O OE O LO’U TAMA?

VAEGA 136

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 136.

******************************************************

Ua savali ese mai ia Naomi mai i le ofisa a le tamaitai o Salome, lea na la talanoa ai ma fa’ailoa atu iai e Salome ia Naomi, o ia le la ua faamavae mai i lana galuega faaletaitai i le falemai.

Ae sa fai atu iai Naomi, e leai se mafuaaga o le a faamavae ai fua, o le la ua leva ona faagalo e ia le mea sa tupu i lo la va.

Ua alu atu nei Naomi e amata galuega o le aso ae ua nofonofo ai lava Salome ma tau mafaufau i leisi laasaga o lona olaga.

Ae o le taimi lea o lo’o o ia le teine o Ruta ma si ona tuagane o Iakopo e su’e mai ia le molimau pepelo lea na mafua ai ona faafalepuipui lo latou tama a’o talavou o ia.

Na va’aia lava e le teine o Ruta ia le nofonofo o Iakopo ma tilotilo i fafo o le faamalama, ua leai lava talanoa mai ia te ia.

“Ua e lelava?” o le fesili atu lea a Ruta i lona tuagane.

“Oi e leai, o lea e matamata atu i le la itu o lenei nu’u e tatou te nonofo ai,” o le tali mai lea a Iakopo.

Na fai sina umi o toe nofonofo Iakopo ua le toe tautala, ona ia toe faapea atu lea i lona tuafafine, “Ua fa’auma le ma faigauo ma Salome.”

Sa le tautala ia Ruta ae ua sa’o laga tilotilo agai i luma i le auala ma faatalitali i seisi faamatalaga a lona tuagane.

“Talu lava ona ia faamatalaina maia lana mea sa fai ia Naomi, ua matua’i le sa’o lava lo’u mafaufau.  E le iloa pe faapefea ona ou faagaloina lana mea sa fai i lo’u tuafafine,” o le tala lea a Iakopo ma ua amata ona melo tagi

Ua faapea atu ia Ruta, “O lou tuafafine o Naomi, o se tamaitai malosi.  Malosi le loto.  Malosi le tino.  Malosi le mafaufau.  Na avea le mea sa tupu ia te ia a’o ia laititi, ua avea ai o ia o se tagata loto alofa ma le agamalu.  Ou te iloa, e le mafai ona nofonofolelei o ia, pe afai e te mafatia.”

“O le a lava lau filifiliga e fai, ia e faia ma lou mautinoa, e le toe faaopoopo ai ni isi tiga ia Naomi,” o le toe upu lea a le teine matua i si ona tuagane laititi.

[E FAIA PEA]