua e le tamaitai na a’afia le i’u ina tu’i fa’alua le itu tauagavale o ona foliga e le ua molia.

Ae o le taeao na sosoo ai (Tesema 2, 2024) a’o sauna le tamaitai na a’afia e alu e faigaluega, sa taofia o ia e le ua molia ma lokaina o ia i totonu o le potu, seia vagana ona ia fa’amaonia, ua toe fai sana uo fou.

Na ta’ua e le tamaitai na a’afia le fa’amata’uina o ia e le ua molia.  Ma sa faamatalaina e le tina na valaau i leoleo, le fa’afia ona sauaina o le tamaitai na a’afia, e le ua molia, ae na o le nofo lava ma usiusitai iai.  Ma sa faamaonia foi e le tina na valaau i leoleo, ia le fa’afefeina e le ua molia, ia le tamaitai na a’afia, i le oti pe afai e na te valaauina leoleo.

Sa faamatalaina foi e le tina na valaau i leoleo, ina ua fo’i mai i le aveina o le fanau i le a’oga sa o la molimauina ma lona to’alua ia le fa’afefeina o le tamaitai na a’afia ma le sauaina o ia e le ua molia, ona sa masalosalo le ua molia, ua fai se uo fou a le tamaitai na a’afia.

Ina ua faatalanoaina e leoleo ia Povi (le ua molia) i le ofisa a leoleo, sa ia ta’ua le faia o se la taugaupu ona ua iai sona manatu, ua fai se uo fou a le tamaitai na a’afia.  Sa fa’amaonia e le ua molia lona le fafia ma lona palauvale i le tamaitai na a’afia, ona o le pepelo.

Sa faamatalaina e Povi (le ua molia), o Novema 28, 2024 na amata ai ona ia va’aia le tamaitai na a’afia, o feva’aia’i ma seisi alii, i le nofoaga lea o lo’o latou nonofo ai.  Ma sa ia faatali se’ia la o’o i le la potu, ona ia po ina faalua lea o ona foliga.

Ma sa ta’ua e le ua molia le amataina o le la fe’ese’esea’iga i le aso muamua o Tesema, ona o le mea lava lea e tasi.  Sa ta’ua e le ua molia, ia lona le fiafia pe a pepelo atu lana uo teine ia te ia.  Ma e le fiafia foi pe a so so atu I lana uo teine, ae me’i, pei e fefe.

Na ta’ua e le ua molia, ia lona u’uina mai o lima o lana uo teine, a’o taumafai le tamaitai e ufiufi ona foliga.  Ae sa ta’ua e le ua molia, o lona taumafai e toso ese mai o lima o le tamaitai mai ona foliga, sa tau ai le lima a le tamaitai i ona lava foliga ma manu’a ai.  Ae na gau le tamatamailima a le tamatai, ona ua malosi lana toso.

Sa te’ena e le ua molia, ina ua fesiligia e leoleo ia le ua molia pe sa ia tu’i ina ia le gutu o le tamaitai na a’afia.  Na ia ta’ua e faapea, na pau lava le taimi na o’o ai lona lima i le tamaitai na a’afia, o le faalavelave lea na tupu ae e le’i o’o i le aso Faafetai faapea ma le faalavelave na tupu i le aso muamu ao Tesema. 

O moliaga ua molia ai nei Povi, e aofia ai le Faatuu Vevesi i totonu o aiga ma le Fa’ao’olima i le tulaga tolu, o se vaega ‘C’ o solitulafono mama, e mafai ona nofosala ai i le falepuipui i le o’o atu i aso e sefululima, po o se sala tupe e $300; po o faasalaga uma e lua.

Faapea ai ma isi moliaga o le Fa’ao’olima i lona tulaga tolu, o se vaega ‘A’ i solitulafono mama.  Ma le Lokaina o se tagata, o se vaega ‘A’ i solitulafono mama.  E mafai ona nofosala ai i le falepuipui i le tausaga atoa, po o se sala tupe e ta’i $1,000; po o faasalaga uma e lua.

E $3,000 le vaegatupe na fa’atulaga e mafai ona tatalaina ai le ua molia, e fa’atalitali ai lona faamasinoga.