Fiu le uso e fa’afilemu, valaau loa leoleo

Pago Pago - AMERIKA SAMOA

O le taeao o le aso 12 o Oketopa, na fa’afeso’ota’i ai e se tamaitai ia le Ofisa a Leoleo i Tafuna ona o lona uso, o Telesia Tafilele, ua fiu e fa’afilemu ae ua le mafai.

Ina ua taunu’u leoleo i le fale na tupu ai le faalavelave, sa va’aia se tamaitai o saofai i luma o le fale o le nu’u ma talanoa toatasi lava na o ia.  Sa agai atu iai leoleo  ma lokaina mai le tamaitai ma aveina atu i le Ofisa a Leoleo i Tafuna.

Ona toe fo’i lea o leoleo i le fale na valaau mai ai le uso a Tafilele mo le faia o le latou suesuega.

O iina na faamatala ai e le uso a Tafilele i leoleo, le faate’ia o ia ina ua ‘e’e le ua molia i se tasi o ona alo e latou te nonofo. Sa ia taumafai e fa’afilemu Tafilele ae peitai, sa fa’aauau pea ona ‘e’e le ua molia ma i’u ai lava ina savali atu i luma o le fale ma amata ona kiki le ulu o lana tama, a’o taoto le tamaititi i luga o le fola o le fale.

Ona tago lea o le ua molia, i le u’u mai se nofoa uga ma sasa ai le papatua o le tamaititi.  Sa faamatala foi e le uso a le ua molia, ia lona taumafai e tuli ‘ese ia Tafilele mai i le fale ona o ana gaioiga, ae na fa’ato’a alu ‘ese atu le ua molia ma velo le faitoto’a o le fale, ma ta’e ai.

O iina lea na valaau ai loa e le uso a le ua molia, i le ofisa a leoleo.

Sa ta’ua e le uso a le ua molia, e le o se taimi muamua lenei ua tupu ai se tulaga faapea i totonu o le latou aiga ma o taimi uma lava e mana’o ai le ua molia i se tupe, e molimauina lav le suia o ona uiga.

  Ina ua faatalanoaina e leoleo ia le alo o le ua molia lea na a’afia i lenei faalavelave, sa ia ta’ua lona le iloa o le a faia e le ua molia, se tulaga faapea ia te ia, aua o la e na’o le taotooto lana mea sa fai.  Ae na mafua ona ta’oto’oto i luga o le foloa o le fale i le aso lea, ona o lea na fa’ato’a te’a mai i tua mai i le falemai.

Sa ta’ua e le alii a a’afia lona oso ese ina ua amata ona ta kiki e le ua molia ia lona papatua ma lona ulu.  Ae tago le ua molia i le nofoa ma amata ona sasa ai o ia.

Ina ua faatalanoaina e leoleo ia Tafilele, lea ua molia, sa ia ta’ua lona le fiafia i lona alo lea sa ia fa’ao’olima iai, ona ua lua vaiaso, e le toe maua atu ai sana tupe, ae sa ia mana’omia se tupe e faatau ai ana vailaau.  Ae le gata i lea, sa fia ‘ai ma fia inu, ae ua leai sana tupe.

Sa faamatala e le ua molia, o le aso Faraile na alu ai i le galuega a lona alo, lea na a’afia, ae ona iloa ai, sa ave lona alo i le falemai.  O le mea lea na sau ai i le fale a lona uso i le aso na soso’o ai, aua o iina e nofo ai lona alo lea.

Na faamaonia e le ua molia ia lona faia o gaioiga e pei ona sa faamatalaina e lona uso ma lona alo, i leoleo.

Ua molia nei Tafilele i moliaga, e aofia ai;

Faitauga 1:  Faatupu Vevesi i totonu o le aiga (sauaga i totonu o le aiga) o se vaega ‘C’ o solitulafono mama, e mafai ona fa’afalepuipui ai i le o’o atu i aso e sefululima, po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu (sauaga i totonu o le aiga), o se vaega ‘A’ o solitulafono mama, e mafai ona nofosala ai i le o’o atu i le tausaga atoa, po o se sala tupe e $1,000; po o faasalaga uma e lua.

E $3,000 na fa’atulagaina e tatalaina ai le ua molia, e faatalitali ai lona faamasinoga.