Molia se tamaloa I le faatup vevesi ma le faao’olima

Pago Pago - AMERIKA SAMOA

Na molia e leoleo ia se alii 47 tausaga le matua, e suafa ia Harris Fitiao, i le fa’ao’olima ma le faatupu vevesi i totonu o se aiga, ona  o se faalavelave sa tula’i mai i le po o Oketopa 25, 2024.

Ua molia Fitiao i le faitauga muamua, o le Faatupu Vevesi i totonu o le aiga (sauaga i totonu o le aiga) faapea ma le faitauga lona lua, o le Fa’ao’olima i lona tulaga e tolu.  Ma o nei moliaga, o se vaega ‘C’ o solitulafono mama, e mafai ona nofosala ai i le falepuipui i aso e sefululima i le moliaga, po o se sala tupe e i le va o le $150 ma le $300, po o fa’asalaga uma e lua.

E tusa ai ma fa’amaumauga a le malo, o le po o Oketopa 25, 2024, na o’o atu ai se valaau i  le Ofisa o Leoleo i Fagatogo, mai i se tina, e tusa ai ma le faatupu vevesi o Fitiao i totonu o lona aiga.

Ina ua taunu’u leoleo i le nofoaga na tupu ai le faalavelave, sa faasino ifo iai e le tina na valaau i le ofisa a leoleo, ia  le mea o lo’o moe ai le ua molia, i tua o se pailate, i luma o le fale ta’ele.  Ma na faapea ona lokaina mai ai o ia e leoleo, ma aveina atu i  le ofisa a leoleo.

Sa tapaina se molimau tusitusia mai i le tina sa a’afia i  lenei faalavelave ma sa ia ta’ua ai le alu atu o Fitiao i lo latou fale, a’o faia le latou mea’ai ma si ana fanau.  O le ua molia, e tusa ai ma le molimau a le tina, sa masani ona nofo i le latou fale.  

Ae na alu atu i lea afiafi ma ave uma a latou meaai.  Ae ina ua otegia atu o ia (Fitiao) e le tina, sa faapea ona palauvale ifo iai le ua molia ma faatonu e aua le pisa.

Ina ua fai iai le tina, o le a valaau leoleo, na tali mai le ua molia, ua fa’asa leoleo ma le fale ma sa ia (le ua molia) fa’afefeina foi le tina, i le oti.  Ma ina ua taumafai le tina e valaau lona uncle mo se fesoasoani, na taumafai le ua molia e se’i lana telefoni.  Ma o lea, na alu ai i fafo le tina ma lafi i se togavao i tua o le fale ma valaau ai loa le ofisa a leoleo.

Sa ta’ua foi e le tina e faapea, e le o se taimi muamua lea ua faia ai e Fitiao lea tulaga, o le faapisa i totonu o le latou fale.  Ma na ta’ua e le tina lona fefe ona o le alu atu so’o o Fitiao i le latou fale, ae ua le toe nofo ai.

Na te’ena e le ua molia ia tu’uaiga ua faia faasaga ia te ia. 

Ma e $5000 sa faatulagaina ina ia mafai ona tatalaina ai le ua molia mai i le falepuipui, e faatalitali ai lona faamasinoga.