Toalua ua maliliu ina ua fanaina e se teineititi 15 tausaga ia le a’oga

WISCONSIN - USA

O le aso Gafua na se’i mavae atu nei, sa tula’i mai ai se faalavelave mata’utia i se aoga tulaga muamua, o le ‘Abundant Life Christian School’, i Madison, Wisconsin, ma maliliu ai se faiaoga faapea ma se tamaititi aoga.

E faapea le faamatalaga o lenei faalavelave, o se teineititi a’oga, e igoa ia Natalie Rupnow, e 15 tausaga le matua, na alu atu i le aoga ma se fana (9mm pistol) ma ia tafaina ai tagata faigaluega o le aoga faapea ma fanau aoga.

Ma e toatasi se faiaoga ma se tamaititi a’oga ua maliliu ai i lenei faalavelave, ae manunu’a ai ni isi e to’aono.

Sa fa’aleoina e le Pule o Leoleo a lea a’ai, ia Shon Barnes, e mana’omia ona saili le mafuaaga moni o nei ituaiga faafitauli.

Sa ta’ua e Barnes, e maua atu Natalie, o lo’o manu’a i se pulufana ina ua ia taumafai e pule i lona ola, ma na maliu o ia, ina o aga’i atu le taavale falemai, i le falemai.

O lenei a’oga sa tupu ai le faalavelave, o se a’oga lotu, ma e pe a ma le 420 fanau aoga e a’o’oga ai.

Na fa’amatalaina e Barbara Wiers, le faatonusili o le aoga, o taimi uma lava e fai ai a latou faata’ita’iga mo ituaiga faalavelave faapenei, e fa’ailoa atu lava i fanau aoga, ua na’o se faataitaiga.  Ae ina fa’alogo fanau a’oga i upu “Lockdown! Lockdown!’ i le aso Gafua, sa o latou iloa lelei lava, e le o se fa’ataitaiga o lo’o fai.

E le o mailoa mai i le taimi le mafuaaga ua faia ai e le tamaitai 15 tausaga lenei tulaga ma sa ta’ua e Barnes, a mafai ona o latou nofo malamalama i le mafua’aga, e mafai ona o latou taumafai e taofia le toe tupu mai o se tulaga faapenei.

Sa ta’ua e Barnes le o’o atu o leoleo ma su’esu’eina le tua’a faapea aiga o Natalie ma sa faia foi su’esu’ega i le fale o le aiga a Natalie.

E tusa ai ma laamatalaga o lenei faalavelave, na taunu’u le ulua’i valaau mo se fesoasoani (911) ae e le’i ta ina le 11 i lea taeao ma sa faatopetope mai iai vaega uma a le malo e gafa ma faalavelave faapenei.  E tolu minute talu ona taunu’u le ulua’i valaau mo se fesoasoani, ae taunu’u vaega a le malo.

Sa amata loa ona polokaina e leoleo ia auala uma e faataamilo i le aoga.  Ma mai i le taimi na taunuu leoleo i le aoga, sa le i toe faalogoina se pa o se fana.

Na ta’ua e se tasi o tina loto mafatia, o Bethany Highman, le pogisa o mea uma ina ua taunu’u le tala, o se tasi o fanau sa faatopetope atu i le falemai, o sona alo.  Ae na toe maua mai le tala, ua faasolosolo manuia o ia.

Sa ta’ua e le Peresetene o Amerika ia Joe Biden ia le matautia o ituaiga faalavelave faapenei ma ia talosagaina ai le Maota Fono ina ia pasia tulafono e mafai ai ona faamalosia suesuega i tagata e taumafai e faatau mai ni fana.

O lenei faalavelave, o se tasi o faalavelave i le tele o faalavelave faapenei ua tutupu i totonu o Amerika i tausaga na se’i mavae atu, e aofia ai ma faalavelave na maliliu ai nisi, e pei ona sa tupu i Newton, Connecticut; Parkland, Florida ma Uvalde, Texas.

Ma ua toe amataina ai foi ona lagonaina leo o finauga i le faamalosia o ni tulafono e limiti ai le fa’aaogaina ma le fa’atauina o fana.