TALA MAI HAWAII

Honolulu - HAWAII

FAATOPETOPE SE TAMA MATUA I LE FALEMAI INA UA FUFUSU MA SEISI AVETAAVALE

HONOLULU (HawaiiNewsNow) - O se faalavelae na tupu i le afiafi o le aso Tofi o le vaiaso ua mavae, i luga o alatele i Honolulu, Hawaii, sa faapea ona faatopetope atu ai se tama matua e 68 tausaga, i le falema’i.

E faapea na feto’ai taavale e lua, o leisi lea na faafoeina e le tama matua i le 6 i le afiafi o le aso Tofi ma feosofi uma ai i fafo ia avetaavale, ma avau loa a la fusuaga.

Ma sa fa’amanu’alia ai le tama 68 tausaga ma fa’atopetope atu ai e le vaega a le EMS i le falemai mo togafitiga.

Sa faamatala e se molimau na tu lana taavale i le pakaga a se fale’aiga sa tu tonu lava i le nofoaga na tupu ai le faalavelae, le a’afia ai foi ma lana taavale ina ua feto’ai taavale a le tama matua ma leisi taavale i luga o le alatele.

Na ta’ua e le alii o Chris Perez lona sau i fafo mai i le fale’aiga ma ona va’aia le a’afia o lana taavale, ina ua tifa atu taavale ia e lua na feto’ai, ma taia ai lana taavale.

E o’o mai i le faaiuga o le vaiaso ua tuanai, e le’i maua mai lava se ripoti atoatoa mai i le Ofisa a Leoleo e tusa ai ma lenei faalavelave.

TETE’E E LE FAAMASINOGA MAUALUGA HAWAII TAGI A SE SUI TAUVA MAI MAUI

Ua te’ena e le Faamasinoga Maualuga ia se tagi sa faaulufaleina e se sui tauva mo le tofi Faipule mai i Maui, o Kelly King, ina ia fa’aleaogaina fa’ai’uga o le palota lautele.

Sa le’i faamanuuiaina taumafaiga a King, i le palota i le masina ua tuanai, lea na toe manumalo ai Tom Cook, i palota e 97.

Ua finau mai ia King, ua tele ni palota ua te’ena e le itumalo ona o le lea o ni igoa sainia pe le moni suafa na saini, ae le gata i lea, o le le lava o se fesoasoani sa ofoina atu, e fofoina ai lenei faafitauli.

E lata i le 1,100 palota na faaleaogaina i totonu o le itumalo a Maui ma sa ta’ua e King, ua fa’aluaina lea fuanumera, i lo le averesi a le setete i le 2022.

Ae peitai, i le faaiuga a le faamasinoga maualuga i le vaiaso ua tuanai, sa ta’ua ai le mulimulita’i o le ofisa o le failautusi a le itumalo, i ala o le tulafono faapea tulafono fa’aofisa, e fofoina ai faafitauli i palota faaleaogaina.

SU’ESU’E VAALELE NA PA’U I LE MOTU O HAWAII

O lo’o faapea ona su’esu’eina e vaega su’esu’e feterale ia le mafuaaga o se faalavelave na tupu mai i le Parker Ranch, i Waimea, i le aso Gafua o le vaiaso ua tuanai.

E tusa ai ma le Ofisa o Leoleo i Hawaii, sa logoina e le vaega a le Coast Guard, a Amerika, ia le ulua’i vaega tali faalavelave, ae e le’i ta ina le 1 i le aoauli, e tusa ai ma se vaalele o lo’o manaomia se fesoasoani.

Sa mafai ona mauaina le pailate o le vaalele, o se tina e 48 tausaga mai i le motu o Oahu, ma lana pasese, o se alii e 32 tausaga le matua.

Sa ripotia e le pailate, na o latou felelei mai i le malaevaalele a Dillingham i Oahu agai atu i Waimea, ae tupu ai se faalavelave i le latou afi, pe a ma le maila i le itu i sisifo o le malaevaalele.

Na faapea ai loa ona tulau’ele’ele le vaalele i se fanua o tata’a ai manu ma sa ta’ua e leoleo, le saogalemu uma o le pasese e toalua.

‘ESE’ESE MANATU A SUI FAITULAFONO I HAWAII I LE FOLAFOLAGA A TRUMP E AVE’ESE LE OFISA O AOGA

Ua iai nisi o sui faitulafono a le setete ua faapea ona fa’aalia ni o latou atugaluga e tusa ai ma tupe mo aoga, ina ua folafola le Peresetene filifilia ia Donald Trump, e ave’esea ia le Ofisa o Aoga a le malo tele.

Ae ua saunoa mai nisi sui faitulafono, o le a fesoasoani lea tulaga i setete, e mafai ai ona sili atu o latou malosiaga.

Ua tu lata ona fa’apaiaina lea o le nofoaiga fou, ae ua lapataia mai e nisi o sui faitulafono ia le a’afia o aoga lotoifale, e ui ina o lo’o lagolagoina e ni isi ia lenei suiga.

E pe a ma le $200 miliona, e maua e le Ofisa o Aoga a Hawaii mai i le malo feterale (Title I funds) lea o lo’o fesoasoani i a’oga lima vaivai aua fanau aoga e iai manaoga faapitoa

Sa lapata’i mai e le sui o faiaoga, po o le sui faitulafono Temokarasi, o Amy Perruso, ia .faiaoga ma taitai aoga o Hawaii, ina ia nofo sauniuni ina ne’i a’afia tupe feterale mo a’oa’oga, talu ai se folafolaga mai ia Trump, ina ia tapunia lea ofisa feterale.

Na saunoa Perruso, o le tapunia o le Ofisa o Aoga a le malo tele, po o le fa’aitiitia o ana auaunaga, o le a faapea ona fa’aitiitia ai tulafono e mulimulita’i ai i tulafono feterale.  Ma na ia ta’ua se faataitaiga, o le tulafono feterale lea e tatau ona puipuia ma lagolagoina fanau aoga e iai manaoga faapitoa.

Sa ta’ua foi e Perruso le iai o faafitauli o lo’o latou feagai ai ma nei ituaiga mataupu ma o lo’o iai nisi o tagata o lo’o fiafia e fa’alauiloa atu fa’alauaitele ia ituaiga mataupu ma ta’ua ai le tulaga faaletonu o a tatou galuega, e lagolagoina ai fanau e iai manaoga faapitoa.

Na fa’avaeina le Ofisa o Aoga i le 1980 e le Peresetene o Jimmy Carter ma ua fa’afia ona taumafaiga isi faigamalo ua tuana’i atu, e tapunia lea ofisa, ona o le pa’u o togi o suega a fanau, o fe’ese’eseaiga faaletaitaiga faapea ‘ese’esega o tu ma aganu’u.

Ae sa saunoa le sui Faipule o Diamond Garcia, le taitai o le vaivaiga laiti o le Maota o Sui, o se mea lelei pe afai ai tapunia le ofisa o aoga.

Ua fa’aalia e Garcia lona lagolagoina o le fuafuaga a Trump ma ua ia talitnuga, o le a le a’afia ai vaegatupe ua mae’a ona fa’atulafonoina.