TALA O LE PASEFIKA

PASEFIKA

FAATAUTO MINISITA FOU A SAMOA E SUI TULAGA I MINISITA FA'ATE'A

E to’afa ni Minisita fou a le malo o Samoa ua fa’atautoina i o latou tofiga fou e le Ao o le Malo, le afioga ia Tuimaleali’ifano Va’aleto’a Sualauvi II.

O a latou tofiga fou sa faapea ona fa’alauiloa mai e le afioga i le Palemia ia Fiame Naomi Mata’afa.

O nei sui fou o le Kapeneta, ua aofia ai le Afioga Faleomavaega Titimaea Tafua, lea ua avea ma Minisita o Fefaatauaiga ma Leipa.  O le afioga Laga’aia Ti’aitu’au Tufuga, lea ua avea ma Minisita o Tamaitai, Atunu’u ma le Atina’e Faaletagata.  O le Tofa ia Mau’u Siaosi Pu’epu’emai, lea ua avea ma Minisita o Feso’ota’iga ma Faamatalaga Faatekonolosi.  Atoa ai ma le Tofa ia Niu’ava Eti Malolo lea ua avea ma Minisita o Faatoaga ma Faigafaiva.

O i latou nei ua sui tulaga i sui e to’afa o le kapeneta ua mae’a ona fa’ate’a e le Palemia.

I se fonotaga ma vaega faasalalau i le aso Lua, sa fa’aleoina ai e Fiame ia lona faia o lenei suiga ona o lona mana’o i se kapeneta lelei.

O se tasi o minisita a fa’ate’aina, o le afioga ia La’auli Leuatea Schmidt, lea na avea ma Minisita o Faatoaga ma Faigafaiva.

O lo’o feagai nei La’auli ma ni moliaga.

I se taimi mulimuli ane, sa saunoa ai La’auli i lona taliaina o le faaiuga i le faate’aina o ia mai lona tofiga, ma se agaga maualalo.

FAATULA’I ‘ESE TAITAIFONO A LE ‘FAST’ IA PALEMIA MAI LE LATOU PATI

Ua fa’aauau pea tulaga o fa’afitauli i totonu o le Faigamalo a Samoa, ina ua fa’alauiloa mai i le aso Lulu (aso Lua i Amerika Samoa), ia le fa’atula’ieseina o le palemia ma ni minisita e to’alima o le kapeneta mai i le itu o lo’o puleaina nei le malo.

Ua mae’a ona sainia e totino e to’a luasefulu o le itu a le Fa’atuatua i le Atua Samoa Toatasi (F.A.S.T) ia le fa’atula’ieseina o Fiame Naomi Mata’afa ma le sui Palemia ia Tuala Iosefo Ponifasio faapea ma nisi o totino o le FAST.

Ma o lenei faaiuga a le FAST, ua faia i tua mai o le fa’ate’aina e Fiame o nisi o totino o lana kapeneta, e aofia ai ma le Taitaifono o le FAST, ia La'auli Leuatea Schmidt, lea ua molia ni i ni solitulafono.

E to’afa ni sui fou o le Kapeneta ua mae’a ona fa’atautoina e sui tulaga i minisita e to’afa ua mae’a ona fa’ate’a e Fiame.

Ua ta’ua i nisi o ripoti a vaega fa’asalalau lotoifale ia le faaleoina e le itu a le FAST le fa’atula’i’eseina o Fiame mai i le tofi Palemia.

Ae  peitai, ua saunoa Fiame, i  le avea o ia ma Palemia e mafai ona ia faia le faaiuga mo le Palemene o Samoa.  Ma o le Palemene a Samoa e mafai ona faia le faaiuga pe fa’aauau pea ona avea o ia ma Palemia pe leai.

Ma na ta’ua foi e Fiame e faapea, e mafai e le FAST ona fa’atula’i ‘ese o ia mai i le tofiga taitai  i totonu o le FAST, ae le mafai ona fa’atula’i ‘ese o ia mai i le tofiga faa Palemia.

O le aso Lua o le vaiaso fou, Ianuari 21, o le a faapea ona toe tatala ai tauaofiaga a le Palemene.

FA’AAUAU AUAUNAGA A LE ASOSI FAAFOMAI PASIFIKA MO VANUATU

Mai lava i le taimi na a’afia ai le motu o Vanuatu i le mafui’e 7.3 le malosi ia Tesema 17, 2024, sa faapea ona amataina ai le auaunaga Asosi a le PACMAT (Pasifika Medical Association’s Medical Assistance Team) mo tagata o le atunu’u, e le gata i tulaga o le soifua maloloina faaletino ae faapea foi fa’alemafaufau.

O le misiona a le PACMAT i le taimi nei, e mulimuli lea i se talosaga aloa’ia mai i le malo a Vanuatu, mo le galulue vavalalata ma Vanuatu faapea isi pa’aga aua tulaga manaomia i le taimi nei, o le soifua maloloina o ona tagata.         

I totonu o le 18 aso, ua to’a 439 tagata o le atunu’u ua mafai ona fesoasoani iai le PACMAT  e le gata i manu’a faaletino ae faapea foi a’afiaga o le mafaufau.  O lenei asosi o lo’o iai foma’i o le mafaufau, o tausima’i, o fomai faapitoa o le mafaufau, o se fomai tipitipi faapitoa faapea ma se fomai mo gasegase lautele.

E to’a 318 tagata ua mafai ona faufautuaina e lenei asosi, ma mai i lena fuainumera, e 20% o i latou, o iai se so’otaga i a’afiaga ona o le mafui’e.

O i latou uma ua faapea ona o’o iai le auaunaga a le PACMAT, sa faapea ona feagai ma su’esu’ega faalemafaufau, faatasi ai ma le fa’aauau pea ona feagaiga ma tausiga mai i tausima’i ma foma’i o le mafaufau.

O le 32% o i latou ua mafai ona o’o iai le fesoasoani a le PACMAT, o fanau e i  lalo o le 18 tausaga le matutua, 63% o tagata mai i nu’u tua.

OSOFA’IGA I PAPUA NIU KINI

I ni osofaiga ia Ianuari 5 ma le 6, ua faapea ona faaleagainga ai e fitafita Papua Niu Kini ni fanua, e pei ona sa faalauiloa mai e le Komesina a Leoleo i Lae, o James Luan.

Sa ta’ua e Luan, o lenei fa’alavelave na mafua mai ina ua tu’uaia e se fitafita ia nisi o fanau talavou i le tau’aia o lana taavale.

Na suanoa Luan, sa tatau i le fitafita na a’afia lana taavale, ona ripotia lenei mataupu i se ofisa leoleo latalata ane, ina ia mafai ona fofoina e leoleo lenei mataupu.

Ae e pei ona sa ripotia mai e le nusipepa o le Post Courier e faapea, e fa ni fale sa susunuina faatasi ai ma nisi fale na faaleagaina faapea ma se meatua’olo na faaumatia ma aveina.

O le aso Lulu (i Papua Niu Kini) sa faia ai se fonotaga i  le va o i latou na a’afia, pule o fanua, vaega’au a PNG ma leoleo.

O lo’o su’esu’eina e leoleo ia lenei mataupu.

TOE FA’AAUAU GALUEGA A LE LOIA SILI A FITI

O le vaiaso fou lea ua faamoemoe e toe taliu atu ai i galuega ia le susuga ia Christopher Pryde, le loia sili mai Niu Sila, o lo’o galue i Fiti, ina ua mae’a ona su’esu’ega ma fa’amaonia le leai o se Tulafono ua ia solia.

Ua tolu vaiaso talu ona mae’a se su’esu’ega lotoifale e tusa ai ma tu’uaiga na faia e faasaga ia Pryde ma i le faaiuga o lea suesuega, sa fa’aalia ai le leai o ni fa’amaoniga o moliaga e lua sa faia e faasaga ia Pryde.

Ma fautuaina ai le alii peresetene o Fiti ina ia le fa’ate’aina Pryde mai lona tofiga.

O le aso Lua o le vaiaso ua mavae, sa tusi atu ai Peresetene Naiqama Lalabalavu ia Pryde ma faailoa atu ia te ia le fa’amae’aina o lona faasalaga.