Molia ni alii se to’alua na fufusu i le paka Liona ona o se telefoni

Pago Pago - AMERIKA SAMOA

O le po o le aso 5 o Oketopa, na fa’afeso’ota’i atu ai e se alii leoleo ua manava, ia le Ofisa a Leoleo i Tafuna, ona o ni alii se to’alua sa fufusu i le paka Liona, i autafa o le malae pasiketipolo.

O se taimi mulimuli ane, na fa’amaonia ai le fa’asuaava uma o nei alii e to’alua.

Ina ua taunu’u leoleo i le paka, na fa’asino ifo iai e le alii leoleo lea na valaau i le ofisa a leoleo, ia susuga ia Del Melei ma Verrzanogiovanni Va’atofu, o i la’ua ia sa fufusu i le paka, ma ua molia nei i lenei faalavelave.

Na ta’ua foi e le alii leoleo na ripotia lenei faalavelave, i le ofisa a leoleo, ua mae’a foi ona ia tutuli eseina ia Melei ma Va’atofu mai i le paka, ae mumusu e o ese.

Sa na’o fa’amaumauga o moliaga a Melei sa mafai ona maua mai e le Samoa News, lea e aofia ai ia moliaga o le:

Faitauga 1:  Faatupu Vevesi i nofoaga faitele, o se vaega ‘B’ o solitulafono mama, e mafai ona loka ai mo le ono masia, po o le totogi o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le falepuipui, i le o’o atu i masina e ono, po o se sala tupe e $1,000; po o faasalaga uma e lua.

E $10,000 se vaegatupe na faatulagaina e mafai ona tatalaina ai i tua Melei, e fa’atalitali ai lona faamasinoga.

Sa faapea loa ona aveina atu uma ia Melei ma Va’atofu i le ofisa a leoleo mo togafitiga o o la manu’a faapea le faatalanoaina o i la’ua.

Na faapea foi ona aveina atu uma molimau o lenei faalavelave, i le ofisa a leoleo.  Lea na faamatala ai e le molimau muamua, a’o iai o ia i le paka Liona, sa fai ai se latou volipolo ma nisi o ana uo, ina ua amata le fusuaga a Melei ma Va’atofu.  Ma sa va’ia e lenei molimau le fa’aaogaina e Melei o se naifi (4 inisi) e taumafai e fa’amanu’alia ai le ua a Va’atofu.

Sa faamatala e le molimau, na mafua ona amata le fusuaga a le to’alua ia ua molia, ona ua tu’ua’ia e Va’atofu ia Melei i le gaoiina o lana (Va’atofu) telefoni.

Na ta’ua e le molimau lona lua le lu’iina e Melei o Va’atofu e la te fufusu ma o le mafuaaga lea o le fusuaga, ma na taumafai ai Melei e fa’ao’o ni manu’a i le ua o Va’atofu, e ala i le fa’aaogaina o se tama’i naifi.

O le molimau a le molimau lona tolu, ina o le a alu ia Va’atofu i le fale, sa ia fesiligia ai Melei e uiga i lana telefoni, ae tali mai Melei e na te le iloa po o fea o iai le telefoni a Va’atofu ma amata ai loa se la taugaupu, ae fa’ai’u i le la fusuaga.

O le 8:30 o lea afiafi sa faatalanoaina ai e leoleo ia Va’atofu ma sa ia ta’ua lona le fiafia tele ona ua gaoia e le tagata ia lana telefoni, ma o le mafua’aga lea o le la fusuaga ma Melei, i le paka Liona.

Sa ta’ua e Va’atofu le taumafai o Melei e ‘tipi’ lona ua, i se tamai naifi ma na fa’ate’ia ai le to’atele sa iai,  i le gaioiga a Melei, ma o latou feosofi atu ai i le taofiofi mai Melei.

Na ioeina e Melei lona fusu ma le fa’aumu.

O se taiimi mulimuli ane, na fa’atalanoa ai e leoleo ia Melei ma sa ia ta’ua lona maasiasi ona sa tu’ua’ia o ia e Va’atofu i le gaoia o lana (Va’atofu) telefoni.  Ma sa ta’ua foi e Va’atofu, lona u’uina o le tamai naifi, e puipui ai o ia, ae e le’i iai sona manatu e fa’ao’o se manu’a ia Va’atofu.

Sa ioeina foi e Melei ia lona tagofia o ‘ava malolosi, i nofoaga faitele ma le faatupu vevesi.