O OE O LO’U TAMA?

VAEGA 131

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

***********************************************

Na gata mai le tatou Fagogo i le vaiaso ua tuanai ina ua agai atu le taavale a le alii fomai o Taki ma le teine o Naomi, e momoli Naomi i le galuega.  Ae fesiligia ai e Naomi ia le alii fomai, pe aise ua le toe alu atu ai e faigaluega, o le la e mana’omia lana auaunaga.

Ua ata le alii fomai o Taki ma faapea atu, “E a? Ua e misia mai a’u i le falema’i?”

Na ata le teine o Naomi ma tilotilo i fafo o le faamalama o le taavale ua le tali mai i tala a Taki.

Ona ia faapea mai lea, “Aua le avea lenei mea sa tupu ma tulaga e taofia ai lau auaunaga manaomia mo tagata o le tatou atunu’u.”

Ua ‘ata’ata ifo le alii fomai ia te ia lava, ma ia faapea mai i autaliga o Naomi, ona o loo’o tilotilo lava i fafo o le faamalama ia le teine, ua le toe faasaga mai totonu o le taavale, “Aua e te popole, o lea e fai sina a’u eva, o’u toe alu atu ai.”

Ua mae’a ona tu’u e le alii fomai ia le teine o Naomi ona toe masau mai lea i le fale e faatali le sailiga a Ruta ma lona tuagane o Iakopo le la e alu, e saili le molimau lea o lo’o manaomia e mafai ona fesoasoani i le mataupu a le la tama.

Ae ua savali atu nei i totonu ia Naomi ma agai atu i le potu e sui ai tamaitai tausi gasegase.  Ma o lona toe fo’i mai, na o la fetaui tu tu ai lava ma le teine o Salome, o lo’o savali atu ma lana mata tioata uliuli, o lo’o tau nana ai le fulafula o ona mata i lana tagi sa fai i le po ua mavae.

Sa le’i toe faatafa ia le teine o Naomi, ae ua savali sa’o atu lava iai ma feiloa’i ia Salome.

“Talofa i lau susuga i le taitai,” o le faafeiloaiga lea a Naomi.

“Taeao maniua Naomi,” o le tali mai lea a Salome.  “E mafai ona o ta talanoa tasi lava ae e le’i amata lau sifi?” 

“Ia ua lelei, se’i mae’a la’u mea lea e fai ona ou alu atu lea i lou ofisa,” o le tali mai lea a Naomi.

Ua mae’a ona pani le pepa faigaluega a Naomi, ona savali sa’o atu loa lea i le ofisa a Salome ma tu’itu’i lona faitotoa.

“Naomi, faafetai lou sau,” o le amataga lea o le tau lauga mai a Salome.

Ae oso atu le teine o Naomi ma faapea atu, “Salome, afai o lo’o e taumafai e toe talanoa mai i le mea sa tupu, ou te le o fia faalogo iai.”

“Leai, o lea ou te mana’o e faafetai atu i lou agaga malamalama ma faailoa atu, o lea ua mae’a ona ave la’u tusi faamavae i le pule o le falemai.  Ou te le o toe manao lava e faia se tulaga e te toe ono a’afia ai.”

“O le uiga lea o la’u tala e fai atu, Salome,” o le faapea mai lea a Naomi.  “Aua le avea lenei mea sa tupu ma tulaga o le a sui ai foi tulaga o lou olaga.  E mafai ona o ta faigaluega faatasi, e aunoa ma le toe iai on isi lagona, pe a e mana’o iai.  Afai ae e te faamavae mai lau galuega lenei, o lona uiga, o lena lava e te tauave lenei avega mamafa.  Tu’u loa i lalo, ua uma.” o le toe faapea atu lea a Naomi.

[E FAIA PEA]