O OE O LO’U TAMA?

VAEGA 137

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

**********************************************

Sa gata mai le tatou FAGOGO i le vaiaso ua mavae, ina ua agai atu le teine o Ruta ma si ona tuagane o Iakopo, e saili mai le molimau lea e manaomia e fesoasoani i le mataupu a le tamaloa o Alesana,  i toton o le faamasinoga.

O le fa’alavelave lenei e a’afia ai Alesana, na tupu a’o talavou o ia.  O lona uiga, o lea e tau saili e Ruta ma Iakopo ia se tamaloa ua matua, ae la te le’i feiloai ai foi i lea tagata.

Na pau lava le tulaga e la te iloa, o le igoa o le tamaloa, o Semi Tagaloa ma le nu’u o lo’o nofo ai.

E alu lava le faigamalaga a Ruta ma Iakopo, ma o la talatalanoa lava i le mea lea o lo’o tupu ia Iakopo ma le teine o Salome.

Lea ua fai mai Iakopo, ua mae’a le la faigauo ona o le sauaina e Salome o le tuafafine laititi a Iakopo, o Naomi, a’o la a’o’oga faatasi, a’o la talavou.

Ua taunu’u le faigamalaga a le tuafafine ma le tuagane i le nu’u lea na ta’u mai, o lo’o nofo ai le tamaloa o Semi.

Ua la o atu nei ma tu’itu’i i fale o tagata ma tu’ufesili mo lea tagata.  Ae peitai, sa tali mai lava tagata, e leai e latou te le iloa lea tamaloa.

Ina ua le lavava Ruta ma Iakopo, aua ua o’o foi i le aoauli, na la o a’e loa i se tamai faleaiga ma malolo ai ma fai le la taumafataga o le aoauli.

Sa talatalanoa lava le to’alua lea ma o la a’ai, ae fa’ate’ia i la’ua ina ua fesli atu le teine lea e faigaluega i le fale’aiga, po o la tau sailia Semi Tagaloa.

“Ioe, e te silafia lea tagata?” o le tali mai lea a Iakopo.

“Ou te le iloa po o le tagata lava lea e tasi, ae e iai le tamaloa e suafa ia Semi Tagaloa, o lo’o fai sana fale ta’avale i le fa’asi’usi’uga o le taulaga.”

Ua faatopetope loa le ‘a’ai a le to’alua lea ae o la agai atu i le fale lea na fa’asino ifo e le teine lea e faigaluega i le fale aiga.

[E FAIA PEA]