POU TIUTE A LEOLEO

Pago Pago - AMERIKA SAMOA

MOLIA SE ALII I LONA FA’AO’OLIMA I SE AVE ‘TAXI’

Na molia ma lokaina ia Novema 16, 2024 ia se alii e 54 tausaga, ina ua ia pa’i lima i se avetaxi na alu atu e piki mai sana pasese.

O moliaga o lenei alii e aofia ai le Fa’atupu Vevesi i Nofoaga Lautele ma le Fa’ao’olima i lona tulaga e tolu.

I le moliaga o le faatupu vevesi, o se vaega ‘B’ o solitulafono mama, e mafai ona nofosala ai i le falepuipui mo masina e ono, po o se sala tupe e $500; po o faasalaga uma e lua.  Ae o le moliaga o le fa’ao’olima, o se vaega ‘A’ o solitulafono mama, e mafai ona nofosala ai i le falepuipui, i le o’o atu i le tausaga atoa, po o se sala tupe e $1,000; po o faasalaga uma e lua.

E tusa ai ma fa’amaumauga a le malo, o le po o Novema 16, 2024, na agai atu ai se ‘avetaxi’  e piki mai sana pasese, ae osofa’ia ai o ia.  Sa faapea ona agai atu leoleo i le laumua lea o lo’o fa’atalitali mai ai le avetaxi ma o latou o ai loa e faasino le nofoaga o iai le ua molia.

Ma na mafai ona fesoasoani se molimau i le sailiga o le fale a le ua molia ma ave faatasi ai le ua molia ma le molimau i le ofisa a leoleo, mo le fa’aauauina o su’esu’ega.

E tusa ai ma le faamatalaga a le ave taxi, na alu atu i le nofoaga mau totogi e piki mai lana pasese.  Ma a’o paka lana taavale, na oso atu le ua molia i lana itu ma fesili atu pe fia fusu.  Ae na tali mai le avetaxi i le ua molia, e tatau ona alu e moe ona o lo’o fa’asuaava.

Ae ita ai le ua molia, ma sasau atu lana tu’i ma tau i le fatafata ma le auvae a le avetaxi, a’o iai pea i totonu o le taavale.

Na oso mai i fafo le to’alua o le ua molia ma taumafai e taofiofi lona to’alua, ae oso le ua molia ma po luma o le taavale ma toe savali atu i le ave taxi.  Sa taumafai le ave taxi e oso mai i fafo o lana taavale, ae ua toe taso’o atu tu’i a le ua molia, ma tau i le gutu o le ave taxi.

Ona toe oso lea o le ave taxi i totonu o lana taavale, ma toe malaga ese atu ai loa.

I le faamatalaga a le molimau, sa ia valaau i le laumua mo se taxi e malaga ai.  Ae ina ua taunu’u le taavale, sa savali atu le ua molia ma po luma o le taavale ma lu’i le avetaavale e la te fufusu.  Ma na tu’i e le ua molia ia le ave taxi.

Na musu le ua molia e faia sana faamatalaga i lea afiafi, ae sa ta’ua i le ripoti lona fa’asuaava.

E $500 na faatulagaina e mafai ona tatalaina ai i tua le ua molia, e faatalitali ai lona faamasinoga.

MUSU SE FAFINE E SAU I FAFO MA LONA POTU

O Novema 18, 2024, sa valaau ai se tamaitai i le Ofisa a Leoleo i Tafuna mo se fesoasoani, ona ua ia talitonu, o lo’o fealuai lona tuagane ma se naifi e osofa’i ai o ia ma o le mafuaaga lea ua ia lafi ai i totonu o lona potu.

E taunu’u leoleo i le nofoaga na tupu ai le faalavelave, o lo’o saofa’i mai le ua molia, le susuga ia Michael Tunoa, i luma o le fale a le tamaitai na a’afia.

Na mafai ona sau i fafo le tamaitai na a’afia, ina ua valaau atu iai leoleo.  Ma na ia fa’amatalaina i leoleo lona taunu’u mai i le fale, ae alu atu lona tuagane ia te ia ma se naifi, ma palauvale atu ia te ia.  

Sa ta’ua e le tamaitai le fa’afefeina o ia e lona tuagane, i le faapea atu, o le a alu atu e titina ma tipi lona ua i le naifi.  O le mea lea na sola ai i totonu o lona potu ma loka mai.

Ma sa ta’ua foi e le tamaitai na a’afia le tupu so’o o tulaga faapenei i lona tuagane, o le faafefeina o ia ma lona uso.  

Ina ua fa’atalanoaina Tunoa sa ia ta’ua lona le iloa po o le a le mea sa tupu ae sa ia lagonaina ni leo, ma na to’afilemu ina ua vaai mai i le taunu’u atu o leoleo.

Ua molia nei Tunoa i le Faatupu Vevesi i totonu o le aiga ma le Fa’ao’olima i lona Tulaga e Tolu, o ni vaega ‘C’ o solitulafono mama, e mafai ona nofosala ai i le falepuipui i le o’o atu i aso e sefululima, po o se sala tupe i le va o le $150 ma le $300 i le moliaga e tasi; po o fa’asalaga uma e lua.

E $1,000 na fa’atulagaina e mafai ai ona tatalaina le ua molia, e faatali ai lona faamasinoga.

MOLIA SE TAMALOA 29 TAUSAGA I LE FASI TO’ALUA

O Novema 14, 2024 na valaau ai se tamaitai i le Ofisa Leoleo i Fagatogo, ma ripotia ai le sauaina e le to’alua a lana tama teine, ia lana tama teine a’o si’i le la pepe e 1 le tausaga.

(Ua le lomia suafa o i latou na a’afia ma le ua molia, ona o le puipuiga o fanau iti ma le tina na a’afia.)

Sa molia le tamaloa i le Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai i le falepuipui, mo aso e sefululima, po o se sala tupe e $300; po o faasalaga uma e lua.

Ua faapea foi ona molia le tamaloa i le faia o se tulaga e ono afaina ai le saogalemu o fanau iti (sauaga i totonu o aiga) – o se vaega ‘A’ o solitulafono mama, e mafai ona nofosala ai i le falepuipui, i le tausaga e tasi, po o se sala tupe e $1,000; po o faasalaga uma e lua.

E $10,000 sa fa’atulagaina e mafai ona tatalaina ai le ua molia, e faatalitali ai lona faamasinoga.

Ae e tusa ai ma faamaumauga a le malo, o le afiafi o Novema 14, 2024, na valaau atu ai le tina o le to’alua a le ua molia, i le Ofisa a Leoleo i Fagaitua, e ripotia le sauaina o ia e le tamaloa, i lo latou fale.

Sa ta’ua e le tina na valaau i le ofisa a leoleo, le tu’iina e le ua molia, ia foliga ma le manava o lona toalua, a’o si’i lana tama teine e 1 le tausaga.

Ina ua taunu’u leoleo i le fale na tupu ai le faalavelave, sa va’aia se alii o si’i maia lona afafine, i fafo o le fale a lona tuaoi.  Ma sa va’aia le a’afia o le mata tauagale a le ‘alu’alutoto.  Ae ina ua savavali atu iai leoleo, sa faasino le tamaloa agai i le fale, i le mea o iai lona to’alua.

Ina ua faatalanoaina e leoleo ia le to’alua a le ua molia, i le latou fale, sa ia faamatalaina le tu’i fa’afa o ia e le ua molia, i lona manava ma ona foliga.  Ma sa ta’ua e le to’alua a le ua molia, na manatu o le a tu’u le sauaina o ia e lona toalua, ona o lo’o ia si’i ina le la pepe, ae peitai, na toe sasau mai le tu’i lona lua a lona to’alua ma lavea ai le la pepe.

Sa ta’ua e le to’alua a le ua molia le tupu so’o o lenei ituaiga faalavelave i totonu o le la aiga.

Na faapea loa ona aveina e leoleo ia le ulugalii ma le la pepe, i le Ofisa Leoleo i Fagatogo mo le fa’aauauina o su’esu’ega faapea ma le togafitiga o le tina ma le pepe e le vaega a le EMS.

Ina ua o latou taunu’u i le ofisa leoleo sa muamua ona faia suesuega a leoleo, ae peitai, sa musu le ua molia e fai sana molimau tusitusia, e tusa ai ma le faalavelave na tupu.

Ina ua taunuu le vaega a le EMS, sa faapea loa ona togafitia ia le tina ma le pepe ma e le’i iai ni manu’a o le tina ae sa a’afia le itu taugavale o foliga o le pepe.

O se taimi mulimuli ane, na faia ai loa se molimau tusitusia a le to’alua a le ua molia ma sa ia faamatalaina ai le amata mai o le la misa i le aso 13, ina ua manava atu mail ana galuega, ae o lo’o moe lona to’alua (le ua molia).  Sa ta’ua e le tina lona le fiafia ma fesiligia ai le ua molia pe aisea ua le alu ai e fai le la faatau, ae tali mai le ua molia, pe mafai ona ia si’i maia se pusa moe mai i le faleoloa, lea na tali atu ai le tina, ioe.

O le aso na soso’o ai, a’o faia sana tapega fale ae e le’i alu e faigaluega, na ia fai atu ai i lona toalua (le ua molia) e vaai faalelei le la pepe, ae ina ua manava mai, o lo’o moe atu le ua molia, ae o lo’o lapisia le fale ma o lo’o totolo solo le la pepe.

Ma sa faamatala e le tina lona le ita tele, ma ia tago atu i le si’i mai le pepe ma musumusu i le taliga o le pepe, pe fia alu e vaai Grandma, ae na lagona mai e le ua molia lana musumusu, ma ita ai, ma faapea mai, ana le ma’i e na te tago e tutui lona fa’i (se’i tulou) i se mea ma’ai. 

Sa faamatala e le to’alua a le ua molia le fa’afia ona fa’afefe faapea o ia e le ua molia ma o lo’o iai foi se ma’ila i lona taliga ona o le ua molia.