POU TIUTE A LEOLEO

Pago Pago - AMERIKA SAMOA

OSOFA’IA E SE TAMALOA 46 TAUSAGA IA SE ALII MA LANA TAAVALE I LE PAKA LIONA

Na lokaina i le afiafi o Novema 18, 2024, ia le susuga ia Fa’alafua Mariner, ona o se fa’alavelave sa tula’i mai i le Paka Liona lea na ia taumafai ai e osofa’i se alii ma sana taavale.

E tusa ai ma fa’amaumauga a le malo, o lo’o ta’ua ai le mauaina e le Ofisa a Leoleo i Tafuna ia se telefoni i le afiafi o Novema 18, 2024, mo se fesoasoani, ona o se alii o lo’o faatupu vevesi i le Paka Liona.

Ina ua taunu’u leoleo, ma talatalanoa ma le alii na a’afia i lenei mataupu, sa ia faamatalaina le alu atu o Mariner (le ua molia) ma amata ona ‘e’e ma palauvale atu ia te ia.  

Sa ta’ua e le na a’afia, lona taumafai e tuli ‘ese ia Mariner ae na ia (Mariner) taumafai e tatala taavale ma fa’aleaga.  Ae ina ua taumafai le na a’afia e u’una’i ese Mariner mail ana taavale, sa faapea ona tu’i mai lona ulu e Mariner.

Na sola ‘ese Mariner mai le nofoaga na tupu ai le faalavelave, ae peitai, na mulimuli atu iai le na a’afia ina ia iloa e leoleo le mea na agai iai le ua molia.

Sa mafai ona pu’eina e leoleo ia Mariner ma aveina loa i le ofisa a leoleo.  Ae na ta’ua i totonu o le ripoti a leoleo le foliga mai o lo’o fa’asuaava le na molia.

O moliaga na fa’asaga ia Mariner, na aofia ai le Fa’atupu Vevesi i nofoaga faitele, o se vaega ‘B’ o solitulafono mama, lea e mafai ona nofosala ai i le falepuipui mo masina e ono, o se sala tupe e $500; po o faasalaga uma e lua.

Faapea ai ma le moliaga o le Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le falepuipui, i le o’o atu i aso e sefulu lima, po o se sala tupe e $300; po o faasalaga uma e lua.

E $1,000 le vaegatuna sa faatulagaina e mafai ona tatalaina ai i tua le ua molia.

MAUA I LUGA O ATA VITIO LE SAUAINA O SE TAMAITITI 17 TAUSAGA

O Novema 17, 2024, na o’o atu ai se tamaloa ma sona ‘nephew’ e 17 tausaga, i le Ofisa a Leoleo i Tafuna, e faila se la tagi e faasaga i ni alii se to’afa na osofa’ia ia le alii 17 tausaga.

[O le a le lomia igoa o le alii talavou na a’afia i lenei mataupu ma lona aiga, aua le puipuiga o le alii talavou.]

E ui ina e le’i lokaina se tasi, ae e to’alua ua molia i:

Faitauga 1:  Fa’aupu Vevesi i nofoaga faitele, o se vaega ‘B’ o solitulafono mama, e mafai ona nofosala ai i le falepuipui mo le ono masina, o se sala tupe e $500; po o faasalaga uma e lua.

Faitauga 2:  Fa’ao’olima i lona Tulaga e Tolu, o se vaega ‘A’ o solitulafono mama, e mafai ona nofosala i le tausaga, po o se sala tupe e $1,000; po o faasalaga uma e lua.

E tusa ai ma fa’amaumauga a le faamasinoga, o le taeao o Novema 7, 2024, na o’o atu ai se tamaloa ma lona ‘nephew’ e 17 tausaga i le Ofisa Leoleo i Tafuna ma failaina se la ripoti e tusa ai ma le fa’alavelave na tupu.

Sa fa’atalanoaina e leoleo ia le alii 17 tausaga ma e tusa ai ma lana molimau, o le po o Novema 6, 2024 sa alu ai i se faleoloa e tafafao ma ana uo.  Ae ina ua ia tu’ua le faleoloa, sa ia fa’alogoina le ta ina o lona ua e se tasi, i se laupapa ma pa’u ai i lalo, ma ia lagonaina foi le kikiina o ia e se tagata.

Na vala’auina e leoleo ia se taavale falemai mo le togafitia o manu’a o le alii talavou  ma ina ua mae’a ona siakiina le alii talavou e se fomai i le LBJ, na faapea ona fa’ao’oina atu lana ripoti i le ofisa a leoleo.

O manu’a o le alii talavou e pei ona ta’ua i le ripoti mai i le fomai a le LBJ, sa aofia se manu’a i lona taliga, o lona muaulu, o ona lima ma vae faapea lona ua.

Na fa’ailoa atu e le ‘aunty’ o le alii talavou, i leoleo, ia lona umia o se ata vitio sa maua e sona ‘niece’ i luga o upega tafa’ilagi (Instagram), ma o lenei vitio sa faia e se tasi o alii na molia i lenei faalavelave.

Sa faamatamataina e leoleo ia le alii 17 tausaga na a’afia, ia le ata vitio ma sa mafai ona ia ta’uina igoa o i latou sa sauaina o ia.  

O Pesamino Tolai sa tu’iina le alii 17 tausaga, o Avele Tolai na kikiina o ia, ma seisi alii talavou lea na ta ina le ua o le na a’afia i se laupapa, e laititi ifo i le 2x4.

Ma na va’aia foi i luga o le ata vitio ia seisi foi alii na sauaina foi, ae peitai, sa ta’ua e le alii 17 tausaga na a’afia, e na’o le igoa muamua o lea alii talaovu n ate iloa.

O le aso 11 o Novema, na aveina atu ai e leoleo ia Pesamino Tolai mo le fa’atalanoaina ma sa ia tusia i lana molimau tusia, sa fafaguina o ia e ni tamaiti e latou te o i luma o le faleoloa.

O isi alii o lo’o tu’ua’ia i lenei faalavelave, e aofia ai Avele Tolai, Josiaha Tolai ma seisi alii talavou.

Sa ta’ua e Pesamino lona togiina o le alii 17 tausaga na a’afia ma lona tu’iina o ia ma na pa’u le alii 17 tausaga na a’afia, ae na fa’aauau ona tatu’i e Pesamino.  Na toe fo’i Pesamino i lona aiga, ina ua mae’a ona fa’atalanoaina e leoleo.

E leai seisin a lokaina.  Ma e leai ni molimau na iai i le taimi na tupu ai lenei faalavelave.

Sa faavaeina su’esu’ega o lenei faalavelave i faamatalaga a le alii 17 tausaga na a’afia faapea ma le ata vitio, ae lagolagoina e le molimau tusia a Pesamino Tolai.

MOLIA SE ALII I LONA SAUAINA O LANA UO TEINE I LUMA O LE LA FANAU MA LONA USO

O Novema 19, 2024 na ripotia ai e se fafine ia le uo tama a lona uso, i lona sauaina o lona uso, i ona luma ma luma o le fanau a lona uso.

[O le a le lomia igoa o i latou na a’afia ma molia, ona o le puipuiga o fanau iti na a’afia i lenei mataupu.]

E tusa ai ma fa’amaumauga a le faamasinoga, sa ta’ua e le uso a le na a’afia, o ia foi lea na valaauina leoleo, le po ina e le ua molia ia lona uso ma taumafai e titina o ia, i luma o ia (le na valaau leoleo) ma le fanau a lona uso, i le latou fale.

Ina ua taunu’u leoleo i le nofoaga na tupu ai le faalavelave, sa faasino iai e le na valaau i leoleo, ia le nofoaga mulimuli na iai le ua molia.  

O lea na agai atu ai loa leoleo e saili mai le na molia.  Ae ina ua latalata atu leoleo i se faleoloa, na va’aia ai le ua molia.  Ma ina ua ia iloa mai le taavale a leoleo, sa tamo’e agai i tua o se togavao.  Na tuliloaina o ia e leoleo ae peitai, sa le’i mauaina o ia.

E tusa ai ma le molimau a le tina sa valaau i le ofisa a leoleo, sa ia molimauina le po ina e le ua molia, ia lona uso ma taumafai e titina lona ua, a’o iai le fanau a lona uso i totonu o le fale.  

Ma sa ta’ua e le na valaauina leoleo, sa alu atu e taumafai e fa’ato’afilemu le na molia, ae tago le ua molia, i le una’i ese mai o ia.  Ma o iina na oso atu ai lona to’alua (to’alua a le tina na valaau i leoleo), ma fufusu ma le ua molia.

Ina ua fa’atalanoaina e le leoleo ia le tina na a’afia, sa ia ta’ua le amataina o le faalavelave i se la taugaupu ma le ua molia.  Ma sa ta’ua e le tina na a’afia ia le tupu so’o o lenei tulaga i le va o ia ma lona to’alua.

O le afiafi o lea aso, na va’aia ai e leoleo ia le ua molia i Mapusaga Fou ma pu’eina mai ai loa o ia ma moliaina ai loa o ia i:

Faitauga 1 & 3 – Fa’ao’olima i lona Tulaga e Tolu, o se vaega ‘A’ o solitulafono mama, e mafai ona nofosala ai i le falepuipui i le tausaga atoa, po o se sala tupe e $1,000; po o faasalaga uma e lua.

Faitauga 2 – Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le o’o atu i aso e 15, po o se sala tupe e $300; po o faasalaga uma e lua. 

E $10,000 sa faatulagaina e mafai ona tatalaina ai le ua molia, e faatalitali ai lona faamasinoga.