12 Faitauga o Moliaga Faasaga i se Tamaloa i Lona Faamalosia o se Teineititi 16 Tausaga

Pago Pago - AMERIKA SAMOA

O le afiafi o Oketopa 18, 2024, na o'o atu ai se tina ma sona 'niece' e 16 tausaga, i le Ofisa a Leoleo i Tafuna, e faaulu se tagi e faasaga i le 'Uncle' o le teineititi (le to'alua o le tina na o atu ma le teineititi i le ofisa a leoleo), i lona faamalosia o le teineititi i le vaveao o lea aso.  O lenei tamaitai talavou sa nofo i lona 'Aunty' lea na la o i le ofisa a leoleo, ma lona to'alua lea ua molia, ona o lea sa 'sponsor' e le 'uncle' ia le teineititi na a'afia.

[Ua le lomia e le Lali ia suafa o i latou na a'afia ma molia i lenei mataupu, aua le puipuiga o le tamaitai talavou.]

E tusa ai ma fa'amaumauga a le malo, o lo'o ta'ua ai le faatalanoaina e leoleo o le tamaitai ua a'afia ma sa ia faamatalaina ai le tupu o le faalavelave ia te ia, i le 4:00 i le vaveao o lea aso (Oketopa 18, 2024), ina ua alu atu lona 'uncle' ma taumafai e sogi faamalosi atu i ona laugutu ma tagotago atu i ona itutino sa.  Ae na mafai ona ia u'una'i eseina ia le ua molia ma ia (le ua molia) tula'i ma alu 'ese atu mai i le fale.

Ina ua fesiligia le tamaitai pe o se taimi muamua lea na tupu ai se tulaga faapea, sa tali le tamaitai, o le taimi muamua na tupu ai lea tulaga ia te ia, o Mati 2023, ma mai i lena taimi, sa fa'aono ona alu atu le ua molia i lona potu ma fa'amalosia ai o ia.

Na faamatalaina e le tamaitai seisi faalavelave na tupu ia Mati 31, 2023, na alu atu ai le ua molia i totonu o lona potu ma fa'amalosia o ia, a'o ia taumafai e u'una'i ese le ua molia.  Ina ua mafai ona savali 'ese o ia (le tamaitai), sa ia savali mai loa i fafo ma le potu.  Ae na toe tupu foi seisi osofa'iga o ia ia Setema 17, 2023.  Ma faapena ai foi ia Oketopa 17, 2023.  Ma ni isi lava po, ae sa ta'ua e le tamaitai, ua na le toe manatu aso.

I seisi foi taimi na toe faamalosia ai o ia e le ua molia, ia Me 24, 2024, na ta'ua e le tamaitai lona fesiligia o le ua molia, pe aisea ua ia (le ua molia) faia lenei tulaga ia te ia, ae tali le ua molia, ona o lona alofa i le tamaitai.

Ae o le aso 18 o Setema, 2024, ina ua toe tupu lenei faalavelave, sa ta'uina ai loa e le tamaitai i lona 'Aunty' po o le to'alua o le ua molia, ia le mea o tupu.  Sa fa'aalia le le fiafia o le 'Aunty' i lona po ina o lona to'alua ma ia fai iai, afai ae toe tupu o le a ia va'ai i le mea o le a tupu ia te ia (le ua molia).

Ina ua toe alu atu foi le ua molia i le potu o le tamaitai na a'afia i le vaveao o le aso 14 o Oketopa, na tonu ai loa i le tamaitai, o le a ia tu'ua le fale a lona 'Aunty'.

Na fa'afeso'ota'ia le vaega a le 'Social Services' i lea lava afiafi, a'o iai le tamaitai i le Ofisa a Leoleo, mo sa latou su'esu'ega ma i'u ai ina o latou aveina le tamaitai i lalo o le latou vaavaaiga.

O le po lava lea, na lokaina ai le ua molia ma ina ua faatalanoaina o ia e leoleo, sa ia fa'amaonia lona taumafai e sogi i le tamaitai, ae peitai, sa ia te'ena lona fai'aiga ma le tamaitai.   Ma sa ta'ua foi e le ua molia, o le tamaitai sa na amataina nei tulaga uma na tutupu.

E 12 faitauga o moliaga ua tu'ua'ia ai lenei alii, e aofia ai:

FAITAUGA 1 & 4 - FAAMALOSI TAGATA - o se vaega 'B' o solitulafono mamafa, e mafai ona lokaina ai i le va o le lima ma le sefululima tausaga, po o se sala tupe e le i lalo ifo o le $150; po o faasalaga uma e lua.

FAITAUGA 2, 5, 7, 10 & 12 - FA'AO'OLIMA I LONA TULAGA E TOLU - o se vaega 'C' o solitulafono mama (sauaga i totonu o aiga), e mafai ona lokaina ai i le le sili atu ma aso e sefululima, po o se sala tupe i le va o le $150 ma le $300; po o faasalaga uma e lua.

FAITAUGA 3, 6, 8, 9 & 11 - FAIA O AMIOGA MATAGA I FANAU ITI - o se vaega 'B' o solitulafono mamafa, e mafai ona faafalepuipui ai i le va o le lima ma le sefululima tausaga, po o se sala tupe e le i lalo ifo o le $150, po o faasalaga uma e lua.

E $500,000 se vaegatupe sa faatulagaina e mafai ona tatalaina ai le ua molia, mai i le falepuipui, e faatali ai lona faamasinoga.