Misa tamaitai aveta’avale la’u pasese i le ponesi

Pago Pago - AMERIKA SAMOA

O le aso 11 o Oketopa, na o’o atu ai se tamaitai aveta’avale la’u pasese (taxi) i le Ofisa a Leoleo a Tafuna ma ripotia ai seisi tamaitai aveta’avale la’u pasese, ua fa’ao’olima ia te ia.

E pei ona ta’ua i faamaumauga a le malo, sa molia Fofoga Godinet i le fa’ao’olima ina ua pa’i i seisi tamaitai ave taavale la’u pasese.

Ma na molimauina e leoleo ia le mumu ma manu’a o foliga o le na a’afia.

Na fa’afeso’ota’ia e leoleo ia le vaega a le EMS mo le togafitia o le na a’afia ae na te le’i fia malaga i le falema’i mo nisi togafitiga.

Sa ta’ua e le tamaitai na a’afia, o le mafua’aga o le la misa ma Godinet ona o le Ponesi.

E pei ona sa faamalamalamaina e le na a’afia, na ia fai atu i le ua molia, e faatau ana numera, ae le fiafia ai ma palauvale mai ia te ia. 

Ma na taumafai seisi ave taxi e taofiofi le ua molia, ae peitai, na ma’amulu mai ma o’o mai i le fa’ao’olima i le na a’afia.  Ma sa ta’ua e le na a’afia, o lona mafaufau i lana fanau ma le tulafono, sa ia savali ese mai ai, ma sau sa’o ai loa i le ofisa a leoleo.

Na agai atu loa leoleo i le laumua o ta’avale la’u pasese, ma maua at ai Godinet, lea ua molia ma aveina o ia i le Ofisa Leoleo i Tafuna, mo le su’esu’eina.

E tusa ai ma le faamatalaga a le ua molia, sa ia taunu’u atu i le laumua i lea aoauli, lea na tupu ai le la fe’ese’esea’iga ma le na a’afia.  Ma na ia faamatalaina e faapea, e na te le’i fuafuaina e palauvale ma tu’i foliga o le na a’afia.  Ae ona ua oso mai lona ita ma sa ia fa’ato’ese, o le a le toe tupu.

Sa fa’atalanoaina foi e leoleo ia se tasi na molimau i le faalavelave ma na ia faamatalaina e faapea, sa ia valaauina le na a’afia e sau i le laumua ma ia fesiligia ai le na a’afia, pe aisea ua ia le ofuina ai le toniga a le latou kamupani.  

Ae sa le fiafia le na a’afia ma savali ‘ese atu ae sa fa’ailoa atu iai e le ‘base’ po o le tagata faigaluega i le laumua e faasoasoaina pasese, o le a le maua ni ana (le na a’afia) pasese i lea aso, ma o le a le totogia foi o ia.

Ma e tupu lea tulaga, ae o lo’o iai Godinet i le laumua.  Ma na valaau atu iai le na a’afia, o le a ia le totogia sana ponesi, ae fesili Godinet pe aisea, ae sa savali ‘ese atu le na a’afia.

Sa ta’ua e le molimau, o iina na amata ai le tauga’upu a Godinet ma le tamaitai na a’afia, se’ia o’o ina savali atu iai Godinet ma tu’i foliga o le tamaitai na a’afia.  Ma feosofi atu ai isi ave taxi ma taofiofi mai Godinet, ae savali le tamaitai na a’afia i lana taavale ma vala’au mai, e la te feiloai i le ofisa a leoleo.

Sa lokaina Godinet i lea aso, ma molia i moliaga, e aofia ai:

Faitauga 1:  Faatupu Vevesi i Nofoaga Faitele, o se vaega ‘B’ o solitulafono mama, e mafai ona loka ai mo le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le falepuipui mo aso e sefululima, po o se sala tupe e $300; po o faasalaga uma e lua.

E $500 se vaegatupe sa fa’atulagaina e tatalaina ai le ua molia, e faatalitali ai lona faamasinoga.