Valaau le tina i le ofisa a leoleo ina ua fiu e fa’ato’afilemu sona alo

Pago Pago - AMERIKA SAMOA

E tusa ai ma fa’amaumauga a leoleo, o le po o le aso 19 o Oketopa, na valaau ai se tina i le Ofisa a Leoleo i Fagatogo, e talosagaina se fesoasoani i sona alo, ua fiu e fa’afilemu i totonu o le latou aiga.

Na molia ia Mickey Tipoti i le Faatupu Vevesi i totonu o lona aiga (sauaga i totonu o le aiga), o se vaega ‘C’ o solitulafono mama, e mafai ona loka ai i le o’o atu i aso e sefululima, po o se sala tupe e $300; po o faasalaga uma e lua.

Ina ua taunu’u leoleo i le nofoaga na tupu ai le fale, sa va’aia se alii o tu tu i fafo o le fale ma le tina na fa’afeso’ota’ia le ofisa a leoleo ma na fa’ailoa atu e le tina i leoleo, ua mana’o e ave’ese atu lona alo o lo’o i totonu o le fale.

Sa agai atu leoleo i totonu o le fale ma talosagaina Tipoti e sau i fafo mai i le fale ma ina ua o’o mai i fafo Tipoti, sa faapea loa ona lokaina mai o ia e leoleo, ma aveina atu loa i le Ofisa a Leoleo.

A’o ta’ita’i atu e leoleo ia le ua molia, sa fa’alogoina e leoleo le manogi fa’asuaava o le alii.

Sa ta’ua e le tina o le ua molia, o le latou fo’i mai i le latou fale mai i le Bingo, na amata ai le sauniga a le ua molia, o le palauvale solo, se’ia o’o atu lava i le fale ma i’u ai ina o la pisa ma lona uso laititi.

Na ta’ua e le tina le fiu e taofiofi le ua molia ma o le mafua’aga lea na ia valaau ai i le ofisa a leoleo.

E le gata i lea, sa ta’ua e le tina lona le toe mana’o i le ua molia, i totonu o lona fale, ona o lana amio lea ua fai ma masani.  Sa ta’ua e le tina lona taumafai e puipui si ona alo laititi mai i le ua molia.

Ina ua fa’atalanoaina e leoleo ia Tipoti i le ofisa a leoleo, sa ia faamatalaina le manatu o lona tina ua le mafai ona taofiofi o ia, ona o lona le fiafia i lona uso laititi ma lona palauvale leotele.  

Ma sa fa’amatalaina foi e le ua molia ia le tu’ua’ia o ia e lona tina, i le amataina o le pisa i le va o ia ma lona uso ae peitai, sa ta’ua e le ua molia, le tu’iina o ona foliga e lona uso laititi.

E $100 sa fa’atulagaina e mafai ona tatalaina ai le ua molia, mai i le falepuipui, e faatalitali ai lona faamasinoga.